Crude Oil Price: అంతర్జాతీయ మార్కెట్లో ముడిచమురు ధరలు ఒక్కసారిగా కుప్పకూలాయి. అమెరికా అధ్యక్షుడు డొనాల్డ్ ట్రంప్, ఇరాన్పై జరపాల్సిన దాడులను రెండు వారాల పాటు వాయిదా వేస్తున్నట్లు ప్రకటించడంతో బుధవారం ఉదయం ఆసియా ట్రేడింగ్లో చమురు ధరలు భారీగా తగ్గుముఖం పట్టాయి. ప్రధానంగా అమెరికా ముడిచమురు (WTI Crude) ధర సుమారు 13 శాతం మేర పడిపోగా, బ్రెంట్ క్రూడ్ బ్యారెల్ ధర 95.06 డాలర్లకు చేరుకుంది. యుద్ధ భయాలు తొలగడంతో అంతర్జాతీయ స్టాక్ మార్కెట్లు లాభాల్లోకి మళ్లాయి.
ట్రంప్ షరతు.. ఇరాన్ అంగీకారం
గత కొద్ది రోజులుగా ఇరాన్లోని పౌర మౌలిక సదుపాయాలపై బాంబు దాడులు చేస్తామని హెచ్చరిస్తూ వచ్చిన ట్రంప్, చివరి నిమిషంలో తన నిర్ణయాన్ని మార్చుకున్నారు. తన ‘ట్రూత్ సోషల్’ ఖాతాలో స్పందిస్తూ, ఇది ఇరుపక్షాలకు వర్తించే ‘డబుల్ సైడెడ్’ కాల్పుల విరమణ అని ఆయన పేర్కొన్నారు. అయితే, ఈ శాంతి ఒప్పందానికి ఆయన ఒక కీలక షరతు విధించారు. ప్రపంచ చమురు రవాణాకు అత్యంత కీలకమైన ‘హోర్ముజ్ జలసంధి’ని వెంటనే మరియు సురక్షితంగా పునరుద్ధరించాలని కోరారు. ఇందుకు ఇరాన్ సానుకూలంగా స్పందించి, మార్గాన్ని తెరిచేందుకు అంగీకరించడంతో మార్కెట్లలో ఉత్సాహం నెలకొంది.
పుంజుకున్న స్టాక్ మార్కెట్లు
చమురు ధరలు తగ్గడంతో అమెరికా మార్కెట్లు భారీ లాభాలను నమోదు చేశాయి. ముఖ్యంగా డౌ ఫ్యూచర్స్ 900 పాయింట్ల మేర ఎగబాకింది. యుద్ధం కారణంగా సరఫరా నిలిచిపోతుందేమోనన్న భయంతో అల్లాడుతున్న ఇన్వెస్టర్లకు ఈ ‘సీజ్ఫైర్’ వార్త పెద్ద ఊరటనిచ్చింది. చమురు సరఫరా క్రమబద్ధీకరించబడటం వల్ల రాబోయే రోజుల్లో రవాణా ఖర్చులు తగ్గి, ద్రవ్యోల్బణం అదుపులోకి వస్తుందని ఆర్థిక నిపుణులు భావిస్తున్నారు.
నిపుణుల హెచ్చరిక
ధరలు తగ్గినప్పటికీ, పరిస్థితులు అంత త్వరగా సాధారణ స్థితికి వస్తాయని తాము భావించడం లేదని వెస్ట్పాక్ బ్యాంకింగ్ కార్ప్ కమోడిటీ రీసెర్చ్ హెడ్ రాబర్ట్ రెన్నీ అభిప్రాయపడ్డారు. కేవలం రెండు వారాల విరామం మాత్రమే కాకుండా, శాశ్వత ఒప్పందం కుదిరినప్పుడే మార్కెట్లలో స్థిరత్వం ఏర్పడుతుందని ఆయన పేర్కొన్నారు. ఇరాన్ తన హామీని ఎంతవరకు నిలబెట్టుకుంటుందనే దానిపైనే చమురు ధరల భవిష్యత్తు ఆధారపడి ఉంటుంది.