BRS: తెలంగాణలో అధికారంలోకి వచ్చిన కాంగ్రెస్ ప్రభుత్వంపై బీఆర్ఎస్ పార్టీ అధినేత కేసీఆర్ జల వివాదాలను ప్రధాన ఆయుధంగా మలచుకునేందుకు సిద్ధమవుతున్నారు. ఈ నేపథ్యంలో, ఈ నెల 19వ తేదీన హైదరాబాద్లోని తెలంగాణ భవన్లో మధ్యాహ్నం 2 గంటలకు పార్టీకి చెందిన కీలక సమావేశం జరగనుంది. ఈ సమావేశంలో బీఆర్ఎస్ శాసనసభాపక్షం మరియు రాష్ట్ర కార్యవర్గం సంయుక్తంగా పాల్గొంటాయి. ఈ విస్తృత స్థాయి సమావేశంలో ప్రజా ఉద్యమాలు, పార్టీ కార్యాచరణ ప్రణాళిక, సంస్థాగత నిర్మాణంపై ముఖ్యమైన నిర్ణయాలు తీసుకునే అవకాశం ఉంది.
కాంగ్రెస్ నిర్లక్ష్యంపై కేసీఆర్ గుస్సా: ఆంధ్రప్రదేశ్ ‘జల దోపిడీ’ని ఆపడం లేదా?
ప్రధానంగా, కృష్ణా-గోదావరి జలాల విషయంలో ప్రస్తుత కాంగ్రెస్ ప్రభుత్వం వ్యవహరిస్తున్న తీరుపై ఈ సమావేశంలో లోతుగా చర్చ జరగనుంది. బీఆర్ఎస్ నాయకులు చేస్తున్న ప్రధాన ఆరోపణ ఏంటంటే తమ హయాంలో మొదలుపెట్టిన కీలక సాగునీటి ప్రాజెక్టులను కాంగ్రెస్ ముందుకు తీసుకెళ్లడంలో పూర్తిగా విఫలమైంది. అంతేకాకుండా, ఆంధ్రప్రదేశ్ చేస్తున్న జలదోపిడీని అడ్డుకోవడంలో కూడా కాంగ్రెస్ ప్రభుత్వం ఘోరంగా విఫలమైందని బీఆర్ఎస్ విమర్శిస్తోంది.
ఈ నేపథ్యంలోనే, తెలంగాణ రైతాంగానికి సాగునీటి హక్కులు కాపాడేందుకు మరో ప్రజా ఉద్యమం తప్పదని కేసీఆర్ స్పష్టం చేసినట్లు పార్టీ వర్గాలు వెల్లడించాయి. రాబోయే రోజుల్లో చేపట్టే పోరాటాల రూపురేఖలపై ఈ సమావేశంలో విస్తృతంగా చర్చిస్తారు.
పాలమూరు ఎత్తిపోతల ప్రాజెక్టుపై ఆగ్రహం
ఈ జల వివాదంలో అత్యంత కీలక అంశం పాలమూరు–రంగారెడ్డి ఎత్తిపోతల ప్రాజెక్టు. ఈ ప్రాజెక్టుకు కేటాయించాల్సిన నీటిని 90 టీఎంసీల నుంచి 45 టీఎంసీలకు తగ్గించడంపై బీఆర్ఎస్ తీవ్ర ఆగ్రహం వ్యక్తం చేస్తోంది. 45 టీఎంసీలకు ఒప్పుకొని కేంద్ర ప్రభుత్వానికి లొంగిపోవడం అనేది రైతుల ప్రయోజనాలకు చేసిన ద్రోహం అని బీఆర్ఎస్ నేతలు విమర్శిస్తున్నారు.
“పాలమూరు రెండో దశ పనులు ఎలా పూర్తి చేస్తారో కాంగ్రెస్ ప్రభుత్వం చెప్పాలి,” అని కేసీఆర్ డిమాండ్ చేశారు. కాంగ్రెస్ వైఖరి తెలంగాణకు తీవ్ర అన్యాయమని ఆయన ఆరోపించారు. ఒకవేళ బీఆర్ఎస్ ప్రభుత్వం కొనసాగి ఉంటే, పాలమూరు నుంచే ఇప్పటికే నీళ్లు వచ్చేవి అని కేసీఆర్ అన్నారు. కాంగ్రెస్ నిర్లక్ష్యం వల్ల పాలమూరు, రంగారెడ్డి, నల్గొండ జిల్లాల రైతులు నష్టపోతున్నారని ఆయన ఆందోళన వ్యక్తం చేశారు.
బీజేపీపై కూడా విమర్శనాస్త్రాలు
రాష్ట్రంలో జరుగుతున్న జల అన్యాయంపై కేంద్రంలో ఉన్న బీజేపీపై కూడా కేసీఆర్ విమర్శలు గుప్పించారు. తెలంగాణకు చెందిన ఎనిమిది మంది బీజేపీ ఎంపీలు ఉన్నప్పటికీ, రాష్ట్ర ప్రయోజనాల గురించి ఒక్కరూ మాట్లాడటం లేదని ఆయన విమర్శించారు. కేంద్రం చేస్తున్న సాగునీటి అన్యాయాన్ని ఎదుర్కోవాలంటే, ప్రత్యక్ష ప్రజా పోరాటాలే సరైన మార్గం అని కేసీఆర్ స్పష్టం చేసినట్లు పార్టీ వర్గాలు తెలిపాయి.
సాగునీటి హక్కుల విషయంలో బీఆర్ఎస్ ఏమాత్రం రాజీ పడదని పార్టీ వర్గాలు పేర్కొన్నాయి. ఈ నెల 19న జరిగే సమావేశంలో, తెలంగాణ సాగునీటి ప్రాజెక్టులు, జల కేటాయింపులపై ఉద్యమానికి శ్రీకారం చుట్టే కీలక నిర్ణయాలు తీసుకునే అవకాశం ఉంది. ముఖ్యంగా, ఆంధ్రప్రదేశ్ చేస్తున్న జలదోపిడీపై పోరాటానికి బీఆర్ఎస్ సిద్ధమవుతోంది.