Budget 2025: కొత్త బడ్జెట్ రేపటి నుండి, ఏప్రిల్ 1, 2025 నుండి అమల్లోకి వస్తుంది. అంటే, ఫిబ్రవరి 1న బడ్జెట్‌ను ప్రవేశపెట్టినప్పుడు ప్రభుత్వం చేసిన ప్రకటనలను అమలు చేయడం ప్రారంభం అవుతుంది. అయితే, పథకాల ప్రయోజనాలు ఎప్పుడు లభిస్తాయనేది పథకం రకం.. అమలు ప్రక్రియపై ఆధారపడి ఉంటుంది.
ఆదాయపు పన్ను మినహాయింపు లేదా సబ్సిడీలు వంటి ప్రయోజనాలు ఆర్థిక సంవత్సరంతో ముడిపడి ఉన్నందున, ఏప్రిల్ 1, 2025 నుండి వర్తిస్తాయి. అదే సమయంలో, మౌలిక సదుపాయాలు.. అభివృద్ధి ప్రాజెక్టులు, సామాజిక సంక్షేమ పథకాల ప్రయోజనాలను పొందడానికి సమయం పడుతుంది, ఎందుకంటే వాటిని అమలు చేయడం కోసం సుదీర్ఘమైన ప్రక్రియ ఉంటుంది. రేపటి నుండి అమల్లోకి వచ్చే 6 మార్పులు…
1. పన్ను శ్లాబ్‌లో మార్పు: 20 నుండి 24 లక్షల ఆదాయం కోసం కొత్త శ్లాబ్
మారింది ఇదే: కొత్త పన్ను విధానం ప్రకారం, ఇప్పుడు రూ. 12 లక్షల వరకు ఆదాయంపై పన్ను ఉండదు. జీతం పొందే వారికి ఈ మినహాయింపు రూ. 75,000 ప్రామాణిక మినహాయింపుతో రూ. 12.75 లక్షలకు పెరుగుతుంది. కొత్త పన్ను విధానంలో రూ. 20 నుండి 24 లక్షల ఆదాయం ఉన్నవారికి 25% పన్ను కొత్త శ్లాబ్ కూడా ఉంది.
దీని ప్రభావం ఇలా: గతంలో రూ. 15 లక్షల కంటే ఎక్కువ ఆదాయంపై గరిష్టంగా 30% రేటు వర్తించేది. కానీ, ఇప్పుడు ఈ పరిమితిని రూ. 24 లక్షలకు పెంచారు. ఇది మధ్య, ఉన్నత-మధ్యతరగతి ఆదాయ వర్గాలకు పన్నులను ఆదా చేయడానికి సహాయపడుతుంది.
2. TDS పరిమితి పెంపు..
మారింది ఇదే: కొన్ని చెల్లింపులపై TDS (మూలం వద్ద పన్ను మినహాయింపు) పరిమితిని పెంచారు…
అద్దె ఆదాయంపై TDS మినహాయింపు రెట్టింపు: అద్దె ఆదాయంపై TDS పరిమితి ₹2.4 లక్షల నుండి ₹6 లక్షలకు పెరిగింది.
సీనియర్ సిటిజన్లకు వడ్డీ ఆదాయంపై మినహాయింపు రెట్టింపు: బ్యాంక్ ఎఫ్‌డిల నుండి వడ్డీ ఆదాయం పొందుతున్న సీనియర్ సిటిజన్లకు టిడిఎస్ పరిమితిని ₹50 వేల నుండి ₹1 లక్షకు పెంచారు.
వృత్తిపరమైన సేవలపై TDS పరిమితి పెంపు: వృత్తిపరమైన సేవలపై TDS పరిమితి ఇప్పుడు రూ.30,000 నుండి రూ.50,000కి పెరిగింది.
దీని ప్రభావం ఇలా: ఇది తక్కువ ఆదాయం ఉన్న వ్యక్తులపై TDS భారాన్ని తగ్గిస్తుంది మరియు నగదు ప్రవాహాన్ని మెరుగుపరుస్తుంది.
3. TCS పరిమితి పెంపు..
మారింది ఇదే: విదేశాలలో చదువుల కోసం డబ్బు పంపడంపై మూలం వద్ద పన్ను వసూలు (TCS) పరిమితి ఇప్పుడు రూ.7 లక్షల నుండి రూ.10 లక్షలకు పెరిగింది. అయితే, బ్యాంకు వంటి ఏదైనా ఆర్థిక సంస్థ నుండి డబ్బు రుణంగా తీసుకుంటే, TCS విధించరు.
దీని ప్రభావం ఇలా: TCS తొలగింపు విద్యార్థులకు, వారి కుటుంబాలకు ప్రయోజనం చేకూరుస్తుంది. గతంలో, రూ. 7 లక్షల కంటే ఎక్కువ మొత్తాలపై 0.5%-5% TCS కట్ చేసేవారు. దీని వల్ల బదిలీ ప్రక్రియ కాస్తంత గందరగోళంగా ఉండేది. ఇప్పుడు మొత్తం రూ. 10 లక్షల వరకు ఉన్న మొత్తం డబ్బు అవతలి వైపుకు పూర్తిగా చేరుతుంది.
4. అప్ డేటెడ్ రిటర్న్స్ కోసం ఎక్కువ సమయం..
మారింది ఇదే: ఇప్పుడు పన్ను చెల్లింపుదారులు అసెస్‌మెంట్ సంవత్సరం చివరి నుండి 24 నెలలకు బదులుగా 48 నెలల వరకు అప్ డేటెడ్ రిటర్న్‌లను దాఖలు చేయగలరు. దీనికి కొన్ని షరతులు ఉన్నాయి…
24 నుండి 36 నెలల మధ్య దాఖలు చేసిన రిటర్న్‌లపై 60% అదనపు పన్ను.
36 నుండి 48 నెలల మధ్య దాఖలు చేసిన రిటర్న్‌లపై 70% అదనపు పన్ను.
దీని ప్రభావం ఇలా: దీనివల్ల పన్ను చెల్లింపుదారులు తమ తప్పులను సరిదిద్దుకోవడానికి ఎక్కువ సమయం లభిస్తుంది. స్వచ్ఛంద సమ్మతి కూడా పెరుగుతుంది. అంటే, ఒక వ్యక్తి లేదా సంస్థ తన స్వంత ఇష్టానుసారం నియమాలు, చట్టాలను పాటిస్తుంది.
5. ULIP పై మూలధన లాభాల పన్ను..
మారింది ఇదే: ULIP అంటే యూనిట్ లింక్డ్ ఇన్సూరెన్స్ ప్లాన్ ప్రీమియం సంవత్సరానికి రూ. 2.5 లక్షల కంటే ఎక్కువగా ఉంటే, దానిని మూలధన ఆస్తిగా పరిగణిస్తారు. అటువంటి ULIP ని తిరిగి పొందడం ద్వారా వచ్చే ఏదైనా లాభం మూలధన లాభాల పన్నుకు లోబడి ఉంటుంది. ULIP అనేది ప్రీమియంలో కొంత భాగాన్ని స్టాక్ మార్కెట్లో పెట్టుబడి పెట్టే ఒక ఉత్పత్తి.
12 నెలలకు మించి ఉంచితే, దానిపై 12.5% దీర్ఘకాలిక మూలధన లాభం (LTCG) పన్ను విధిస్తారు.
12 నెలల కన్నా తక్కువ కాలం ఉంచితే, దానిపై స్వల్పకాలిక మూలధన లాభం (STCG) గా 20% పన్ను విధిస్తారు.
దీని ప్రభావం ఇలా: అధిక ప్రీమియంలతో ULIPలలో పెట్టుబడి పెట్టేవారు ఇప్పుడు పన్ను చెల్లించాల్సి ఉంటుంది. అధిక ఆదాయపు పన్ను చెల్లింపుదారులు ULIP లను పన్ను రహిత పెట్టుబడి సాధనంగా ఉపయోగించకుండా నిరోధించడానికి ప్రభుత్వం ఈ మార్పులను చేసింది. ULIP ప్రీమియంలో ఎక్కువ భాగం స్టాక్ మార్కెట్లో పెట్టుబడి పెట్టబడుతుంది. కాబట్టి ప్రభుత్వం సాంప్రదాయ బీమా లాగా పన్ను మినహాయింపు పొందకూడదని వాదించింది.
6. చౌక-ఖరీదైనది..
మారింది ఇదే: ఫిబ్రవరిలో సమర్పించిన బడ్జెట్‌లో ప్రభుత్వం కొన్ని ఉత్పత్తులపై కస్టమ్స్ సుంకాన్ని తగ్గించి, మరికొన్నింటిపై పెంచింది. ఇది దాదాపు 150-200 ఉత్పత్తులపై ప్రభావం చూపుతుంది. సాధారణంగా, కస్టమ్ డ్యూటీలో మార్పులు ఆర్థిక సంవత్సరం ప్రారంభం నుండి అంటే ఏప్రిల్ 1, 2025 నుండి అమల్లోకి వస్తాయి.
అయితే, కొన్ని మార్పుల అమలు తేదీలు సెంట్రల్ బోర్డ్ ఆఫ్ ఇన్‌డైరెక్ట్ టాక్సెస్ అండ్ కస్టమ్స్ (CBIC) నోటిఫికేషన్‌పై ఆధారపడి ఉంటాయి. ఉదాహరణకు, గత బడ్జెట్‌లో కొన్ని కస్టమ్స్ సుంకం మార్పులు (మొబైల్ ఫోన్లు – విలువైన లోహాలపై వంటివి) జూలై 24, 2024 నుండి అమల్లోకి వచ్చాయి.
దీని ప్రభావం ఇలా: కొన్ని వస్తువులు చౌకగా, మరికొన్ని ఖరీదైనవిగా మారవచ్చు. కస్టమ్ డ్యూటీ పెరుగుదల లేదా తగ్గుదల వస్తువుల ధరలపై పరోక్ష ప్రభావాన్ని చూపుతుంది.
రేపటి నుంచి ధరలు తగ్గే వస్తువులు:
$40,000 కంటే ఎక్కువ ధర కలిగిన లేదా 3,000 cc కంటే ఎక్కువ ఇంజిన్ సామర్థ్యం కలిగిన దిగుమతి చేసుకున్న కార్లు.
1600 సిసికి మించని ఇంజిన్ సామర్థ్యం కలిగిన CBU యూనిట్లుగా దిగుమతి చేసుకున్న మోటార్ సైకిళ్ళు.
36 ప్రాణాలను రక్షించే ఔషధాలపై కస్టమ్స్ సుంకాన్ని తొలగించడం వల్ల క్లిష్టమైన చికిత్స ఖర్చు తగ్గుతుంది.
EVలు చౌకగా ఉండవచ్చు. బ్యాటరీ తయారీకి ఉపయోగించే 35 మూలధన వస్తువులపై ప్రభుత్వం సుంకాన్ని రద్దు చేసింది.
మొబైల్ ఫోన్ బ్యాటరీ ఉత్పత్తికి సంబంధించిన 28 మూలధన వస్తువులను కస్టమ్స్ సుంకం నుండి మినహాయించారు.
ధరలు పెరిగే ఛాన్స్ ఉన్న వస్తువులు:
స్మార్ట్ మీటర్ సోలార్ సెల్స్, దిగుమతి చేసుకున్న పాదరక్షలు, దిగుమతి చేసుకున్న కొవ్వొత్తులు, దిగుమతి చేసుకున్న పడవలు, ఇతర పాత్రలు, PVC ఫ్లెక్స్ ఫిల్మ్‌లు, PVC ఫ్లెక్స్ షీట్లు, PVC ఫ్లెక్స్ బ్యానర్లు, అల్లిక ప్రక్రియతో తయారు చేసిన ఫాబ్రిక్, LCD/LED టీవీలు
బడ్జెట్‌లో ప్రకటించిన పథకాల ప్రయోజనాలు ఎప్పుడు లభిస్తాయి?
రైతులకు నగదు సహాయం, మహిళల కోసం పథకాలు లేదా ఉపాధి పథకాలు వంటి సామాజిక సంక్షేమ పథకాల ప్రయోజనాలు జూన్-జూలై నుండి రావడం ప్రారంభించవచ్చు.
రోడ్లు, రైల్వేలు లేదా పాఠశాలలు-ఆసుపత్రులు వంటి ప్రాజెక్టుల నుండి ప్రయోజనాలను పొందడానికి సమయం పడుతుంది ఎందుకంటే వీటికి ప్రణాళిక, టెండర్లు, నిర్మాణ ప్రక్రియ ఉంటుంది.