Pawan Kalyan: ఆంధ్రప్రదేశ్ ఉప ముఖ్యమంత్రి మరియు జనసేన పార్టీ అధ్యక్షుడు పవన్ కల్యాణ్ కుటుంబంపై సోషల్ మీడియాలో అభ్యంతరకరమైన వ్యాఖ్యలు చేసిన ముగ్గురు యువకులను పోలీసులు అరెస్ట్ చేశారు. ఈ ఘటన రాష్ట్రవ్యాప్తంగా తీవ్ర చర్చకు దారితీసింది.
ఇటీవలి రోజుల్లో ప్రముఖ నేతలు, సెలెబ్రిటీలు, వారి కుటుంబాలను టార్గెట్ చేస్తూ సోషల్ మీడియాలో అసభ్య పోస్టులు పెరుగుతున్నాయి. ఈ నేపథ్యంలోనే ఏపీ సైబర్ క్రైమ్ విభాగం సీరియస్‌గా వ్యవహరిస్తోంది. తాజాగా గుంటూరులో కేసు నమోదు చేసి, కర్నూలు పోలీసులు గూడూరులో ముగ్గురు యువకులను అదుపులోకి తీసుకున్నారు.
పవన్ కుమారుడిపై కామెంట్లు… విచారణకు దారితీసిన వివాదం
కొద్ది రోజుల క్రితం సింగపూర్‌లోని ఓ స్కూల్‌లో అగ్నిప్రమాదం జరిగింది. ఈ ప్రమాదంలో పవన్ కల్యాణ్ కుమారుడు మార్క్ శంకర్ పవనోచ్ స్వల్ప గాయాలతో బయటపడ్డారు. ఈ సమయంలో పవన్ కుటుంబం ఆందోళనలో ఉండగా, కొంతమంది సోషల్ మీడియా వేదికగా అభ్యంతరకరమైన వ్యాఖ్యలు చేస్తూ పోస్టులు పెట్టారు. ప్రత్యేకంగా పవన్ భార్య అన్నా కొణిదెల మరియు కుమారుడిని టార్గెట్ చేస్తూ ట్రోలింగ్ జరిగినట్లు సమాచారం.
ఇద్దరు సెల్‌ఫోన్ షాప్ ఉద్యోగులు… మూడవ వ్యక్తి వివరాలు వెతుకుతున్న పోలీసులు
అరెస్టైన ముగ్గురిలో ఫయాజ్, పుష్పరాజ్ అనే ఇద్దరు వ్యక్తులు సెల్‌ఫోన్ షాప్‌లో పనిచేస్తున్నట్లు గుర్తించారు. మూడవ వ్యక్తిని ఉదయ్ కిరణ్‌గా గుర్తించారు. ఈ ముగ్గురు ఎక్స్ (పూర్వపు ట్విట్టర్) లో అభ్యంతరకర పోస్టులు పెట్టినట్లు పోలీసులు ధ్రువీకరించారు.
ఇది కిడా చదవండి: Crime News: కంప్లైంట్ ఇచ్చింది అని.. యువతిని సజీవ దహనం చేసిన తాగుబోతు
అదనంగా, వీరికి ఏదైనా రాజకీయ పార్టీలు లేదా హీరో అభిమాన సంఘాలతో సంబంధం ఉందా? లేదా ఎవరైనా వారిని ప్రేరేపించారా? అన్న కోణాల్లో విచారణ కొనసాగుతోంది. వీరి గత చరిత్రను కూడా పోలీసులు పరిశీలిస్తున్నారు.
సామాజిక మాధ్యమాల్లో అవగాహన పెంచాల్సిన అవసరం
ఈ అరెస్టులు తర్వాత ఏపీ పోలీసులు కఠిన హెచ్చరికలు జారీ చేశారు. ప్రజా ప్రతినిధుల కుటుంబాలపై వ్యక్తిగత దూషణలు చేస్తే కఠిన చర్యలు తీసుకుంటామని స్పష్టం చేశారు. వ్యక్తిగత జీవితాలను గౌరవించాల్సిన బాధ్యత ప్రతి నెటిజన్‌పై ఉందని పోలీసు శాఖ పేర్కొంది.