AP News: కల్లూరుపల్లిలో ఇటీవల జరిగిన పెంచలయ్య హత్య కేసు రాష్ట్రవ్యాప్తంగా సంచలనం సృష్టించింది. ఈ దారుణానికి సంబంధించి పోలీసులు కీలక పురోగతి సాధించారు. ఈ కేసులో ప్రధాన నిందితురాలుగా భావిస్తున్న ‘లేడీ డాన్’గా పేరుపొందిన అరవ కామాక్షమ్మతో పాటు ఆమె అనుచరులు మొత్తం ఏడుగురిని అరెస్టు చేసినట్లు డీఎస్పీ ఘట్టమనేని శ్రీనివాసరావు వెల్లడించారు. ఈ నెల 28వ తేదీన ఆర్డీటీ కాలనీకి చెందిన 38 ఏళ్ల కె. పెంచలయ్యను అత్యంత కిరాతకంగా కత్తులతో పొడిచి హత్య చేశారు.
నేర చరిత్రే హత్యకు కారణం
పోలీసులు అందించిన వివరాల ప్రకారం, హత్యకు వ్యక్తిగత కక్షలే ప్రధాన కారణం. చనిపోయిన పెంచలయ్యకు సమాజంపై బాధ్యత ఎక్కువ. ఆయన నివాసం ఉండే ఆర్డీటీ కాలనీలో నేర చరిత్ర ఉన్నవారు ఉండకూడదని గట్టిగా నిబంధన పెట్టారు. అయితే, ప్రధాన నిందితురాలు కామాక్షమ్మ తన అనుచరులతో కలిసి అదే ప్రాంతంలో అక్రమ కార్యకలాపాలు, నేరాలను కొనసాగిస్తుండేది. ఈ విషయంపై పెంచలయ్య తరచుగా అడ్డుకోవడంతో, అతనిపై కామాక్షమ్మ ఆమె గ్యాంగ్కు తీవ్రమైన కోపం పెరిగింది. ఇదే కోపంతో వారు పక్కా ప్రణాళికతో పెంచలయ్యను కత్తులతో దాడి చేసి చంపేశారు.
Also Read: Telangana: మా ఓటు అమ్మబడదు.. సిద్దిపేట యువత వినూత్న ప్రచారం!
ఇంట్లో భారీగా గంజాయి స్వాధీనం
పెంచలయ్య హత్య కేసులో కామాక్షమ్మను అరెస్టు చేసిన తర్వాత, పోలీసులు ఆమె ఇంట్లో సోదాలు నిర్వహించారు. ఈ తనిఖీల్లో సుమారు 25 కిలోల గంజాయిని స్వాధీనం చేసుకున్నారు. దీంతో, కామాక్షమ్మపై హత్య కేసుతో పాటు గంజాయి అక్రమ రవాణా కేసు కూడా నమోదు చేశారు. అదనంగా, ఈ నేరాలకు సంబంధించిన కొన్ని ముఖ్యమైన పత్రాలను కూడా స్వాధీనం చేసుకున్నట్లు డీఎస్పీ తెలిపారు.
మొత్తం 14 మంది నిందితులు
ఈ కేసులో మొత్తం 14 మంది నిందితులు ఉన్నట్లు పోలీసులు గుర్తించారు. ప్రస్తుతం అరెస్టయిన ఏడుగురితో పాటు, వారి వద్ద నుంచి హత్యకు ఉపయోగించిన ఏడు కత్తులు మూడు బైకులను స్వాధీనం చేసుకున్నారు. కాగా, ఈ ఘటన తర్వాత పరారీలో ఉన్న ఐదుగురు నిందితుల కోసం పోలీసులు ప్రత్యేక బృందాలను ఏర్పాటు చేసి గాలిస్తున్నారు. మరోవైపు, ఈ కేసులో నిందితుల్లో ఒకరైన కామాక్షమ్మ సోదరుడు జేమ్స్ ప్రస్తుతం ఆసుపత్రిలో చికిత్స పొందుతున్నట్లు సమాచారం. ఈ కేసు దర్యాప్తును పోలీసులు వేగవంతం చేశారు.