Khammam: ఖమ్మం జిల్లాలో కొందరు మందుబాబులు చేసిన అల్లరి ఒక వైన్ షాపు ఉద్యోగికి గాయాలు కలిగించింది. తమకు కావాల్సిన బ్రాండ్ మద్యం దొరకలేదనే కోపంతో వారు ఈ దాడికి పాల్పడ్డారు. ఈ ఘటన ఖమ్మం జిల్లా, తిరుమలాయపాలెం మండలం, పిండిప్రోలు గ్రామంలోని తిరుమల వైన్ షాపులో జరిగింది.
వివరాల్లోకి వెళ్తే… ఆ షాపులో పోలెపొంగు కృష్ణ అనే వ్యక్తి గత ఆరు సంవత్సరాలుగా క్యాషియర్‌గా పని చేస్తున్నారు. ఇటీవల, ఐదుగురు యువకులు మద్యం కొనడానికి షాప్‌కు వచ్చారు. వారు ‘రాయల్ స్ట్రాంగ్’ అనే మద్యం బాటిల్ కావాలని అడిగారు. అయితే, ఆ బ్రాండ్ మద్యం తమ దగ్గర లేదని కృష్ణ వారికి వినయంగా చెప్పారు.
ఆ మాట వినగానే, ఆ యువకులు ఒక్కసారిగా కోపంతో రెచ్చిపోయారు. మద్యం మత్తులో ఉన్న ఆ ఐదుగురు కలిసి కౌంటర్‌లోకి చొరబడి కృష్ణపై దారుణంగా దాడి చేశారు. ఎంత చెప్పినా, వారించినా వారు వినలేదు. ఈ దాడిలో కృష్ణకు గాయాలయ్యాయి.
అదృష్టవశాత్తూ, ఈ దాడి దృశ్యాలన్నీ షాప్‌లో ఉన్న సీసీ కెమెరాలో రికార్డ్ అయ్యాయి. దీంతో, బాధితుడు కృష్ణ వెంటనే స్థానిక పోలీస్ స్టేషన్‌లో ఫిర్యాదు చేశారు. కేసు నమోదు చేసుకున్న పోలీసులు.. ఈ వీరంగం సృష్టించిన యువకుల కోసం విచారణ చేస్తున్నారు. కోరిన బ్రాండ్ ఇవ్వలేదనే చిన్న కారణంతో ఇలా ఒక ఉద్యోగిపై దాడి చేయడం సరికాదని స్థానికులు అంటున్నారు.