Actress Shobhita: హైదరాబాద్ గచ్చిబౌలిలో తీవ్ర విషాదం చోటుచేసుకుంది. బుల్లితెర నటి శోభిత ఆత్మహత్య చేసుకుంది. గచ్చిబౌలిలోని శ్రీరామ్ నగర్ కాలనిలో ఓ ఆపార్ట్ మెంట్‌లో తన భర్తతో కలిసి నివాసముంటున్న శోభిత.. ఇంట్లో ఫ్యాన్‌కు ఊరేసుకుని ఆత్మహత్య చేసుకుంది.నవంబర్ 30న రాత్రి భర్తకు ఆఫీస్ వర్క్ ఎక్కువగా ఉండటంతో.. తాను వేరే గదిలో పడుకునేందుకు వెళ్లగా.. ఉదయం సమయంలో ఎంత పిలిచినా డోర్ తీయలేదు. అనుమానం వచ్చిన తన భర్త.. డోర్ బద్దలుకొట్టి చూడగా.. ఫ్యాన్‌కు వేలాడుతూ కనిపించింది.
Actress Shobhita: తన భార్యను అలా చూడగానే హతాశుడైన తన భర్త.. ఏం చేయాలో తెలియని పరిస్థితిలో.. తన దగ్గరి బంధువు, అపార్ట్మెంట్ ఓనర్‌కు ఫోన్ చేయగా.. హుటాహుటిన ఘటనా స్థలికి చేరుకుని.. వెంటనే పోలీసులకు సమాచారం ఇచ్చారు. వెంటనే ఘటనా స్థలికి వచ్చిన పోలీసులు.. పరిస్థితిని పూర్తిగా పరిశీలించి.. కేసు నమోదు చేసి దర్యాప్తు చేపట్టారు. పోస్ట్ మార్టం నిమిత్తం శోభిత మృతదేహాన్ని ఉస్మానియా ఆస్పత్రికి తరలించారు.
Actress Shobhita: కన్నడ సినీరంగానికి చెందిన శోభిత.. అటు కన్నడతో పాటు ఇటు తెలుగులోనూ పలు సీరియల్స్ చేసి తెలుగు ప్రేక్షకులకు దగ్గరయ్యింది. బ్రహ్మగంతు, నినిదలే సీరియల్స్ ద్వారా మంచి గుర్తింపు తెచ్చుకుంది శోభిత. సీరియల్స్ మాత్రమే కాకుండా తెలుగులో ఫస్ట్ డే ఫస్ట్ షో అనే సినిమాలో నటించింది. ముఖ్యంగా.. సీరియల్స్ ద్వారా ఫ్యామిలీ ప్రేక్షకులకు బాగా దగ్గరైన శోభిత.. ఇటీవలే సాఫ్ట్ వేర్ ఉద్యోగం చేస్తున్న సుధీర్‌ను వివాహం చేసుకుంది. ఇద్దరూ కలిసి శ్రీరాంనగర్ కాలనీలోని తన బంధువుకు సంబంధించిన ఓ ఆపార్టమెంట్‌లో నివాసం ఉంటున్నారు. పెళ్లి తర్వాత అటు సీరియల్స్ ఇటు సినిమాలకు కాస్త దూరంగా ఉంటుంది శోభిత. ఇటీవలే ఓ తెలుగు సినిమాలో చిన్న క్యారెక్టర్ చేసినట్టు సమాచారం.
Actress Shobhita: ఇదిలా ఉంటే.. శోభిత సూసైడ్ చేసుకోవటంపై సర్వత్రా అనుమానాలు వ్యక్తమవుతున్నాయి. భార్యభర్తలిద్దరు సంతోషంగానే ఉన్నట్టుగా బంధువులు చెప్తున్నారు. అంతేకాకుండా.. తాజాగా ఇద్దరూ కలిపి గోవా ట్రిప్‌ కూడా వెళ్లొచ్చినట్టు తెలుస్తోంది. గోవా నుంచి వచ్చి ఒకటి రెండు రోజులే అవుతుందని.. గోవా నుంచి వచ్చిన తర్వాతే ఇలా చేసుకోవటం పలు అనుమానాలకు తావిస్తోంది. భార్యాభర్తల మధ్య ఏమైనా మనస్పర్థలు వచ్చాయా.. అందుకే క్షణికావేశంలో ఆత్మహత్య చేసుకుందా అనే అనుమానాలు వ్యక్తమవుతున్నాయి.