NDA Manifesto: బీహార్ అసెంబ్లీ ఎన్నికలు సమీపిస్తున్న తరుణంలో, రాష్ట్రంలో అధికారంలో ఉన్న ఎన్డీయే (NDA) కూటమి తమ ఎన్నికల మేనిఫెస్టోను (సంకల్ప పత్ర) విడుదల చేసింది. గెలుపే లక్ష్యంగా ప్రజలను ఆకట్టుకునేందుకు ఈ మేనిఫెస్టోలో అనేక కీలకమైన మరియు భారీ హామీలను పొందుపరిచారు.
శుక్రవారం ఉదయం పాట్నాలో జరిగిన సమావేశంలో బీజేపీ జాతీయ అధ్యక్షుడు జేపీ నడ్డా, ముఖ్యమంత్రి నితీశ్‌ కుమార్‌ సంయుక్తంగా ఈ మేనిఫెస్టోను విడుదల చేశారు.
యువత & ఉద్యోగాలు: భారీ హామీలు
వలస కార్మికులు, నిరుద్యోగ యువతను లక్ష్యంగా చేసుకుని ఎన్డీయే కూటమి అత్యంత కీలకమైన హామీలను ఇచ్చింది. కూటమి అధికారంలోకి వస్తే రాష్ట్రంలోని యువతకు కోటి ప్రభుత్వ ఉద్యోగాలు కల్పిస్తామని హామీ ఇచ్చింది. ప్రతి జిల్లాలో మెగా స్కిల్ సెంటర్లను ఏర్పాటు చేసి, బీహార్‌ను ప్రపంచ అభ్యాస కేంద్రంగా మారుస్తామని ప్రకటించింది. ఈబీసీలకు (EBCs) ₹10 లక్షల వరకు ఆర్థిక ప్రోత్సాహకాలు అందిస్తాం అన్నారు. బీహార్ స్పోర్ట్స్ సిటీ డివిజన్లలో క్రీడలకు సెంటర్ ఆఫ్ ఎక్సలెన్స్ ఏర్పాటు చేస్తాం అని మ్యానిఫెస్టోలో హామీ ఇచ్చారు.
మహిళా సాధికారత: లక్షాధికారి లక్ష్యం
మహిళా ఓటర్లను ఆకర్షించేందుకు ప్రత్యేక పథకాలను మేనిఫెస్టోలో చేర్చారు. కోటి మంది మహిళలను ‘లఖ్పతి దీదీలుగా’ (లక్షాధికారులుగా) చేయడమే తమ లక్ష్యమని ప్రకటించింది. మహిళలు వ్యాపారాలు ప్రారంభించేందుకు ₹2 లక్షల వరకు ఆర్థిక సాయం చేస్తామని హామీ ఇచ్చింది.
ఇది కూడా చదవండి: Kathari Couple: చిత్తూరు మేయర్ దంపతుల హత్య కేసు.. పూర్తి వివరాలు
రైతు సంక్షేమం & ఆర్థిక భరోసా
రైతులు మరియు అణగారిన వర్గాలకు ఆర్థిక భరోసా కల్పించే హామీలు:
| పథకం | ప్రస్తుతం | పెంపు/హామీ |
| రైతు పెట్టుబడి సాయం (కిసాన్ సమ్మాన్ నిధి) | ₹6,000 (కేంద్రం) | ₹9,000 (రాష్ట్ర ప్రభుత్వం అదనంగా ₹3,000) |
| మత్స్య కారుల సాయం | ₹4,500 | ₹9,000 కు పెంపు |
| ఎస్సీ విద్యార్థులకు సాయం | – | నెలకు ₹2,000 సాయం |
| పంటలకు హామీ | – | అన్ని పంటలకు ఎంఎస్‌పీ (కనీస మద్దతు ధర) హామీ |
మౌలిక సదుపాయాలు & పారిశ్రామికీకరణ
బీహార్ రాష్ట్రంలో పారిశ్రామిక అభివృద్ధి మరియు మెరుగైన మౌలిక సదుపాయాల కోసం ఈ హామీలు ఇచ్చింది:
ప్రతి జిల్లాలో కర్మాగారాల నిర్మాణం, 10 కొత్త పారిశ్రామిక పార్కుల ఏర్పాటు చేస్తాం. 100 ఎంఎస్ఎంఈ పార్కులు మరియు 50,000కు పైగా కుటీర పరిశ్రమల ఏర్పాటు చేస్తాం. డిఫెన్స్ కారిడార్ మరియు సెమీకండక్టర్ తయారీ పార్క్ ఏర్పాటుకు హామీ ఇచ్చింది. బీహార్‌లో ఏడు ఎక్స్‌ప్రెస్‌వేలు మరియు నాలుగు నగరాల్లో అంతర్జాతీయ విమానాశ్రయాలు (పాట్నా, దర్భంగా, పూర్ణియా, భాగల్పూర్), మెట్రో రైలు సేవల ఏర్పాటు కి హామీ ఇచ్చారు.
ఇతర సంక్షేమ పథకాలు
- గృహాలు & విద్యుత్: 50 లక్షల కొత్త పక్కా ఇళ్లు, ఉచిత రేషన్ మరియు 125 యూనిట్ల ఉచిత విద్యుత్.
- విద్య: కేజీ టు పీజీ వరకు ఉచిత విద్య.
- పెన్షన్: సామాజిక భద్రతా పెన్షన్లను కొనసాగింపు.
ఎన్నికల షెడ్యూల్.. బీహార్ అసెంబ్లీ ఎన్నికలు రెండు విడతల్లో జరగనున్నాయి:
- తొలి విడత: నవంబర్ 6
- రెండో విడత: నవంబర్ 11
- ఓట్ల లెక్కింపు: నవంబర్ 14