Bihar: బీహార్ రాజధాని పాట్నాలో నేపాల్‌కు చెందిన యువతిపై ప్రైవేట్ బస్సులో జరిగిన అత్యాచారం కలకలం రేపింది. పోలీసులు వేగంగా స్పందించి, పరారీలో ఉన్న ఇద్దరు నిందితులను పట్టుకుని కేసును ఛేదించారు.
సెంట్రల్ ఎస్పీ దీక్ష వెల్లడించిన వివరాల ప్రకారం, ఈ ఘటనలో ప్రధాన నిందితుడు కార్తీక్ రాయ్, అతడికి సహకరించిన సునీల్ కుమార్‌ను అరెస్ట్ చేశారు. ఆగస్టు 4న ఈ దారుణం చోటుచేసుకోగా, అనంతరం నిందితులు నగరం విడిచి పారిపోయారు. పశ్చిమ బెంగాల్‌కు పారిపోవాలని ప్రయత్నిస్తున్న కార్తీక్ రాయ్‌ను బరౌనీ సమీపంలో రైల్లో అదుపులోకి తీసుకుని, అతని వద్ద నుంచి బాధితురాలి గుర్తింపు కార్డు, నేపాలీ సిమ్ కార్డు, ఇతర వస్తువులను స్వాధీనం చేసుకున్నారు. కార్తీక్ ఇచ్చిన సమాచారంతో సునీల్ కుమార్‌ను ఔరంగాబాద్‌లో అరెస్ట్ చేశారు.
నమ్మకాన్ని వాడుకున్న నిందితుడు
ముజఫర్‌పూర్‌కు చెందిన బస్సు డ్రైవర్ కార్తీక్ రాయ్‌కి నేపాలీ భాష తెలుసు. ఇప్పటికే వివాహం అయి ఒక కుమారుడికి తండ్రైన అతను, కుటుంబ ఆర్థిక ఒత్తిడితో డబ్బు సంపాదించాలనే ఉద్దేశంతో పనిచేస్తున్నాడు. బాధితురాలు ఆగస్టు 3న సిలిగురి మీదుగా పాట్నాకు చేరుకోగా, పాటలీపుత్ర రైల్వే స్టేషన్‌లో కార్తీక్ పరిచయమయ్యాడు. ఉద్యోగం ఇప్పిస్తానని నమ్మించి, మొదట సునీల్ ఇంటికి, ఆపై బస్సులోకి తీసుకెళ్లి అత్యాచారానికి పాల్పడ్డాడు.
సాక్ష్యాలు చెరిపివేత ప్రయత్నం
నేరం అనంతరం బస్సును శుభ్రం చేసి సాక్ష్యాలను నాశనం చేసేందుకు ప్రయత్నించారు. బాధితురాలి వస్తువులను దోచుకున్న కార్తీక్, వాటిలో కొన్నింటిని కోల్‌కతాలో అమ్మి తిరిగి ముజఫర్‌పూర్‌కు వచ్చాడు. మళ్లీ కోల్‌కతాకు పారిపోవాలని యత్నిస్తున్న సమయంలో పోలీసులకు చిక్కాడు.
ప్రజల సహాయం
గాంధీ మైదాన్ సమీపంలో బాధితురాలు ఏడుస్తూ కనిపించడంతో స్థానిక దుకాణదారులు, గోర్ఖా రెజిమెంట్ జవాన్లు గమనించారు. గోర్ఖా సమాజ్ సమితి అధ్యక్షుడు సూరజ్ థాపాకు సమాచారం అందించగా, ఆయన బాధితురాలిని పోలీసుల వద్దకు తీసుకెళ్లి ఫిర్యాదు సహాయం చేశారు.
ఈ ఘటనలో ఉపయోగించిన బస్సును స్వాధీనం చేసుకున్న పోలీసులు, మరెవరైనా ఈ నేరంలో ప్రమేయం ఉన్నారా అనే దిశగా దర్యాప్తు కొనసాగిస్తున్నారు.