Rajendranagar: రాజేంద్రనగర్ పరిధిలో ఒక మహిళ కిడ్నాప్, అత్యాచారం, హత్య కేసులో పోలీసులు ముగ్గురు ఆటో డ్రైవర్లను అరెస్ట్ చేశారు. ఈ ఘటన హైదరాబాద్‌లో సంచలనం సృష్టించింది. పోలీసులు తెలిపిన వివరాల ప్రకారం, ఈ దారుణమైన సంఘటనలో పలు షాకింగ్ విషయాలు వెలుగులోకి వచ్చాయి.
ఒకరి తర్వాత ఒకరు..
అత్తాపూర్‌లో అపస్మారక స్థితిలో ఉన్న ఒక 30 ఏళ్ల మహిళను మొదట ఆటో డ్రైవర్ దుర్గారెడ్డి కిడ్నాప్ చేశాడు. ఆమెను కిస్మత్‌పురలోని నిర్మానుష్య ప్రదేశానికి తీసుకెళ్లి అత్యాచారం చేశాడు. ఈ దాడిలో మహిళకు మత్తుమందు కూడా ఇచ్చినట్లు పోలీసులు తెలిపారు. అనంతరం ఆమెను తిరిగి అత్తాపూర్‌లోని పిల్లర్ నెంబర్ 340 వద్ద వదిలి వెళ్ళిపోయాడు.
ఆ తర్వాత, అపస్మారక స్థితిలో ఉన్న ఆ మహిళను చూసిన మరో ఇద్దరు ఆటో డ్రైవర్లు దస్తగిరి, ఇమ్రాన్ మళ్లీ కిడ్నాప్ చేశారు. ఆమెను తమ ఆటోలో ఎక్కించుకుని తిరిగి అదే నిర్మానుష్య ప్రదేశానికి తీసుకెళ్లి ఆమెపై సామూహిక అత్యాచారానికి పాల్పడ్డారు.
దారుణమైన హత్య
సామూహిక అత్యాచారం సమయంలో మహిళ సహకరించలేదని ఇమ్రాన్, దస్తగిరి ఆమెను తీవ్రంగా కొట్టి హత్య చేశారు. ఆధారాలు లేకుండా చేసేందుకు ఆమె వంటిపై ఉన్న బట్టలను కూడా తొలగించారు. ఈ ఘటనపై కేసు నమోదు చేసుకున్న పోలీసులు, దర్యాప్తు చేసి దుర్గారెడ్డి, దస్తగిరి, ఇమ్రాన్‌లను అదుపులోకి తీసుకున్నారు.
ఈ దారుణానికి పాల్పడిన నిందితులపై పోలీసులు కఠినమైన సెక్షన్ల కింద కేసులు నమోదు చేశారు. పూర్తి విచారణ జరిపి, పక్కా సాక్ష్యాలతో నిందితులను కోర్టులో ప్రవేశపెట్టనున్నట్లు అధికారులు తెలిపారు. ఈ ఘటనతో ప్రజల్లో భద్రతపై ఆందోళనలు వ్యక్తమవుతున్నాయి.