PM Modi: ప్రధానమంత్రి నరేంద్ర మోదీ గుజరాత్‌లోని భావ్‌నగర్‌లో రోడ్‌షో చేసి, రూ.34,200 కోట్ల విలువైన అభివృద్ధి ప్రాజెక్టులను ప్రారంబించారు. గాంధీ మైదాన్‌లో జరిగిన బహిరంగ సభలో మాట్లాడుతూ, దేశానికి అతిపెద్ద శత్రువు ఇతర దేశాలపై ఆధారపడటమేనని కీలక వ్యాఖ్యలు చేశారు. ఇటీవల అమెరికా హెచ్-1బీ వీసా దరఖాస్తు రుసుమును లక్ష డాలర్లకు పెంచిన నేపథ్యంలో ఆయన మాటలు ప్రత్యేక ఆకర్షణ సంతరించుకున్నాయి. ఈ చర్య భారతీయ ఐటీ కార్మికులపై ప్రభావం చూపుతుందని నిపుణులు చెబుతున్నారు.
ప్రపంచంలో మనకు పెద్ద శత్రువులు ఎవరూ లేరని, కానీ విదేశాలపై ఎక్కువ ఆధారపడితే మన ఆత్మగౌరవం దెబ్బతింటుందని మోదీ స్పష్టం చేశారు. ఆత్మనిర్భర్ భారత్ కోసం మనకు మరో మార్గం లేదు. 140 కోట్ల మంది భారతీయులు ఐక్యంగా ‘చిప్‌హో యా షిప్‌హో, బనానా హై భారత్ మేన్’ అనే సంకల్పం తీసుకోవాలి. విదేశాలపై ఆధారపడటమే మన అతి పెద్ద శత్రువు. మనమంతా కలిసి దీన్ని ఓడించాలి అని ఆయన పిలుపునిచ్చారు. ఈ మాటలు అమెరికాలో ట్రంప్ ప్రభుత్వం హెచ్-1బీ వీసా రుసుము పెంపును ఉద్దేశించినట్లు విశ్లేషకులు అంచనా వేస్తున్నారు.
హెచ్-1బీ వీసా అంటే, అమెరికాలోని టెక్ కంపెనీలు విదేశీ నైపుణ్య కార్మికులను తీసుకోవడానికి ఉపయోగపడే ప్రత్యేక వీసా. 2025 ఆర్థిక సంవత్సరంలో భారతీయులకు 78% వీసాలు (సుమారు 2 లక్షలు) ఇవ్వబడ్డాయి. కానీ, ట్రంప్ శనివారం సంతకం చేసిన ప్రకటన ప్రకారం, దరఖాస్తు రుసుము ఇప్పటి $215 నుంచి $780 వరకు ఉన్నదానికి జోడించి $1,00,000కు పెంచారు. ఇది అమెజాన్, మైక్రోసాఫ్ట్, మెటా వంటి కంపెనీలపై భారం పడుతుందని, భారతీయ ఐటీ రంగానికి $10 బిలియన్ల నష్టం కలిగిస్తుందని నిపుణులు అంచనా వేస్తున్నారు. ఈ నిర్ణయం ట్రంప్ మద్దతుదారుల అభిప్రాయాలకు దూరంగా, కానీ ‘అమెరికా ఫస్ట్’ విధానానికి అనుగుణంగా తీసుకున్నట్లు తెలుస్తోంది.
Also Read: Kavita: కాంగ్రెస్ లో చేరడం పై స్పందించన కవిత
మోదీ మాటల్లో, విదేశాలపై ఆధారపడటం దేశ అభివృద్ధిని ప్రమాదంలోకి నెట్టుతుందని, ప్రపంచ శాంతి కోసం భారత్ ఆత్మనిర్భర్‌గా మారాలని చెప్పారు. మనం కొన్నది స్వదేశీగా, అమ్మేది స్వదేశీగా ఉండాలి. దుకాణదారులు తమ షాపుల్లో ‘స్వదేశీ’ పోస్టర్ పెట్టి గర్వంగా చెప్పుకోవాలి అని సూచించారు. ఈ సందర్భంగా, షిప్పింగ్ రంగంలోని ఆధారాలను విమర్శించారు. 50 ఏళ్ల క్రితం భారత వాణిజ్యంలో 40% స్వదేశీ నౌకలపై ఆధారపడేదని, కానీ కాంగ్రెస్ పాలనలో అది 5%కి తగ్గిందని ఆరోపించారు. ఇప్పుడు 90-95% విదేశీ నౌకలపై ఆధారపడి, ఏటా రూ.6 లక్షల కోట్ల అద్దెలు చెల్లిస్తున్నామని, ఇది రక్షణ బడ్జెట్ కంటే ఎక్కువని చెప్పారు. కాంగ్రెస్ ప్రభుత్వాలు స్వదేశీ నౌకల తయారీని విస్మరించి, విదేశీలకు అద్దెలు చెల్లించడానికే ప్రాధాన్యత ఇచ్చాయి అని విమర్శించారు.
భావ్‌నగర్‌లో ప్రారంభమైన ప్రాజెక్టులు షిప్ బిల్డింగ్, పోర్ట్ అభివృద్ధి, ఇతర మెరీన్ రంగాలకు సంబంధించినవి. ఈ ప్రాజెక్టులు 50,000 కొత్త ఉద్యోగాలను సృష్టిస్తాయని, గుజరాత్‌ను మెరీన్ హబ్‌గా మారుస్తాయని అధికారులు తెలిపారు. మోదీ ప్రసంగం దేశవ్యాప్తంగా ‘వరల్డ్ ఫ్రెండ్’ (విశ్వబంధు) స్ఫూర్తిని ప్రచారం చేస్తోందని, కానీ హెచ్-1బీ రుసుము పెంపుపై విపక్షాలు ప్రభుత్వాన్ని విమర్శిస్తున్నాయి. కాంగ్రెస్ నాయకుడు రాహుల్ గాంధీ మోదీని ‘బలహీన ప్రధాని’ అని పిలుస్తూ, ట్రంప్‌తో మాట్లాడి భారతీయుల హక్కులు కాపాడాలని డిమాండ్ చేశారు. ఈ ప్రసంగం భారత్-అమెరికా సంబంధాల్లో కొత్త చర్చను రేకెత్తించింది. ఆత్మనిర్భర్ భారత్ విజన్‌తో మోదీ ప్రభుత్వం ఐటీ, షిప్పింగ్ రంగాల్లో స్వదేశీ ప్రోత్సాహాన్ని పెంచాలని, యువతకు మరిన్ని అవకాశాలు కల్పించాలని నిపుణులు సూచిస్తున్నారు.