War 2: యంగ్ టైగర్ ఎన్టీఆర్, బాలీవుడ్ స్టార్ హృతిక్ రోషన్ కలిసి నటిస్తున్న భారీ బడ్జెట్ చిత్రం ‘వార్ 2’ ప్రచార కార్యక్రమాలు ఊపందుకున్నాయి. ఈ చిత్రం ఆగస్టు 14న ప్రపంచవ్యాప్తంగా థియేటర్లలో విడుదల కానుంది. ఈ నేపథ్యంలో, సినిమాపై అంచనాలను మరింత పెంచుతూ చిత్ర యూనిట్ ‘సలామ్ అనాలి’ అనే పాటకు సంబంధించిన టీజర్‌ను విడుదల చేసింది. ఈ టీజర్‌లో ఎన్టీఆర్, హృతిక్ రోషన్ ఇద్దరూ తమ డ్యాన్స్ నైపుణ్యంతో అభిమానులను అలరించారు.
నిర్మాణ సంస్థ యష్ రాజ్ ఫిల్మ్స్ గత కొద్ది రోజులుగా ప్రమోషన్స్ విషయంలో వెనుకబడి ఉందంటూ ఎన్టీఆర్ అభిమానుల నుంచి అసంతృప్తి వ్యక్తమైంది. దీనిని గమనించిన చిత్రబృందం, అభిమానుల నిరీక్షణకు ముగింపు పలుకుతూ ఈ బ్లాస్టింగ్ అప్‌డేట్‌ను ఇచ్చింది. ఈ పాట టీజర్ విడుదలైనప్పటి నుంచి సోషల్ మీడియాలో ట్రెండింగ్‌లో ఉంది. ఈ చిత్రంలో ఎన్టీఆర్, హృతిక్ రోషన్ ఇద్దరూ కలిసి నటించిన డ్యాన్స్ నంబర్ ఉంటుందని చాలా కాలంగా వార్తలు వినిపిస్తున్నాయి. ఆ వార్తలను నిజం చేస్తూ, ‘దునియా సలామ్ అనాలి’ అంటూ ఈ ఇద్దరు డ్యాన్స్ స్టార్లు హుషారుగా స్టెప్పులేస్తున్న దృశ్యాలు టీజర్‌లో ఆకట్టుకున్నాయి.
Also Read: Coolie: ‘కూలీ’ టాప్ రికార్డ్.. యూఎస్‌లో సంచలనం!
అయితే, చిత్రబృందం పూర్తి పాటను విడుదల చేయడం లేదు. అభిమానులు ఆ పాటను థియేటర్లలో, 70MM స్క్రీన్‌పై చూసి ఆస్వాదించాలని కోరింది. ఇద్దరు అగ్రశ్రేణి డ్యాన్స్ స్టార్లు ఒకే తెరపై నృత్యం చేస్తుంటే, అది ప్రేక్షకులకు ఒక పండుగలా ఉంటుందని మేకర్స్ భావిస్తున్నారు. కియారా అద్వానీ హీరోయిన్‌గా నటించిన ఈ చిత్రానికి అయాన్ ముఖర్జీ దర్శకత్వం వహించారు. ఈ భారీ యాక్షన్ చిత్రాన్ని హిందీ, తెలుగు, తమిళ భాషల్లో ఏడు రోజుల్లో విడుదల చేయనున్నారు.