Water Supply: హైదరాబాద్ నగరంలోని పలు ప్రాంతాల ప్రజలకు జలమండలి (HMWSSB) కీలక సూచన చేసింది. మంజీరా ఫేజ్-3 సరఫరా వ్యవస్థలో భాగంగా పెద్దాపూర్ పంప్ హౌస్లో అత్యవసర మరమ్మతులు చేపడుతున్నట్లు అధికారులు ప్రకటించారు. ఈ పనుల కారణంగా శనివారం, ఆదివారం నగరంలోని కొన్ని కీలక ప్రాంతాల్లో నీటి సరఫరాకు అంతరాయం కలగనుంది.
ఎందుకు నిలిపివేస్తున్నారు?
పెద్దాపూర్ పంప్ హౌస్లో సుమారు 35 ఏళ్ల క్రితం ఏర్పాటు చేసిన పాత ఎలక్ట్రికల్ ప్యానెల్స్ను తొలగించి, వాటి స్థానంలో అత్యాధునిక హై టెన్షన్ ప్యానెల్స్ను అమర్చనున్నారు. వీటితో పాటు పెద్దాపూర్ నుండి సింగాపూర్ వరకు ఉన్న భారీ పైప్లైన్లకు సంబంధించిన ఎయిర్ వాల్వ్లు, ఎయిర్ వెంట్స్ను కూడా మారుస్తున్నారు. భవిష్యత్తులో నీటి పంపింగ్ వ్యవస్థలో ఎలాంటి ఇబ్బందులు తలెత్తకుండా, పంపింగ్ను మరింత మెరుగుపరిచేందుకే ఈ చర్యలు తీసుకుంటున్నట్లు బోర్డు వివరించింది.
సమయం మరియు ప్రభావిత ప్రాంతాలు
ఈ మరమ్మతు పనులు మార్చి 7, శనివారం ఉదయం 8 గంటల నుండి మార్చి 8, ఆదివారం రాత్రి 8 గంటల వరకు అంటే సుమారు 36 గంటల పాటు కొనసాగనున్నాయి. ఈ సమయంలో ఈ క్రింది ప్రాంతాల్లో నీటి సరఫరా ఉండదు:
* మణికొండ
* కోకాపేట్
* నార్సింగి
* మంచిరేవుల
* షేక్పేట్
గమనిక: భోజగుట్ట ప్రాంతంలో మాత్రం చాలా తక్కువ ప్రెజర్తో నీరు వస్తుంది.
ముందస్తు జాగ్రత్తలు తప్పనిసరి
నీటి సరఫరా నిలిచిపోయే ప్రాంతాల్లోని ప్రజలు తమకు అవసరమైన నీటిని ముందే నిల్వ చేసుకోవాలని అధికారులు సూచించారు. మరమ్మతులు పూర్తయిన వెంటనే యధావిధిగా నీటిని విడుదల చేస్తామని హామీ ఇచ్చారు. ఏదైనా అత్యవసర పరిస్థితి ఉంటే స్థానిక జలమండలి కార్యాలయాన్ని సంప్రదించాలని, వినియోగదారులు సహకరించాలని అధికారులు విజ్ఞప్తి చేశారు.