Putin: యువతలో వ్యసనంగా మారుతున్న పోర్నోగ్రఫీ సమస్యకు పరిష్కార మార్గాలను రష్యా అధ్యక్షుడు వ్లాదిమిర్ పుతిన్ సూచించారు. ‘రష్యా టుడే’కు ఇచ్చిన ఇంటర్వ్యూలో, పోర్న్ కంటెంట్ సమస్యపై తన అభిప్రాయాలను పంచుకున్నారు. పోర్నోగ్రఫీకి ప్రపంచవ్యాప్తంగా ఆదరణ పెరుగుతోందని, ఇది కేవలం రష్యాలోనే కాకుండా అంతర్జాతీయస్థాయిలో ఒక పెద్ద సమస్యగా మారిందని ఆయన అన్నారు.
పోర్న్ కంటెంట్‌ను నిషేధించడం ఒక పరిష్కార మార్గంగా ఉండగలదని పుతిన్ పేర్కొన్నారు. అయితే, పోర్న్ కంటే ఆకర్షణీయమైన, ఆసక్తికరమైన.. ప్రజలను ఆకట్టుకునే ప్రత్యామ్నాయ కంటెంట్‌ను అభివృద్ధి చేయడం మరింత ముఖ్యమని అభిప్రాయపడ్డారు. ప్రజలను మెరుగైన మార్గాల వైపు దారితీసేందుకు ప్రభుత్వాలు ప్రత్యేకంగా కృషి చేయాలని పిలుపునిచ్చారు.
అలాగే, రష్యాలో తగ్గిపోతున్న జననాల రేటును పెంచడం కోసం పుతిన్ చేసిన సూచనలు కూడా చర్చనీయాంశమయ్యాయి. పనిలో ఉన్న సమయంలో, కాఫీ బ్రేక్‌లు లేదా విరామ సమయంలో కుటుంబ నిర్మాణంపై దృష్టి పెట్టాలని, పిల్లల్ని కనడానికి ప్రోత్సహించాల్సిన అవసరం ఉందని ఆయన అభిప్రాయపడ్డారు.
సమాజంలో పోర్నోగ్రఫీ వ్యసనం తగ్గించడమే కాకుండా, సాంస్కృతిక మార్పులు తీసుకురావడం ముఖ్యమని పుతిన్ సూచించారు. ప్రజల జీవితాల్లో సానుకూల మార్పులు తీసుకురావడం ద్వారా పోర్నోగ్రఫీపై ఆధారపడే యువతను సృజనాత్మక దిశలో నడిపించవచ్చని ఆయన పేర్కొన్నారు.