Pawan Kalyan: ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ మరోసారి తన గొప్ప మనసును చాటుకున్నారు. కేవలం మాటలతోనే కాకుండా చేతలతో జంతువుల పట్ల తనకున్న ప్రేమను నిరూపించుకున్నారు. విశాఖపట్నం పర్యటనలో భాగంగా ఆయన ఇందిరా గాంధీ జంతు ప్రదర్శనశాలను సందర్శించారు. అక్కడ అరుదైన జంతువులను చూస్తూ, వాటి వివరాలను అధికారులను అడిగి తెలుసుకున్నారు. జంతువుల సంరక్షణ కోసం ప్రతి ఒక్కరూ బాధ్యతగా ముందుకు రావాలని ఈ సందర్భంగా ఆయన పిలుపునిచ్చారు.
ఈ పర్యటనలో పవన్ కల్యాణ్ ఒక కీలక నిర్ణయం తీసుకున్నారు. తన తల్లి అంజనాదేవి గారి పుట్టినరోజు సందర్భంగా, ఆమెపై ఉన్న గౌరవంతో జూలోని రెండు జిరాఫీలను దత్తత తీసుకున్నారు. ఆ జిరాఫీల పోషణకు, సంరక్షణకు అయ్యే ఖర్చును తానే భరిస్తానని ప్రకటించారు. ఒక తల్లిగా తనను పెంచి పెద్ద చేసిన మాతృమూర్తి పేరు మీద, మూగ జీవాల ప్రాణాలను కాపాడే బాధ్యత తీసుకోవడం అందరినీ ఆకట్టుకుంటోంది. అమ్మ పుట్టినరోజున ఇలాంటి మంచి పని చేయడం నాకు ఎంతో సంతోషాన్నిస్తోంది అని ఆయన భావోద్వేగంగా మాట్లాడారు.
జూ సందర్శనలో భాగంగా పవన్ కల్యాణ్ ఎలుగుబంట్ల కోసం ప్రత్యేకంగా నిర్మించిన కొత్త ఎన్క్లోజర్లను ప్రారంభించారు. అడవి జంతువులైన పులులు, సింహాలు, నీటి ఏనుగుల వద్దకు వెళ్లి వాటికి ఆహారాన్ని అందించారు. అనంతరం కంబాలకొండ ఎకో పార్క్లో ‘నగర వనం’ను ప్రారంభించి, అక్కడి ప్రకృతి అందాలను తిలకించారు. అడవులను, వన్యప్రాణులను కాపాడుకోవడం మనందరి కర్తవ్యమని, ముఖ్యంగా కార్పొరేట్ సంస్థలు తమవంతు సాయంగా జంతువులను దత్తత తీసుకోవాలని ఆయన కోరారు.
పవన్ కల్యాణ్ తీసుకున్న ఈ నిర్ణయం సోషల్ మీడియాలో వైరల్గా మారింది. రాజకీయ నాయకుడిగా ఎంత బిజీగా ఉన్నా, పర్యావరణం మరియు జంతువుల పట్ల ఆయన చూపిస్తున్న శ్రద్ధ పట్ల నెటిజన్లు ప్రశంసలు కురిపిస్తున్నారు. ఒక కొడుకుగా తల్లికి ఆయన ఇచ్చిన ఈ ‘బహుమతి’ నిజంగా అరుదైనదని అందరూ కొనియాడుతున్నారు.