Mana ShankaraVaraprasad Garu: టాలీవుడ్ బాక్సాఫీస్ వద్ద సంక్రాంతి సందడి మొదలైపోయింది. ఈసారి పండగ బరిలో మెగాస్టార్ చిరంజీవి తన వేగాన్ని అమాంతం పెంచేశారు. సక్సెస్ ఫుల్ డైరెక్టర్ అనిల్ రావిపూడి దర్శకత్వంలో తెరకెక్కుతున్న ‘మన శంకర వరప్రసాద్ గారు (MSG)’ చిత్రంపై అంచనాలు ఆకాశాన్ని తాకుతున్నాయి. ‘వాల్తేరు వీరయ్య’ వంటి భారీ హిట్ తర్వాత చిరంజీవి నటిస్తున్న పక్కా కమర్షియల్ ఎంటర్టైనర్ కావడంతో, ఈ చిత్రం బాక్సాఫీస్ వద్ద సరికొత్త రికార్డులను సృష్టించడం ఖాయమని ట్రేడ్ వర్గాలు విశ్లేషిస్తున్నాయి.
సరికొత్త లుక్లో మెగాస్టార్.. అదిరిపోయే ప్రమోషన్స్!
సినిమా విడుదలకు ఇంకా కేవలం 15 రోజులే సమయం ఉండటంతో చిత్ర యూనిట్ ప్రమోషన్ల విషయంలో గేర్ మార్చింది. ఇటీవల విడుదలైన పోస్టర్లో చిరంజీవి కొబ్బరి బోండం తాగుతూ చాలా కూల్గా, స్టైలిష్గా కనిపిస్తుండగా, మరోవైపు తాజాగా విడుదలైన ‘ట్రైలర్ డేట్’ పోస్టర్లో మాత్రం ఫుల్ యాక్షన్ మోడ్లోకి మారిపోయారు. మోకాలిపై కూర్చొని తుపాకీ పేలుస్తున్న ఆ స్టిల్ చూస్తుంటే, థియేటర్లలో మాస్ ఆడియెన్స్కు పూనకాలు గ్యారెంటీ అనిపిస్తోంది. మెగాస్టార్లోని వింటేజ్ కామెడీ టైమింగ్తో పాటు మాస్ యాక్షన్ను బ్యాలెన్స్ చేయడంలో అనిల్ రావిపూడి తన మార్క్ మ్యాజిక్ను చూపించబోతున్నారు.
నయనతార రూల్ బ్రేక్.. అనిల్ మంత్రదండం!
ఈ సినిమాకు సంబంధించి సోషల్ మీడియాలో ఒక వార్త తెగ వైరల్ అవుతోంది. సాధారణంగా స్టార్ హీరోయిన్ నయనతార తన చిత్రాల ప్రచార కార్యక్రమాలకు దూరంగా ఉంటారు. కానీ, ‘మన శంకర వరప్రసాద్ గారు’ కోసం ఆమె తన దశాబ్దాల రూల్ను బ్రేక్ చేయడం విశేషం. దర్శకుడు అనిల్ రావిపూడితో కలిసి ఆమె చేసిన ఫన్నీ ప్రమోషనల్ వీడియో ఇప్పుడు నెట్టింట నవ్వులు పూయిస్తోంది. నయన్ స్వయంగా ప్రచారంలో పాల్గొనడం సినిమాకు భారీ మైలేజ్ ఇస్తోంది. విక్టరీ వెంకటేష్ ఈ చిత్రంలో ఒక కీలక పాత్రలో మెరవనుండటం, చిరు-వెంకీల కాంబోలో వచ్చే పార్టీ సాంగ్ ప్రోమో ఇప్పటికే యూట్యూబ్ను షేక్ చేస్తుండటం సినిమాపై ఉన్న క్రేజ్ను రెట్టింపు చేసింది.
ఇది కూడా చదవండి: Jaishankar: ప్రమాదంలో భారత్.. బలూచ్ నేత సంచలన లేఖ!
జనవరి 4న తిరుపతిలో ట్రైలర్ లాంచ్!
మెగా అభిమానులు కళ్ళల్లో వత్తులు వేసుకుని ఎదురుచూస్తున్న క్షణం రానే వచ్చింది. జనవరి 4వ తేదీన ఆధ్యాత్మిక క్షేత్రం తిరుపతి వేదికగా ఈ చిత్ర ట్రైలర్ను గ్రాండ్గా లాంచ్ చేసేందుకు మేకర్స్ సర్వం సిద్ధం చేశారు. భీమ్స్ సిసిరోలియో అందించిన సంగీతం ఇప్పటికే చార్ట్బస్టర్గా నిలవగా, ట్రైలర్తో సినిమా రేంజ్ ఏంటో ప్రపంచానికి చూపించాలని చిత్ర బృందం భావిస్తోంది.
ఓవర్సీస్లో ముందే మొదలైన మెగా జాతర!
తెలుగు రాష్ట్రాల్లోనే కాకుండా ఓవర్సీస్ మార్కెట్లో కూడా ఈ సినిమా హవా స్పష్టంగా కనిపిస్తోంది. అమెరికాలో బుకింగ్స్ ఇప్పటికే ఓపెన్ అయ్యాయి. సాహు గారపాటి, సుస్మిత కొణిదెల అత్యంత ప్రతిష్టాత్మకంగా నిర్మించిన ఈ చిత్రం జనవరి 12న ప్రపంచవ్యాప్తంగా విడుదల కానుంది. జనవరి 11వ తేదీనే ఓవర్సీస్ ప్రీమియర్స్ పడనుండటంతో, మెగాస్టార్ బాక్సాఫీస్ వేట అప్పుడే మొదలుకానుంది.
మొత్తానికి, చిరంజీవి మాస్ స్వాగ్, అనిల్ రావిపూడి మార్క్ హ్యూమర్, నయనతార గ్లామర్ మరియు వెంకటేష్ ప్రెజెన్స్ వెరసి.. ఈ సంక్రాంతికి ‘మన శంకర వరప్రసాద్ గారు’ ప్రేక్షకులకు ఒక ‘ఫుల్ మీల్స్’ లాంటి అనుభూతిని ఇవ్వడం ఖాయం.