Vizag: ఆంధ్రప్రదేశ్ ప్రభుత్వం విశాఖపట్నంలో లులూ గ్రూప్ నిర్మించనున్న దుకాణ సముదాయం (షాపింగ్ మాల్) మరియు హైపర్ మార్కెట్ నిర్మాణం కోసం భూమిని కేటాయించాలని నిర్ణయించింది. ఈ భూకేటాయింపులు ఏపీ ఇండస్ట్రియల్ ఇన్‌ఫ్రాస్ట్రక్చర్ కార్పొరేషన్‌ (ఏపీఐఐసీ) ద్వారా చేపట్టాలని ప్రభుత్వం ఉత్తర్వులు జారీ చేసింది. లులూ గ్రూప్ ప్రతిపాదనలను సమీక్షించి భూమి కేటాయింపులు చేపట్టాలని పరిశ్రమల శాఖ కార్యదర్శి యువరాజ్ ఆదేశించారు.
13.43 ఎకరాల భూమి కేటాయింపు
విశాఖ బీచ్ రోడ్డులో ఉన్న హార్బర్ పార్క్‌లో 13.43 ఎకరాల భూమిని ఏపీఐఐసీకి బదలాయించాలని విశాఖ మెట్రో రీజియన్ డెవలప్‌మెంట్ అథారిటీ (వీఎంఆర్డీఏ)కి ఆదేశాలు జారీ అయ్యాయి. అంతర్జాతీయ స్థాయి షాపింగ్ మాల్ నిర్మాణం కోసం లులూ గ్రూప్ భారీ పెట్టుబడులు పెట్టేందుకు ముందుకు వచ్చిందని పరిశ్రమల శాఖ వెల్లడించింది.
లులూ గ్రూప్ ప్రాజెక్ట్ పునరుద్ధరణ
2017లో తెలుగుదేశం ప్రభుత్వం అధికారంలో ఉన్నప్పుడు, హార్బర్ పార్క్‌లో అంతర్జాతీయ కన్వెన్షన్ సెంటర్ నిర్మాణానికి లులూ గ్రూప్ ప్రతిపాదనలు తీసుకువచ్చింది. అయితే, 2023లో గత వైసీపీ ప్రభుత్వం ఈ భూకేటాయింపులను రద్దు చేసింది. తాజా పరిస్థితుల్లో లులూ గ్రూప్ ఇప్పుడు విశాఖలో షాపింగ్ మాల్ మరియు హైపర్ మార్కెట్ నిర్మాణం కోసం మరోసారి ముందుకు వచ్చింది.
ఈ ప్రాజెక్ట్ ద్వారా విశాఖలో మౌలిక సదుపాయాలు, ఉపాధి అవకాశాలు పెరుగుతాయని, అంతర్జాతీయ స్థాయి వాణిజ్య హబ్‌గా నగరం ఎదిగేందుకు ఇది దోహదపడుతుందని ప్రభుత్వం అభిప్రాయపడుతోంది.