Kavita: తెలంగాణ బీఆర్ఎస్ నాయకురాలు, ఎమ్మెల్సీ కల్వకుంట్ల కవిత బీసీల హక్కుల కోసం నిరంతరం పోరాటం చేస్తున్నట్లు స్పష్టం చేశారు. ఎన్టీవీ “క్వశ్చన్ అవర్” కార్యక్రమంలో ఆమె మాట్లాడుతూ, బీసీలను నాలుగైదు కులాలకే పరిమితం చేయకూడదని స్పష్టం చేశారు. “ప్రభుత్వంలో ఉన్నప్పుడు ఏదైనా అంతర్గతంగానే మాట్లాడాలి. బీసీల కోసం గురుకుల పాఠశాలలు ఏర్పాటు చేశాం. వృత్తి ఆధారిత పనులకు చేయూత ఇచ్చే కార్యక్రమాలు చేపట్టాం” అని పేర్కొన్నారు.
అలాగే, రిజర్వేషన్లపై 50 శాతం పరిమితిని ఎత్తేసిన తర్వాత బీసీ ఉద్యమం గట్టి ఉత్పత్తి దిశగా సాగిందని గుర్తుచేశారు.
కవిత మాట్లాడుతూ, “మహిళల సమస్యలు మహిళలే మాట్లాడాలి అనే దానికంటే, సమగ్రంగా వ్యవహరించాలి. తెలంగాణ ఉద్యమం నుంచి నేను పోరాటమే చేస్తున్నాను. అసెంబ్లీ ఆవరణలో అంబేద్కర్ విగ్రహ ఏర్పాటుకోసం 48 గంటల దీక్ష చేశాను. మహిళా బిల్లు కోసం పోరాటం చేశాం. ఇప్పుడు బీసీల కోసం పోరాడుతున్నాను,” అని తెలియజేశారు.
బీసీ కులగణనపై మాట్లాడుతూ, “తప్పుల తడక ఉన్నప్పటికీ కులగణన జరిగింది. ముస్లింలు, బీసీలు కలిపి 56 శాతం ఉన్నా, రేవంత్ రెడ్డి 42 శాతమే రిజర్వేషన్లు ఇచ్చారు. స్థానిక సంస్థల ఎన్నికల్లో ప్రత్యేక ఆర్డినెన్స్ ద్వారా బీసీ రిజర్వేషన్లు అమలు చేయొచ్చు. సెప్టెంబర్ 30 వరకు డెడ్లైన్లోపు ఆర్డినెన్స్ తీసుకురావాలి” అని డిమాండ్ చేశారు.
ఇక బీజేపీపై పోరాటం చేసేవారిపై విమర్శలు చేయడం సరికాదని ఆమె అభిప్రాయపడ్డారు. “బీఆర్ఎస్లో నేను లైఫ్టైమ్ మెంబర్ని. కేసీఆర్ అధికారంలో ఉన్నప్పటికీ మహిళా బిల్లు కోసం ఢిల్లీలో ఆందోళన చేశాను. మా మధ్య అభిప్రాయ బేధాలే ఉన్నాయే కానీ, బేధాభిప్రాయాలు లేవు. లేఖ లీక్ చేసింది ఎవరో తెలియజేయాలని నా డిమాండ్. వారు పట్టుబడేవరకు నేను కొంతకాలం దూరంగా ఉంటాను” అని వివరించారు.