Mahesh Goud: తెలంగాణ మంత్రివర్గంలో మాజీ క్రికెటర్, ఓడిపోయిన ఎమ్మెల్యే అభ్యర్థి మహ్మద్ అజారుద్దీన్‌కు చోటు కల్పించడం వెనుక కాంగ్రెస్ పార్టీ వ్యూహాత్మక రాజకీయ నిర్ణయం వాళ్ళ దానిపై ఏర్పడిన వివాదం చర్చనీయాంశంగా మారింది.
కాంగ్రెస్ నాయకులు మహేష్ గౌడ్ చేసిన ప్రకటనల ప్రకారం, అజారుద్దీన్‌ను కేబినెట్‌లోకి తీసుకోవడం సాధారణ రాజకీయ నియామకం కంటే ఒక ప్రత్యేక, సునిశితమైన నిర్ణయం.
అజారుద్దీన్ నియామకం వెనుక రాజకీయ కోణం
సాధారణంగా ఎన్నికల్లో ఓడిపోయిన వారికి వెంటనే ప్రభుత్వంలో మంత్రి పదవులు ఇవ్వకూడదనే ఏఐసీసీ (AICC) అనధికారిక నిర్ణయం ఉన్నప్పటికీ, అజారుద్దీన్ విషయంలో ఆ నిబంధనను పక్కన పెట్టడానికి ప్రధానంగా మూడు కారణాలు ఉన్నట్లు కాంగ్రెస్ వర్గాలు చెబుతున్నాయి:
- మైనారిటీ ఓటు బ్యాంకు లక్ష్యం
తెలంగాణలో మైనారిటీల మద్దతును పదిలం చేసుకోవడానికి కాంగ్రెస్ ఈ నిర్ణయం తీసుకుంద. అజారుద్దీన్‌ను మంత్రివర్గంలోకి తీసుకోవడం ద్వారా మైనారిటీ వర్గానికి ప్రాధాన్యత ఇస్తున్నామనే బలమైన సందేశాన్ని ఇవ్వాలనేది ప్రధాన ఉద్దేశం అయి ఉండొచ్చు.
- దేశ ప్రతిష్ట – ప్రాముఖ్యత
అజారుద్దీన్ కేవలం రాజకీయ నాయకుడిగానే కాకుండా, భారత క్రికెట్ జట్టు మాజీ కెప్టెన్‌గా, దేశానికి ప్రపంచ స్థాయిలో అసాధారణమైన గౌరవాన్ని తీసుకువచ్చారు. అందుకే ఆయనను కేబినెట్‌లోకి తీసుకోవడం “దేశానికి సేవ చేసిన వ్యక్తికి దక్కిన గుర్తింపు”గా పార్టీ సమర్థించుకుంటోంది.
- ముందస్తు వ్యూహంలో భాగం
అజారుద్దీన్‌ను మంత్రివర్గంలోకి తీసుకోవాలనే నిర్ణయం ఎన్నికల ఫలితాల తర్వాత తీసుకున్న హడావుడి నిర్ణయం కాదని, మూడు నెలల ముందే ఈ నిర్ణయం తీసుకున్నట్లు మహేష్ గౌడ్ ప్రకటించారు. అంటే, ఈ నియామకం కాంగ్రెస్ పార్టీ దీర్ఘకాలిక వ్యూహంలో భాగమని అర్థమవుతోంది.
బీజేపీ విమర్శలకు కాంగ్రెస్ కౌంటర్
అజారుద్దీన్‌ను మంత్రిగా నియమించడంపై బీజేపీ రాష్ట్ర అధ్యక్షుడు కిషన్‌రెడ్డి అభ్యంతరం వ్యక్తం చేశారు. దీనిపై మహేష్ గౌడ్ గట్టి కౌంటర్ ఇచ్చారు
అజారుద్దీన్ నియామకాన్ని బీజేపీ అడ్డుకోవాలని చూస్తోంది..కిషన్‌రెడ్డికి ఈ అంశంపై అవగాహన లేదు, ఆయన ముందుగా విషయాలు తెలుసుకోవాలి.నిబంధనల గురించి మాట్లాడడం సరికాదు అన్నారు .గతేడాది రాజస్థాన్‌లో ఓడిపోయిన అభ్యర్థి సురేంద్రపాల్‌ను బీజేపీ మంత్రిగా ప్రమాణం చేయించింది. ఆ విషయం కిషన్‌రెడ్డి గుర్తుంచుకోవాలి అని పేర్కొన్నారు.
మొత్తంగా, అజారుద్దీన్ నియామకం తెలంగాణ రాజకీయాల్లో కేవలం ఒక పదవి నియామకం కాదని, మైనారిటీ వర్గాన్ని ఆకర్షించేందుకు, అలాగే ఒక ప్రముఖ క్రీడా నేపథ్యం ఉన్న వ్యక్తిని గౌరవించాలనే కాంగ్రెస్ పార్టీ వ్యూహాత్మక చర్యగా దీనిని విశ్లేషిస్తున్నారు.