Nayanthara: దక్షిణాది స్టార్ హీరోయిన్ నయనతార మరోసారి వివాదంలో చిక్కుకుంది. ఇప్పటికే చాలా వివాదాలు ఎదుర్కొన్న ఆమె, ఇప్పుడు తనపై తీసిన డాక్యుమెంటరీ వల్ల న్యాయ సమస్యల్లో పడింది.
నెట్‌ఫ్లిక్స్‌ కోసం రూపొందించిన ‘నయనతార: బియాండ్ ది ఫెయిరీటేల్’ అనే డాక్యుమెంటరీ ఇటీవలే విడుదలైంది. ఇందులో నయనతార జీవితకథను చూపించారు. ఆమె సినిమాల్లోకి ఎలా వచ్చిందో, విజయాలు, భర్త విఘ్నేష్ శివన్‌తో ప్రేమ, పెళ్లి, కవల పిల్లలు వంటి విషయాలను వివరంగా చూపించారు. అయితే, ఈ డాక్యుమెంటరీలో కొన్ని సినిమాల ఫుటేజ్‌లు కూడా వాడారు. అందులో ముఖ్యంగా ‘చంద్రముఖి’ సినిమాకు సంబంధించిన కొన్ని సన్నివేశాలు కూడా ఉన్నాయి.
ఈ నేపథ్యంలో, ‘చంద్రముఖి’ హక్కులు ఉన్న ఏపీ ఇంటర్నేషనల్ సంస్థ డాక్యుమెంటరీ టీమ్‌పై కోర్టులో కేసు వేసింది. వారు చెప్పినట్టు, ఆ ఫుటేజ్‌లను అనుమతి లేకుండానే వాడారని ఆరోపించారు. దీంతో మద్రాస్ హైకోర్టు నెట్‌ఫ్లిక్స్‌కు, డాక్యుమెంటరీ రూపొందించిన సంస్థకు నోటీసులు జారీ చేసింది.
ఇది కూడా చదవండి: Bunny-Rashmika: బన్నీతో వన్స్ మోర్ అంటున్న రష్మిక
ఏపీ ఇంటర్నేషనల్ డాక్యుమెంటరీ నుంచి ‘చంద్రముఖి’ క్లిప్స్‌ను వెంటనే తీసేయాలని, పైగా రూ.5 కోట్ల నష్టపరిహారం చెల్లించాలంటూ కోర్టును ఆశ్రయించింది.
ఇంతకు ముందే ‘నానుమ్ రౌడీ దాన్’ అనే సినిమాలో ఫుటేజ్ వాడినందుకు ఆ సినిమా నిర్మాత ధనుష్ కూడా నోటీసులు పంపించిన సంగతి తెలిసిందే.
ఇప్పుడు రెండు లీగల్ షాకులు ఒకేసారి రావడంతో నయనతార డాక్యుమెంటరీ భారీ వివాదంగా మారింది. నయనతార ఇంకా ఈ వివాదాలపై స్పందించలేదు. ఇప్పుడు నెట్‌ఫ్లిక్స్‌ స్పందన ఎలా ఉండబోతుందనేది కూడా సినీ వర్గాల్లో చర్చనీయాంశంగా మారింది.
ఈ వివాదాలు నయనతార భవిష్యత్ సినిమాలపై ఎలాంటి ప్రభావం చూపిస్తాయో చూడాలి!