Bala Krishna: టాలీవుడ్ సీనియర్ నటుడు, హిందూపురం ఎమ్మెల్యే నందమూరి బాలకృష్ణకు జాతీయ స్థాయిలో అరుదైన గౌరవం లభించింది. భారతీయ చిత్ర పరిశ్రమకు గత ఐదు దశాబ్దాలుగా ఆయన అందిస్తున్న విశిష్ట సేవలను గుర్తిస్తూ ‘ఇంటర్నేషనల్ ఫిల్మ్ ఫెస్టివల్ ఆఫ్ ఢిల్లీ (IFFD) 2026’ నిర్వాహకులు ఆయనకు ప్రతిష్ఠాత్మకమైన ‘లైఫ్టైమ్ అచీవ్మెంట్’ (జీవితకాల సాఫల్య) పురస్కారాన్ని అందజేశారు. దేశ రాజధానిలోని భారత్ మండపంలో బుధవారం రాత్రి జరిగిన ఈ వేడుకలో బాలయ్య ఈ అవార్డును అందుకున్నారు.
ముఖ్యమంత్రి చేతుల మీదుగా పురస్కారం
ఢిల్లీ పర్యాటక మరియు రవాణా అభివృద్ధి సంస్థ ఆధ్వర్యంలో బుధవారం ప్రారంభమైన ఈ చలనచిత్ర ఉత్సవాలు మార్చి 31 వరకు కొనసాగనున్నాయి.
ఢిల్లీ ముఖ్యమంత్రి రేఖా గుప్తా చేతుల మీదుగా బాలకృష్ణ ఈ ప్రతిష్ఠాత్మక పురస్కారాన్ని స్వీకరించారు. బాలయ్యతో పాటు సీనియర్ నటి షర్మిలా ఠాగూర్, దివంగత లెజెండరీ నటుడు ధర్మేంద్రకు కూడా జీవితకాల సాఫల్య పురస్కారాలను ప్రకటించారు. ధర్మేంద్ర తరఫున ఆయన కుటుంబ సభ్యులు ఈ గౌరవాన్ని అందుకున్నారు.
వేడుకల్లో మెరిసిన సినీ దిగ్గజాలు
ఈ మెగా ఈవెంట్ ప్రారంభోత్సవానికి సినీ మరియు రాజకీయ రంగాలకు చెందిన పలువురు ప్రముఖులు హాజరయ్యారు.
ముఖ్యమంత్రి రేఖా గుప్తాతో పాటు మంత్రులు కపిల్ మిశ్రా, పర్వేశ్ సాహిబ్ సింగ్ వర్మ, నటీమణులు హేమమాలిని, కంగనా రనౌత్, షర్మిలా ఠాగూర్ జ్యోతి ప్రజ్వలన చేసి ఉత్సవాలను అధికారికంగా ప్రారంభించారు.ఈ సందర్భంగా సీఎం రేఖా గుప్తా మాట్లాడుతూ.. ఢిల్లీని దేశానికి సాంస్కృతిక రాజధానిగా తీర్చిదిద్దేందుకు ఈ ఫెస్టివల్ ఒక వేదికగా నిలుస్తుందని పేర్కొన్నారు.
50 ఏళ్ల నట ప్రస్థానం
నందమూరి తారక రామారావు వారసుడిగా వెండితెరకు పరిచయమైన బాలకృష్ణ, గత 50 ఏళ్లుగా హీరోగా అప్రతిహతంగా దూసుకుపోతున్నారు. కేవలం నటుడిగానే కాకుండా ప్రజా సేవలో, బసవతారకం క్యాన్సర్ ఆసుపత్రి ద్వారా వైద్య సేవలో ఆయన చేస్తున్న కృషికి గాను ఇప్పటికే కేంద్ర ప్రభుత్వం ఆయనను పద్మభూషణ్ పురస్కారంతో గౌరవించింది. తాజాగా ఢిల్లీలో ఈ గౌరవం దక్కడం పట్ల నందమూరి అభిమానులు ఇంకా సినీ ప్రముఖులు సోషల్ మీడియా వేదికగా హర్షం వ్యక్తం చేస్తున్నారు.