KTR: తెలంగాణ ముఖ్యమంత్రి రేవంత్ రెడ్డికి బీఆర్ఎస్ కార్యనిర్వాహక అధ్యక్షుడు కేటీఆర్ ఒక బహిరంగ లేఖ రాశారు. కాంగ్రెస్ పార్టీ ఎన్నికల సమయంలో ఇచ్చిన వాగ్దానాలను అమలు చేయడంలో విఫలమైందని ఆయన విమర్శించారు. ప్రభుత్వం అధికారంలోకి వచ్చిన తర్వాత ప్రవేశపెట్టిన గత రెండు బడ్జెట్లలో కూడా ప్రజా సమస్యలను, హామీలను పట్టించుకోలేదని ఆయన ఆవేదన వ్యక్తం చేశారు. రాబోయే బడ్జెట్లోనైనా ప్రజలకు ఇచ్చిన మాట ప్రకారం నిధులు కేటాయించాలని ఆయన డిమాండ్ చేశారు.
ఎన్నికల ముందు కాంగ్రెస్ పార్టీ ప్రకటించిన హామీల్లో దాదాపు 95 శాతం పనులు ఇంకా పెండింగ్లోనే ఉన్నాయని కేటీఆర్ గుర్తు చేశారు. ముఖ్యంగా బీసీ, ఎస్సీ, ఎస్టీ మరియు మైనార్టీ వర్గాల సంక్షేమానికి ఈ బడ్జెట్లో భారీగా నిధులు కేటాయించాల్సిన అవసరం ఉందన్నారు. కేవలం మాటలతో సరిపెట్టకుండా, క్షేత్రస్థాయిలో ప్రజలకు మేలు జరిగేలా ప్రభుత్వం అడుగులు వేయాలని ఆయన సూచించారు.
ముఖ్యంగా ఆరు గ్యారంటీలు అంటూ నమ్మబలికి అధికారంలోకి వచ్చిన ప్రభుత్వం, ఇప్పుడు వాటి అమలును గాలికి వదిలేసిందని కేటీఆర్ మండిపడ్డారు. ఆరు గ్యారంటీలకు చట్టబద్ధత కల్పిస్తామని చెప్పిన మాటను ప్రభుత్వం నిలబెట్టుకోవాలన్నారు. ఒకవేళ ఈ బడ్జెట్లో కూడా హామీల అమలుకు నిధులు కేటాయించకపోతే, ప్రజల తరఫున ప్రభుత్వాన్ని ఎక్కడికక్కడ నిలదీస్తామని ఆయన హెచ్చరించారు.
తెలంగాణ ప్రజలు ఇక ఎంతమాత్రం ఓపిక పట్టే పరిస్థితిలో లేరని, ప్రభుత్వం మొండిగా వ్యవహరిస్తే ప్రజల పక్షాన పెద్ద ఎత్తున ఒత్తిడి తీసుకొస్తామని కేటీఆర్ స్పష్టం చేశారు. ఇచ్చిన ప్రతి హామీని నెరవేర్చే వరకు తాము విశ్రమించబోమని, అసెంబ్లీ లోపల మరియు బయట కూడా ప్రజా సమస్యలపై పోరాడతామని ఆయన తన లేఖలో పేర్కొన్నారు.