Modi Trump Meeting: వచ్చే నెల(సెప్టెంబర్‌)లో న్యూయార్క్‌లో జరిగే ఐక్యరాజ్యసమితి సర్వసభ్య సమావేశం (UNGA) సందర్భంగా భారత ప్రధాని నరేంద్ర మోడీ అమెరికా అధ్యక్షుడు డొనాల్డ్ ట్రంప్‌ను కలిసే అవకాశం ఉన్నట్లు వార్తలు వస్తున్నాయి. ఈ భేటీ జరిగితే, ఏడాది లోపులోనే ఇరువురి మధ్య రెండో సారి సమావేశం అవుతుంది.
వాణిజ్య ఉద్రిక్తతల నేపథ్యం
ఇటీవలి కాలంలో భారత్-అమెరికా వాణిజ్య సంబంధాలు కాస్త ఉద్రిక్తంగా మారాయి. వ్యవసాయం, పాడి పరిశ్రమల మార్కెట్‌ను అమెరికాకు తెరవడంపై భారత్ వెనుకంజ వేయడం వల్ల ద్వైపాక్షిక వాణిజ్య ఒప్పందం నిలిచిపోయింది. దీనికి తోడు, రష్యా నుంచి భారత్ చమురు కొనుగోలు కొనసాగించడంపై ట్రంప్ ప్రభుత్వం తీవ్ర ఆగ్రహం వ్యక్తం చేసింది.
ఇది కూడా చదవండి: Supreme Court: వీధి కుక్కలపై సుప్రీంకోర్టు ఆదేశం మారనుందా ? CJI కీలక వ్యాఖ్యలు
దీని ఫలితంగా, అమెరికా భారత ఉత్పత్తులపై 50% వరకు సుంకాలు విధించింది. అందులో 25% ఇప్పటికే అమలులో ఉండగా, మిగిలిన 25% ఈ నెల 27 నుండి అమల్లోకి రానున్నాయి. భారత్ ఈ చర్యను “నిర్లక్ష్యమైన సుంక విధానం”గా అభివర్ణిస్తూ, దేశ ప్రయోజనాలను కాపాడుతామని స్పష్టం చేసింది.
ఇంకా ఎవరిని కలుస్తారు?
ట్రంప్‌తో పాటు, ప్రధాని మోడీ ఉక్రెయిన్ అధ్యక్షుడు జెలెన్స్కీతో సహా మరికొందరు ప్రపంచ నాయకులను కూడా కలిసే అవకాశం ఉందని సమాచారం. ఈ సమావేశాల ద్వారా వాణిజ్య సమస్యలు, అంతర్జాతీయ ఉద్రిక్తతలు, రష్యా-ఉక్రెయిన్ యుద్ధం వంటి అంశాలపై చర్చలు జరగనున్నాయి.
భేటీ జరిగేనా లేదా?
ప్రధాని మోడీ అమెరికా పర్యటన ఇంకా అధికారికంగా ఖరారు కాలేదు. అయితే, ఈ భేటీ జరిగితే వాణిజ్య సమస్యల పరిష్కారానికి దారి తీస్తుందని, అలాగే అక్టోబర్‌లో భారత్‌లో జరగనున్న క్వాడ్ సమ్మిట్‌కు ట్రంప్‌ను ఆహ్వానించే అవకాశం ఉందని వర్గాలు చెబుతున్నాయి.