Vangalapudi Anitha: ఆంధ్రప్రదేశ్‌లో వైసీపీ ఎంపీ మిథున్ రెడ్డి అరెస్ట్‌పై రాజకీయ దుమారం రేగుతోంది. ఈ నేపథ్యంలో రాష్ట్ర హోం మంత్రి వంగలపూడి అనిత స్పందించారు. ఒక ఎంపీని అరెస్ట్ చేయాలంటే పటిష్టమైన ఆధారాలు ఉంటే తప్ప అరెస్ట్ చేయమని ఆమె స్పష్టం చేశారు. పక్కా ఆధారాలతోనే మిథున్ రెడ్డిని అరెస్ట్ చేశామని, ఇది అక్రమ అరెస్ట్ కాదని ఆమె తేల్చి చెప్పారు.
చంద్రబాబు అరెస్ట్ కూడా అక్రమమేనా?
ఈ సందర్భంగా గతంలో చంద్రబాబు నాయుడు అరెస్ట్‌ను ప్రస్తావించారు హోం మంత్రి అనిత. “అక్రమ అరెస్ట్ అంటే… చంద్రబాబును అరెస్ట్ చేసింది కూడా అక్రమ అరెస్ట్ అవుతుంది” అని ఆమె వ్యాఖ్యానించారు. అంటే, ప్రస్తుత ప్రభుత్వం చేపట్టిన అరెస్టులు చట్ట ప్రకారం జరుగుతున్నాయని, గతంలో జరిగిన అరెస్టులను కూడా ఇదే కోణంలో చూడాలని ఆమె పరోక్షంగా సూచించారు.
కోర్టు ఆదేశాలను గౌరవించాలి
శ్రీ సత్యసాయి జిల్లా మడకశిరలో జరిగిన మీడియా సమావేశంలో మాట్లాడుతూ, కోర్టు ఆదేశాలను అందరూ గౌరవించాలని హోం మంత్రి అనిత నొక్కి చెప్పారు. మిథున్ రెడ్డి అరెస్టుపై వైసీపీ నేతలు చేస్తున్న విమర్శలను ఆమె తోసిపుచ్చారు. “ఏమైనా ఉంటే కోర్టులో తేల్చుకోవాలి” అని ఆమె సూచించారు. ఈ కేసులో పోలీసులు చట్టబద్ధమైన ప్రక్రియ ప్రకారమే చర్యలు తీసుకుంటారని ఆమె వెల్లడించారు.
పోలీసు వ్యవస్థ బలోపేతంపై దృష్టి
ఈ సందర్భంగా రాష్ట్రంలో పోలీసు వ్యవస్థ బలోపేతంపై కూడా హోం మంత్రి అనిత మాట్లాడారు. ప్రస్తుతం మూడు సైబర్ క్రైమ్ పోలీసు స్టేషన్లు పనిచేస్తున్నాయని, రాష్ట్రంలోని ప్రతీ నియోజకవర్గంలో, ప్రతీ గ్రామంలో సీసీ కెమెరాలను ఏర్పాటు చేస్తామని తెలిపారు. మొత్తంగా రాష్ట్రంలో లక్ష సీసీ కెమెరాలను ఏర్పాటు చేయాలని లక్ష్యంగా పెట్టుకున్నట్లు వివరించారు. అలాగే, ప్రతీ పోలీసు స్టేషన్‌కు రెండు డ్రోన్‌లను అందిస్తామని హోం మంత్రి అనిత పేర్కొన్నారు.