Nara Lokesh: భారతీయ సంస్కృతికి చిహ్నమైన చేనేత రంగానికి కూటమి ప్రభుత్వం అండగా నిలుస్తుందని ఆంధ్రప్రదేశ్ విద్య, ఐటీ శాఖల మంత్రి నారా లోకేశ్ తెలిపారు. జాతీయ చేనేత దినోత్సవం సందర్భంగా గుంటూరు జిల్లాలోని మంగళగిరిలో ముఖ్యమంత్రి చంద్రబాబు నాయుడుతో కలిసి పర్యటించిన లోకేశ్, చేనేత కళాకారులకు పలు వరాలను ప్రకటించారు. ఇకపై చేనేత కార్మికులను “చేనేత కళాకారులు” అని పిలవాలని సూచించారు.
చేనేత కళాకారులకు ప్రభుత్వ చేయూత :
చేనేత కార్మికులకు ఉచిత విద్యుత్: నేటి నుంచి చేనేత కార్మికుల కుటుంబాలకు నెలకు 200 యూనిట్ల వరకు, మర మగ్గాలకు 500 యూనిట్ల వరకు ఉచిత విద్యుత్‌ను అందించనున్నట్లు లోకేశ్ ప్రకటించారు.
జీఎస్టీ భారం తగ్గింపు: చేనేత వస్త్రాలపై ఉన్న జీఎస్టీ భారాన్ని పూర్తిగా ప్రభుత్వమే భరిస్తుందని, దీని ద్వారా కార్మికులకు ఆర్థికంగా చేయూత లభిస్తుందని వివరించారు.
ఆదాయం రెట్టింపు లక్ష్యం: లోకేశ్ మాట్లాడుతూ, ‘యువగళం’ పాదయాత్రలో చేనేత కార్మికుల కష్టాలను స్వయంగా చూశానని, వారి ఆదాయాన్ని రెట్టింపు చేయడమే తమ ప్రధాన లక్ష్యమని చెప్పారు. ఈ రంగంలో ఆధునిక సాంకేతిక పరిజ్ఞానాన్ని ఉపయోగించి మంచి భవిష్యత్తు కల్పిస్తామని హామీ ఇచ్చారు. తాను ప్రధాని మోదీని, ఇతర కేంద్ర మంత్రులను కలిసినప్పుడు చేనేత శాలువాలతోనే సత్కరిస్తానని తెలిపారు.
Also Read: Jagan Deyyam Matalu: లిక్కర్‌ ముఠా నోట్ల కట్టలపై పక్కా ప్రూఫ్స్‌ ఇవిగో..!
మంగళగిరిలో అభివృద్ధి పనులు :
మంగళగిరిలో చేపట్టిన అభివృద్ధి కార్యక్రమాలను కూడా లోకేశ్ ఈ సందర్భంగా వివరించారు.
ట్రిపుల్ ఇంజిన్ సర్కార్: కేంద్రంలో ప్రధాని మోదీ, రాష్ట్రంలో చంద్రబాబు, పవన్ కల్యాణ్‌లు ఉండగా, మంగళగిరిలో తాను కూడా ఉండటం వల్ల “ట్రిపుల్ ఇంజిన్ సర్కార్” నడుస్తోందని అన్నారు.
గృహాలు, సౌరశక్తి: రూ. 1000 కోట్ల విలువైన ఇళ్ల స్థలాలను ఉచితంగా అందించామని, 20 వేల ఇళ్లపై ‘సూర్య ఘర్’ పథకం కింద సోలార్ ప్యానెళ్లు ఏర్పాటు చేస్తామని తెలిపారు.
ఆసుపత్రి ఇతర పనులు: మంగళగిరిలో 100 పడకల ఆసుపత్రి నిర్మాణం, అలాగే 200 అభివృద్ధి పనులు జరుగుతున్నాయని వెల్లడించారు.
చివరగా, చేనేత నాయకుడు ప్రగడ కోటయ్య జయంతిని అధికారికంగా నిర్వహించాలని కోరారు. ప్రొద్దుటూరు, ఉప్పాడ, మంగళగిరి చేనేతలను దత్తత తీసుకుని వారి అభివృద్ధికి కృషి చేస్తున్నానని లోకేశ్ స్పష్టం చేశారు.