Mohammad Azharuddin: తెలంగాణ మంత్రివర్గంలో ఇటీవల ప్రమాణ స్వీకారం చేసిన మాజీ క్రికెట్ దిగ్గజం, కాంగ్రెస్ సీనియర్ నాయకుడు మహ్మద్ అజారుద్దీన్‌కు రాష్ట్ర ప్రభుత్వం కీలక శాఖలను కేటాయించింది. ముఖ్యమంత్రి ఎ. రేవంత్ రెడ్డి నిర్ణయం మేరకు, గవర్నర్ ఆమోదం అనంతరం ఆయనకు మైనారిటీ సంక్షేమం, పబ్లిక్ ఎంటర్‌ప్రైజెస్ శాఖలను కేటాయిస్తూ ప్రభుత్వ ప్రధాన కార్యదర్శి ఉత్తర్వులు జారీ చేశారు. గత ప్రభుత్వాల మాదిరిగానే, కాంగ్రెస్ ప్రభుత్వం కూడా ముస్లిం మైనారిటీ సామాజిక వర్గానికి ప్రాతినిధ్యం కల్పిస్తూ, వారికి సంబంధించిన కీలకమైన మైనారిటీ సంక్షేమ శాఖను అజారుద్దీన్‌కు అప్పగించింది. ఈ శాఖ ద్వారా రాష్ట్రంలోని మైనారిటీల అభివృద్ధి, విద్య, ఆర్థిక సంక్షేమ కార్యక్రమాలను పర్యవేక్షించాల్సి ఉంటుంది.
అంతర్జాతీయ క్రికెట్‌లో విశేష అనుభవం, భారత జట్టుకు సారథ్యం వహించిన నేపథ్యం ఉన్న అజారుద్దీన్‌కు మొదట్లో క్రీడా శాఖ లేదా హోం శాఖ కేటాయిస్తారనే ఊహాగానాలు జోరుగా వినిపించాయి. అయితే, అన్ని అంచనాలను దాటుతూ ముఖ్యమంత్రి మైనారిటీ సంక్షేమ శాఖ బాధ్యతను ఆయన భుజాలపై ఉంచారు. గత అక్టోబర్ 31వ తేదీన గవర్నర్ కోటాలో శాసనమండలి సభ్యుడిగా (MLC) ప్రమాణ స్వీకారం చేసిన అజారుద్దీన్, అదే రోజు రాష్ట్ర మంత్రిగా కూడా ప్రమాణం చేశారు. రాష్ట్ర కేబినెట్‌లో మైనారిటీ వర్గానికి ప్రాతినిధ్యం కల్పించాలనే లక్ష్యంతో కాంగ్రెస్ అధిష్ఠానం ఆదేశాల మేరకు సీఎం రేవంత్ రెడ్డి మంత్రివర్గంలో అజారుద్దీన్‌కు చోటు కల్పించారు. జూబ్లీహిల్స్ ఉప ఎన్నిక సమీపిస్తున్న తరుణంలో ఈ నియామకంపై ప్రతిపక్ష బీజేపీ అభ్యంతరం వ్యక్తం చేస్తూ, ఇది ఎన్నికల కోడ్ ఉల్లంఘన అవుతుందని రాష్ట్ర ఎన్నికల ప్రధాన అధికారికి ఫిర్యాదు కూడా చేసింది.