Manikandan: తమిళ సినిమా ఇండస్ట్రీలో తనదైన నటనతో గుర్తింపు పొందిన నటుడు మణికందన్, ఇకపై తన సినిమాల్లో వైవిధ్యం చూపించనున్నారు. ‘జై భీమ్’, ‘గుడ్ నైట్’, ‘లవర్’, ‘కుడుంబస్థాన్’ వంటి విభిన్న చిత్రాలతో ప్రేక్షకులను ఆకట్టుకున్న మణికందన్, తాజాగా తన రాబోయే చిత్రాల్లో కొత్త జోనర్‌లను అన్వేషించనున్నట్లు ప్రకటించారు. 2025లో విడుదల కానున్న ‘చెన్నై సిటీ గ్యాంగ్‌స్టర్స్’, ‘ఫ్రీడమ్’, ‘ఊడి ఊడి ఉజ్హైకానుమ్’ చిత్రాల్లో ఆయన విభిన్న పాత్రల్లో కనిపించనున్నారు. ‘చెన్నై సిటీ గ్యాంగ్‌స్టర్స్’ యాక్షన్ థ్రిల్లర్‌గా రూపొందగా, ‘ఫ్రీడమ్’ సామాజిక సందేశంతో కూడిన హీస్ట్ థ్రిల్లర్‌గా ఉంటుందని సమాచారం. ఇప్పటివరకూ కామెడీ, రొమాంటిక్ డ్రామా, సామాజిక చిత్రాల్లో నటించిన మణికందన్, ఇప్పుడు యాక్షన్, థ్రిల్లర్ జోనర్‌లలో సత్తా చాటాలని భావిస్తున్నారు. ‘కుడుంబస్థాన్’ సినిమా రూ. 27.26 కోట్ల వసూళ్లతో 2025లో నాలుగో అత్యధిక వసూళ్లు సాధించిన తమిళ చిత్రంగా నిలిచింది. తన 17 ఏళ్ల సినీ ప్రయాణంలో కష్టపడి స్టార్‌డమ్ సాధించిన మణికందన్, ఇకపై కమర్షియల్ సినిమాలతో పాటు అర్థవంతమైన కథలను ఎంచుకోనున్నారు.
