Kavita : ఎమ్మెల్సీ కల్వకుంట్ల కవితను పార్టీ సస్పెండ్ చేసిన నేపథ్యంలో, ఆమె కీలక నిర్ణయాలు తీసుకునేందుకు సిద్ధమవుతున్నారు. పార్టీ ప్రాథమిక సభ్యత్వంతో పాటు ఎమ్మెల్సీ పదవికి కూడా రాజీనామా చేయాలని దాదాపుగా తేల్చుకున్నట్లు సమాచారం.
బీఆర్ఎస్ పార్టీ తనపై అనర్హత వేటు వేయకముందే, స్వయంగా ఎమ్మెల్సీ పదవిని వదులుకోవాలని కవిత నిర్ణయించుకున్నారని సన్నిహిత వర్గాలు చెబుతున్నాయి. పార్టీతో అన్ని సంబంధాలను పూర్తిగా తెంచుకోవాలనే ఉద్దేశంతోనే ఆమె ఈ దిశగా అడుగులు వేస్తున్నట్లు తెలుస్తోంది.
సస్పెన్షన్ అనంతరం అనుచరులతో విస్తృతంగా చర్చలు జరిపిన కవిత, ఈ విషయంపై స్పష్టమైన నిర్ణయానికి వచ్చినట్లు సమాచారం. అంతేకాకుండా, త్వరలోనే స్వంతంగా కొత్త రాజకీయ పార్టీ ప్రకటించే యోచనలో ఉన్నారని ఆమె అనుచరులు బలంగా చెబుతున్నారు.
ఈ పరిణామాలపై స్పష్టత ఇచ్చేందుకు కవిత రేపు మీడియా సమావేశం ఏర్పాటు చేయనున్నారు. కవిత ఎలాంటి ప్రకటన చేయనున్నారనే ఉత్కంఠతో రాష్ట్ర రాజకీయాల్లో చర్చలు వేడెక్కుతున్నాయి.