Lokesh: ఆంధ్రప్రదేశ్ రాష్ట్రం వృద్ధి లక్ష్యాలను ఛేదించే దిశగా వేగంగా ముందుకు సాగుతోందని, పెట్టుబడులను ఆకర్షించడంలో దేశంలోనే అగ్రస్థానంలో నిలుస్తుందని రాష్ట్ర మంత్రి నారా లోకేశ్ ధీమా వ్యక్తం చేశారు. బుధవారం ఢిల్లీలో జరిగిన మీడియా సమావేశంలో ఆయన రాష్ట్ర అభివృద్ధి ప్రణాళికలు, ఈ నెల 14, 15 తేదీల్లో విశాఖపట్నంలో జరగబోయే సీఐఐ సదస్సు గురించి కీలక విషయాలు వెల్లడించారు.
ఏపీలో ‘నమో’ బుల్లెట్ ట్రైన్
కేంద్రంలో, రాష్ట్రంలో ఒకే పార్టీ అధికారంలో ఉన్న అనేక రాష్ట్రాల్లో ‘డబుల్ ఇంజిన్’ ప్రభుత్వం నడుస్తుండగా, ఆంధ్రప్రదేశ్‌లో మాత్రం ‘డబుల్ ఇంజిన్ బుల్లెట్ ట్రైన్’ నడుస్తోందని లోకేశ్ ఆసక్తికరంగా వ్యాఖ్యానించారు. ఇక్కడ ‘నమో’ అంటే నరేంద్ర మోదీ మాత్రమే కాదని, అది ‘నాయుడు, మోదీ’ల కలయిక అని అభివర్ణించారు. ముఖ్యమంత్రి చంద్రబాబు నాయుడు నిర్దేశించిన లక్ష్యాలకు అనుగుణంగా స్పష్టమైన ప్రగతి దిశగా ముందుకు సాగుతున్నట్లు తెలిపారు.
Also Read: AP News: మదనపల్లెలో గ్లోబల్‌ ఆసుపత్రి సీజ్‌.. అసలు ఏం జరిగిందంటే?
పెట్టుబడులకు కీలక మూడు కారణాలు
పెట్టుబడుల కోసం అంతర్జాతీయ కంపెనీలు ఆంధ్రప్రదేశ్‌ను ఎంచుకోవడానికి మూడు ప్రధాన కారణాలు ఉన్నాయని లోకేశ్ వివరించారు:
ముఖ్యమంత్రి చంద్రబాబు నాయుడు గారిపై ఉన్న విశ్వసనీయత.
పెట్టుబడులకు సంబంధించిన ప్రక్రియలను వేగవంతం చేయడం.
రాష్ట్రంలో ఏర్పడుతున్న అనుకూల పర్యావరణ వ్యవస్థ (ఎకో సిస్టమ్).
పెట్టుబడులకు వేగవంతమైన సౌకర్యాల కల్పన చాలా ముఖ్యమని, అందుకే టీసీఎస్‌ (TCS), కాగ్నిజెంట్ వంటి పెద్ద కంపెనీలు కూడా ఏపీని ఎంచుకున్నాయని తెలిపారు. ఐటీ, తయారీ, సేవలు, పర్యాటక రంగాలు రాష్ట్ర అభివృద్ధికి అత్యంత కీలకమైనవని ఆయన స్పష్టం చేశారు.
2047 లక్ష్యాలు & సీఐఐ సదస్సు
‘వికసిత్ భారత్’ విజన్ మేరకు ముందుకు సాగుతున్నామని, 2047 నాటికి 2.4 ట్రిలియన్ డాలర్ల ఆర్థిక వ్యవస్థ లక్ష్యంగా పనిచేస్తున్నామని మంత్రి లోకేశ్ ప్రకటించారు. ఈ లక్ష్యాలను చేరుకోవడంలో విశాఖపట్నంలో జరగబోయే సీఐఐ సదస్సు ఒక గొప్ప అవకాశంగా ఆయన అభివర్ణించారు.
సీఐఐ (CII) సదస్సులో మొత్తం 410 అవగాహన ఒప్పందాలు (ఎంవోయూలు) జరుగుతాయని, దీని ద్వారా 120 బిలియన్ డాలర్ల పెట్టుబడులు రాష్ట్రానికి వస్తాయని ఆశాభావం వ్యక్తం చేశారు. ఈ భారీ పెట్టుబడుల ద్వారా దాదాపు 7.5 లక్షల మందికి ఉపాధి అవకాశాలు లభిస్తాయని ఆయన తెలిపారు. ఈ సదస్సులో క్వాంటమ్, ఏఐ (AI), మెటీరియల్ సైన్స్ వంటి అత్యాధునిక రంగాలలో కూడా మంచి అవకాశాలు ఉంటాయని లోకేశ్ పేర్కొన్నారు.