Amaravati: ప్రకృతి వైద్య రంగంలో దేశవ్యాప్తంగా గుర్తింపు పొందిన డాక్టర్ మంతెన సత్యనారాయణ రాజును ఆంధ్రప్రదేశ్ ప్రభుత్వం కీలక పదవికి నియమించింది. రాష్ట్ర ప్రభుత్వానికి ప్రకృతి వైద్య సలహాదారుగా మంతెనను నియమిస్తూ ప్రభుత్వం అధికారికంగా జీవో జారీ చేసింది. ఆయనతో పాటు మాస్ కమ్యూనికేషన్ రంగంలో అనుభవం ఉన్న పోచంపల్లి శ్రీధర్ రావును కూడా ప్రభుత్వ సలహాదారుగా నియమించింది. వీరిద్దరూ రెండేళ్ల పాటు ఈ పదవుల్లో కొనసాగనున్నారు.
ప్రకృతి వైద్య విధానాల ప్రోత్సాహం, ప్రజల ఆరోగ్యంపై అవగాహన కార్యక్రమాలు, ఆరోగ్య విధానాల రూపకల్పనలో డాక్టర్ మంతెన సత్యనారాయణ రాజు ప్రభుత్వానికి సలహాలు అందించనున్నారు. ప్రజారోగ్యాన్ని కేంద్రంగా చేసుకుని ప్రభుత్వం తీసుకుంటున్న విధానాల్లో ప్రకృతి వైద్యానికి ప్రత్యేక స్థానం కల్పించాలనే లక్ష్యంతోనే ఈ నియామకం చేసినట్లు తెలుస్తోంది.
డాక్టర్ మంతెన సత్యనారాయణ రాజు గత కొన్ని దశాబ్దాలుగా ప్రకృతి వైద్యాన్ని ప్రజల జీవితాలకు దగ్గర చేసే దిశగా విశేష కృషి చేస్తున్నారు. మందులపై ఆధారపడకుండా ఆహార నియమాలు, జీవనశైలి మార్పుల ద్వారా అనేక ఆరోగ్య సమస్యలకు ఉపశమన మార్గాలను సూచిస్తూ ప్రజల్లో విస్తృత అవగాహన కల్పించారు. విజయవాడ సమీపంలోని ఉండవల్లి కరకట్టపై ఏర్పాటు చేసిన ‘ప్రకృతి చికిత్సాలయం’ ద్వారా వేలాది మందికి సేవలందించారు.
అలాగే విజయవాడ, నరసాపురం ప్రాంతాల్లో ఆయన ఆధ్వర్యంలో ఆరోగ్యాలయ కేంద్రాలు కొనసాగుతూ ప్రజలకు వైద్య సహాయం అందిస్తున్నాయి. టీవీ చానళ్లు, యూట్యూబ్ వంటి డిజిటల్ మాధ్యమాల ద్వారా కూడా ప్రకృతి వైద్య విధానాలను విస్తృతంగా ప్రజల్లోకి తీసుకెళ్లారు.
ఇదే సమయంలో, ప్రముఖ కార్టూనిస్ట్గా పేరు పొందిన పోచంపల్లి శ్రీధర్ రావును కూడా ప్రభుత్వం సలహాదారుగా నియమించింది. సమాచార ప్రసారం, ప్రభుత్వ కార్యక్రమాలను ప్రజలకు చేరవేయడం, కమ్యూనికేషన్ వ్యూహాల రూపకల్పన వంటి అంశాల్లో ఆయన ప్రభుత్వానికి మార్గదర్శనం చేయనున్నారు. ఈనాడు దినపత్రికలో సుదీర్ఘకాలం కార్టూనిస్ట్గా పనిచేసిన అనుభవం ఆయనకు ఉంది.
ప్రజారోగ్యం, సమాచార వ్యవస్థలను మరింత బలోపేతం చేయాలనే లక్ష్యంతో ప్రభుత్వం చేసిన ఈ నియామకాలు రాష్ట్రానికి ఉపయోగకరంగా ఉంటాయని భావిస్తున్నారు.