Kavitha: తెలంగాణ రాజకీయాల్లో మరో కీలక పరిణామం చోటుచేసుకుంది. మాజీ ఎమ్మెల్సీ, బీఆర్ఎస్ అధినేత కేసీఆర్ కుమార్తె కల్వకుంట్ల కవిత కొత్త రాజకీయ పార్టీని ఏర్పాటు చేయబోతున్నట్లు అధికారికంగా ప్రకటించారు. గురువారం హైదరాబాద్లో ఏర్పాటు చేసిన మీడియా సమావేశంలో ఆమె మాట్లాడుతూ, మే మొదటి వారంలో శుభ ముహూర్తం చూసుకుని పార్టీని లాంచ్ చేయనున్నట్లు వెల్లడించారు. ఈ ప్రకటనతో రాష్ట్ర రాజకీయాల్లో ఒక్కసారిగా చర్చ మొదలైంది.
పార్టీ పేరులో ‘తెలంగాణ’.. అజెండా అదే!
కొత్త పార్టీ పేరు – విధివిధానాలపై కవిత స్పష్టతనిచ్చారు. పార్టీ పేరులో ఖచ్చితంగా ‘తెలంగాణ’ అనే పదం ఉంటుందని ఆమె పేర్కొన్నారు. తెలంగాణ ఆత్మగౌరవం, హక్కుల కోసం తన పోరాటం కొనసాగుతుందని, రాష్ట్ర ప్రయోజనాలే పరమావధిగా ఈ పార్టీ పనిచేస్తుందని స్పష్టం చేశారు. ఇప్పటికే పార్టీ జెండా, ఎజెండాపై కసరత్తు పూర్తయిందని, మే నెలలో జరిగే భారీ బహిరంగ సభలో పూర్తి వివరాలు వెల్లడిస్తామని చెప్పారు.
ఎక్కడి నుంచి పోటీ? సిద్దిపేట లేదా బోధన్?
రాబోయే ఎన్నికల్లో తన పోటీపై కూడా కవిత కీలక వ్యాఖ్యలు చేశారు.
- సిద్దిపేట నా ఫస్ట్ చాయిస్: “నేను ఎక్కడి నుంచైనా పోటీ చేయవచ్చు, కానీ నా మొదటి ప్రాధాన్యత సిద్దిపేట నియోజకవర్గం” అని ఆమె అన్నారు.
- సెకండ్ చాయిస్ బోధన్: ఒకవేళ సిద్దిపేట కాకపోతే, రెండో చాయిస్గా నిజామాబాద్ జిల్లాలోని బోధన్ నియోజకవర్గం నుంచి బరిలోకి దిగుతానని స్పష్టం చేశారు.
రాజకీయ సమీకరణాల్లో మార్పులు
బీఆర్ఎస్ పార్టీకి పక్కా విధేయురాలిగా ఉన్న కవిత, ఇప్పుడు సొంతంగా పార్టీ పెట్టడం వెనుక ఉన్న వ్యూహం ఏమిటన్నది ఆసక్తికరంగా మారింది. పార్టీలోని అంతర్గత పరిణామాలా లేక తెలంగాణలో మరో ప్రత్యామ్నాయ శక్తిగా ఎదగాలనే ఆలోచనా అన్నది చర్చనీయాంశమైంది. అయితే, తండ్రి కేసీఆర్ ఆశీస్సులు తనకు ఎప్పుడూ ఉంటాయని, ఆయన బాటలోనే నడుస్తానని ఆమె చెప్పుకొచ్చారు.