Modi:ఆంధ్రప్రదేశ్‌లోని విశాఖపట్నం నగరంలో టెక్ దిగ్గజం గూగుల్ (Google) తన ఆర్టిఫిషియల్ ఇంటెలిజెన్స్ (ఏఐ) హబ్‌ను ఏర్పాటు చేయనున్నట్లు ప్రకటించింది. ఈ నిర్ణయంపై ప్రధాని నరేంద్ర మోదీ హర్షం వ్యక్తం చేశారు. ఇది ‘వికసిత భారత్’ నిర్మాణ దార్శనికతకు అనుగుణంగా ఉందని ఆయన అభిప్రాయపడ్డారు.
గూగుల్ సీఈఓ సుందర్ పిచాయ్ సోషల్ మీడియా ప్లాట్‌ఫామ్‌ ‘ఎక్స్‌’ (X)లో ఈ ప్రాజెక్టు వివరాలు వెల్లడించగా, ప్రధాని మోదీ మంగళవారం స్పందిస్తూ –
> “చైతన్యవంతమైన నగరం విశాఖపట్నంలో గూగుల్ ఏఐ హబ్ ప్రారంభించడం పట్ల చాలా సంతోషంగా ఉంది. గిగావాట్‌ స్థాయి డేటా సెంటర్‌ మౌలిక సదుపాయాలతో కూడిన ఈ పెట్టుబడి భారత సాంకేతిక రంగానికి కొత్త శక్తినిస్తుంది. ఇది ‘అందరికీ ఏఐ’ని అందిస్తుందని, పౌరులకు అత్యాధునిక సాధనాలను చేరవేస్తుందని విశ్వసిస్తున్నాను,” అని పేర్కొన్నారు.
అలాగే, ఈ ప్రాజెక్టు భారత డిజిటల్ ఆర్థిక వ్యవస్థను బలోపేతం చేసి, ప్రపంచ టెక్నాలజీ రంగంలో భారత్ స్థానం మరింత సుస్థిరం చేయనుందని మోదీ అన్నారు.
సుందర్ పిచాయ్ వ్యాఖ్యలు
గూగుల్ సీఈఓ సుందర్ పిచాయ్ ఈ సందర్భంగా తన పోస్టులో ఇలా పేర్కొన్నారు –
> “ప్రధాని నరేంద్ర మోదీ గారితో మాట్లాడటం గొప్ప అనుభవం. విశాఖపట్నంలో గూగుల్ మొట్టమొదటి ఏఐ హబ్ ఏర్పాటు ప్రణాళికలను ఆయనతో పంచుకున్నాం. ఇది భారతదేశంలో ఒక చరిత్రాత్మక అభివృద్ధి అవుతుంది,” అన్నారు.
ఈ హబ్‌లో గిగావాట్‌ స్థాయి కంప్యూటింగ్‌ సామర్థ్యం, కొత్త అంతర్జాతీయ సబ్‌సీ గేట్‌వే, భారీ ఇంధన మౌలిక సదుపాయాలు ఏర్పాటవనున్నాయని పిచాయ్ వివరించారు. దీని ద్వారా భారతీయ సంస్థలు, వినియోగదారులు ఆధునిక ఏఐ సాంకేతికతను సులభంగా వినియోగించుకోగలరని తెలిపారు.
భారీ పెట్టుబడితో ముందుకు గూగుల్
ఈ ప్రాజెక్టు కోసం గూగుల్ రాబోయే ఐదేళ్లలో (2026–2030) దాదాపు 15 బిలియన్ అమెరికన్‌ డాలర్లు (₹1.25 లక్షల కోట్లు) పెట్టుబడిగా పెట్టనుంది. ఇది ఇప్పటివరకు భారత్‌లో గూగుల్ చేసిన అతిపెద్ద పెట్టుబడిగా భావిస్తున్నారు.
అదానీకానెక్స్, ఎయిర్‌టెల్ వంటి ప్రముఖ భాగస్వాములతో కలిసి ఈ డేటా సెంటర్‌ క్యాంపస్‌ను నిర్మించనున్నారు. ఢిల్లీలో జరిగిన ‘భారత్ ఏఐ శక్తి’ (Bharat AI Shakti) కార్యక్రమంలో ఈ ప్రాజెక్టును అధికారికంగా ప్రకటించారు.
గూగుల్ క్లౌడ్‌ సీఈఓ థామస్ కురియన్ మాట్లాడుతూ –
> “విశాఖలో ఏర్పాటు చేయబోయే ఈ ఏఐ హబ్ భారతదేశ డిజిటల్ భవిష్యత్తులో ఒక మైలురాయి అవుతుంది. ఇది స్థానిక ఆవిష్కరణలకు, టెక్ రంగ అభివృద్ధికి కొత్త ద్వారాలు తెరుస్తుంది,” అన్నారు.