Kavitha: బీఆర్ఎస్ పార్టీలో ముఖ్య నాయకులైన మాజీ మంత్రి హరీశ్రావు, తెలంగాణ జాగృతి వ్యవస్థాపకురాలు కల్వకుంట్ల కవిత మధ్య ఇటీవలి కాలంలో నెలకొన్న రాజకీయ విభేదాలకు తాత్కాలికంగా తెరపడింది. హరీశ్రావు తండ్రి తన్నీరు సత్యనారాయణరావు ఇటీవల వయోభారంతో మరణించిన నేపథ్యంలో, కవిత గురువారం ఉదయం ఆయన నివాసానికి వెళ్లి పరామర్శించారు.
మంగళవారం రోజున సత్యనారాయణరావు కన్నుమూసినప్పుడు కవిత అంత్యక్రియలకు హాజరు కాలేదు. దీంతో, వీరిద్దరి మధ్య ఉన్న తీవ్రమైన విభేదాల కారణంగానే ఆమె రాలేదని అప్పట్లో రాజకీయ వర్గాల్లో పెద్ద ఎత్తున ఊహాగానాలు చెలరేగాయి. అయితే, ఆ ఊహాగానాలకు బ్రేక్ వేస్తూ, మూడు రోజుల విరామం తర్వాత కవిత తన భర్త అనిల్తో కలిసి కోకాపేట్లోని హరీశ్రావు ఇంటికి చేరుకున్నారు.
హరీశ్రావు నివాసానికి చేరుకున్న కవిత, ముందుగా దివంగత సత్యనారాయణరావు చిత్రపటానికి పూలమాలలు వేసి నివాళులర్పించారు. అనంతరం ఆమె హరీశ్రావుతో, కుటుంబ సభ్యులతో కొద్దిసేపు మాట్లాడి, వారిని ఓదార్చి ధైర్యం చెప్పారు. ఈ సందర్భంగా హరీశ్రావు మేనత్త లక్ష్మిని సానుభూతితో పలకరించారు.
Also Read: Rishabh Pant: రిషభ్ పంత్ రీ-ఎంట్రీ: విరాట్ కోహ్లీ జెర్సీలో కెప్టెన్గా సందడి!
ఈ పరామర్శ రాజకీయ వర్గాల్లో మరింత ఆసక్తిని పెంచడానికి ఒక ప్రధాన కారణం అయింది. ఇటీవల, కవిత బహిరంగంగా హరీశ్రావుపై సంచలన ఆరోపణలు చేశారు. ముఖ్యంగా కాళేశ్వరం ప్రాజెక్టు అవినీతి వ్యవహారంలో హరీశ్రావు పాత్ర ఉందని, పార్టీలో గ్రూపు రాజకీయాలకు ఆయనే కారణమని, కోవర్టుల కారణంగానే బీఆర్ఎస్ నాశనమైందని కవిత తీవ్రస్థాయిలో విమర్శించారు. ఈ వ్యాఖ్యల తర్వాత హరీశ్రావు ప్రత్యక్షంగా స్పందించకపోయినా, పరోక్షంగా “నా ప్రస్థానం తెరిచిన పుస్తకం” అని చెప్పుకొచ్చారు. అలాంటి ఉద్రిక్త పరిస్థితుల తర్వాత, కవిత నేరుగా హరీశ్రావు ఇంటికి వెళ్లి పరామర్శించడం ఇదే తొలిసారి.
నిన్నటి వరకు ఇద్దరి మధ్య మాటలు లేవని భావించిన రాజకీయ విశ్లేషకులు ఈ తాజా పరిణామాన్ని చాలా ఆసక్తిగా గమనిస్తున్నారు. “రాజకీయాల్లో శాశ్వత మిత్రులు, శత్రువులు ఉండరు” అనే మాట మరోసారి రుజువైందని చాలామంది అభిప్రాయపడుతున్నారు.
కొందరు దీనిని కేవలం కుటుంబ దుఃఖంలో చూపిన సానుభూతిగా చూస్తుండగా, మరికొందరు మాత్రం ఇద్దరి మధ్య ఉన్న అంతర్గత పంచాయితీ ఒక కొలిక్కి వచ్చి, ఇది రాజకీయంగా ఒక సానుకూల సంకేతం అయ్యే అవకాశం ఉందని చర్చించుకుంటున్నారు. ఏదేమైనా, ఒక కుటుంబంలో విషాదం చోటుచేసుకున్నప్పుడు రాజకీయ విభేదాలను పక్కన పెట్టి మానవత్వాన్ని ప్రదర్శించడం అనేది ఈ తాజా పరిణామం ద్వారా స్పష్టమైంది.
