Meta Layoffs: అమెరికా టెక్ దిగ్గజం మెటా మరోసారి ఉద్యోగుల తొలగింపులతో వార్తల్లో నిలిచింది. ఆర్టిఫిషియల్ ఇంటెలిజెన్స్ (AI) రంగంలో పోటీని మరింత వేగవంతం చేస్తూ, సంస్థ తన AI సూపర్ ఇంటెలిజెన్స్ ల్యాబ్ విభాగం నుండి దాదాపు 600 మంది ఉద్యోగులను తొలగించే నిర్ణయం తీసుకుంది.
కొద్ది నెలల్లోనే భారీ మార్పు
మెటా సీఈఓ మార్క్ జుకర్‌బర్గ్ ఇటీవలే తన “AI సూపర్ ఇంటెలిజెన్స్ ప్రాజెక్ట్” కోసం అత్యుత్తమ ప్రతిభావంతులైన ఉద్యోగులను నియమించుకున్నారు. ఓపెన్‌ఏఐ, ఆపిల్, గూగుల్ డీప్‌మైండ్ వంటి కంపెనీల నుంచి టాప్ టాలెంట్‌ను తెచ్చుకునేందుకు బిలియన్ల డాలర్లు ఖర్చు చేశారు. అయితే, అదే టీమ్‌లో ఇప్పుడు కొందరిని తొలగించడం టెక్ వర్గాల్లో చర్చనీయాంశంగా మారింది.
“సామర్థ్యాన్ని పెంచేందుకే ఈ చర్య”
మెటా చీఫ్ AI ఆఫీసర్ అలెగ్జాండర్ వాంగ్ ఈ కోతలపై స్పందిస్తూ— “మా లక్ష్యం సంస్థను సన్నగా, వేగంగా పనిచేసేలా మార్చడం. తక్కువ స్థాయి సమావేశాలు, ఎక్కువ బాధ్యతలతో ప్రతి ఉద్యోగి ప్రభావవంతంగా పనిచేయగలిగే వాతావరణం సృష్టించడమే మా ఉద్దేశ్యం” అని పేర్కొన్నారు.
ఏ విభాగాలు ప్రభావితమయ్యాయి?
ఈ తొలగింపులు ప్రధానంగా FAIR (Fundamental AI Research) టీమ్ మరియు మెటా సూపర్ ఇంటెలిజెన్స్ ల్యాబ్స్లోని కొన్ని ఉత్పత్తి విభాగాలపై ప్రభావం చూపించనున్నాయి. అయితే, తాజాగా ఏర్పడిన TBD ల్యాబ్, అంటే అత్యంత ప్రతిభావంతులైన AI నిపుణులను కలిగి ఉన్న విభాగం మాత్రం ఈ కోతలకు అతీతంగా ఉంటుందని సమాచారం.
ఇది కూడా చదవండి: Kavita: సుప్రీంకోర్టుకు కవిత లేఖ – తెలంగాణ గ్రూప్‌–1 పరీక్ష రద్దు డిమాండ్
కొత్త నియామకాలు కూడా కొనసాగుతాయి
వాంగ్ స్పష్టం చేస్తూ— “ఇది AI పెట్టుబడుల తగ్గుదల కాదని, మేము పరిశ్రమలో అగ్రస్థాయి ప్రతిభను నియమించుకోవడాన్ని కొనసాగిస్తాం” అన్నారు. AI ప్రాజెక్టుల విస్తరణ కోసం మెటా ఇటీవల Scale AI అనే డేటా లేబులింగ్ స్టార్టప్‌లో $14.3 బిలియన్ల పెట్టుబడి పెట్టింది. అంతేకాదు, కొన్ని కీలక AI పోస్టుల కోసం $100 మిలియన్ (రూ.800 కోట్లు) వరకూ ప్యాకేజీలను ఆఫర్ చేసినట్లు సమాచారం.
“పునర్నిర్మాణం… కానీ వెనక్కి తగ్గడం కాదు”
మెటా ప్రతినిధుల ప్రకారం, ఈ ఉద్యోగ కోతలు AI రంగంలో వ్యూహాత్మక పునర్నిర్మాణం మాత్రమే, కానీ ఆర్టిఫిషియల్ ఇంటెలిజెన్స్ దిశలో వెనక్కి తగ్గడమేమీ కాదని స్పష్టం చేశారు. ప్రస్తుతం లేఆఫ్స్ తర్వాత సూపర్ ఇంటెలిజెన్స్ ల్యాబ్స్‌లో సిబ్బంది సంఖ్య 3,000 మందికి దిగువకు చేరనుంది.
జుకర్‌బర్గ్ యొక్క భారీ ప్రణాళిక
మెటా AI ల్యాబ్స్‌లో నెమ్మదిగా పురోగతిపై జుకర్‌బర్గ్ అసంతృప్తిగా ఉన్నట్లు సమాచారం. ముఖ్యంగా LLaMA 4 మోడల్ అంచనాలకు తగిన స్థాయిలో ఆదరణ పొందకపోవడంతో ఈ మార్పులు ప్రారంభమైనట్లు తెలుస్తోంది. మరోవైపు, కంపెనీ లూసియానాలోని తన హైపెరియన్ డేటా సెంటర్ కోసం $27 బిలియన్ల ఒప్పందం చేసుకున్నట్లు జుకర్‌బర్గ్ ప్రకటించారు.