Mahaa News Conclave: కూటమి ప్రభుత్వం అధికారంలోకి వచ్చినప్పటి నుండి, ముఖ్యంగా ఉపముఖ్యమంత్రి పవన్ కళ్యాణ్ చొరవతో గ్రామీణ ప్రాంతాల్లో గణనీయమైన ప్రగతి కనిపిస్తోందని ప్రజలు హర్షం వ్యక్తం చేస్తున్నారు. ‘మహాన్యూస్ పల్లెబాట’ బృందం రాష్ట్రవ్యాప్తంగా చేపట్టిన ఆకస్మిక పర్యటనలో ఈ వాస్తవాలు వెలుగులోకి వచ్చాయి.
మెరుగైన రహదారులతో పెరిగిన గౌరవం:
గ్రామాలకు రోడ్డు సౌకర్యాలు కల్పించడంపై ప్రజలు అమితానందం వ్యక్తం చేస్తున్నారు. గతంలో సరైన రోడ్లు లేక ఎదురైన కష్టాలు ఇప్పుడు తీరాయని, బడికి, ఆసుపత్రికి వెళ్లడం సులభమైందని, వ్యవసాయ ఉత్పత్తులను రవాణా చేయడం సౌకర్యవంతంగా మారిందని గ్రామస్తులు వివరిస్తున్నారు. పవన్ కళ్యాణ్ రాకతో తమ గ్రామాలకు, ముఖ్యంగా గిరిజన ప్రాంతాలకు “గౌరవం, గుర్తింపు” లభించిందని, తమ సమస్యలు వినబడ్డాయని, పరిష్కార దిశగా అడుగులు పడుతున్నాయని ప్రజలు సంతోషం వ్యక్తం చేశారు. పవన్ కళ్యాణ్‌కు రైతులు ప్రత్యేకంగా ధన్యవాదాలు తెలిపారు.
‘గోకులాల’తో పశుపోషణకు చేయూత:
గ్రామీణాభివృద్ధికి ప్రభుత్వం తీసుకుంటున్న చర్యల్లో భాగంగా, “గోకులాల” పేరిట రైతులకు పశువుల షెడ్ల నిర్మాణం చేపట్టింది. ముఖ్యంగా పశుపోషణకు కీలకమైన ఎన్టీఆర్ జిల్లాలో పశువుల వసతి గృహాల నిర్మాణం రికార్డు స్థాయిలో పూర్తయింది. ఈ షెడ్లు పశువుల సంరక్షణకు, రైతుల ఆర్థికాభివృద్ధికి ఎంతగానో దోహదపడతాయని అధికారులు, పశువుల యజమానులు వెల్లడించారు.
పశువులను తీవ్రమైన ఎండలు, వర్షాల నుండి కాపాడి, ఆరోగ్యాన్ని మెరుగుపరచడం ఈ వసతి గృహాల ప్రధాన లక్ష్యం. దీనివల్ల పాల ఉత్పత్తి పెరిగి, పశువుల నష్టాలు తగ్గుతాయని రైతులు ఆశాభావం వ్యక్తంచేస్తున్నారు. ఈ పథకం అమలులో స్థానిక పాలనా యంత్రాంగం, ప్రభుత్వ కృషి ప్రశంసనీయం. పశువుల వ్యర్థాల నిర్వహణ కూడా మెరుగుపడి, గ్రామీణ పారిశుధ్యం కూడా వృద్ధి చెందుతుందని తెలిపారు.