Kantara 3: కన్నడ చిత్ర పరిశ్రమలో ‘కాంతార’ సృష్టించిన సంచలనం గురించి ప్రత్యేకంగా చెప్పాల్సిన పనిలేదు. కేవలం రూ. 14 కోట్లతో తెరకెక్కి బ్లాక్‌బస్టర్ విజయం సాధించిన ఈ చిత్రం, రిషబ్ శెట్టి కెరీర్‌ను ఓవర్ నైట్‌లో పాన్ ఇండియా స్థాయికి తీసుకెళ్లింది. ఇప్పుడు ‘కాంతార: ఎ లెజెండ్ – ఛాప్టర్ 1’ పేరుతో ఈ చిత్రానికి ప్రీక్వెల్ సిద్ధమవుతోంది. అక్టోబరు 2న విడుదల కానున్న ఈ సినిమాపై ఇప్పటికే భారీ అంచనాలు నెలకొన్నాయి. ఈ నేపథ్యంలో, ‘కాంతార 3’ గురించి మరో ఆసక్తికర వార్త సినీ వర్గాల్లో చక్కర్లు కొడుతోంది.
తాజా సమాచారం ప్రకారం, ‘కాంతార’ సీక్వెల్, అంటే ‘కాంతార 3’లో యంగ్ టైగర్ ఎన్టీఆర్ కీలక పాత్రలో నటించనున్నారని తెలుస్తోంది. హోంబలే ఫిల్మ్స్, రిషబ్ శెట్టి బృందం ఇప్పటికే ఎన్టీఆర్‌తో చర్చలు జరిపినట్లు, ఆయన ఈ ప్రాజెక్ట్‌లో భాగం కావడానికి సుముఖత వ్యక్తం చేసినట్లు వార్తలు వస్తున్నాయి. ఇదే నిజమైతే, ఎన్టీఆర్ ‘కాంతార’ యూనివర్స్‌లో భాగం కావడం అభిమానులకు పెద్ద పండుగే అవుతుందని సినీ విశ్లేషకులు అభిప్రాయపడుతున్నారు.
ఎన్టీఆర్ కర్ణాటక పర్యటనకు వెళ్ళినప్పుడు రిషబ్ శెట్టి, ప్రశాంత్ నీల్‌లతో ఎక్కువ సమయం గడిపారని, రిషబ్ శెట్టి ఇంటికి వెళ్లి వారి ఆతిథ్యం కూడా స్వీకరించారని గతంలో వార్తలు వచ్చాయి. ఆ సమయంలోనే రిషబ్ శెట్టి ‘కాంతార 3’ కథను ఎన్టీఆర్‌కు వినిపించారని, దాదాపు 15 నిమిషాల పాటు కనిపించే ఒక కీ రోల్ చేయడానికి ఎన్టీఆర్ అంగీకరించారని ఇండస్ట్రీ వర్గాల టాక్. ఎన్టీఆర్‌కు కర్ణాటకలో భారీ ఫ్యాన్ ఫాలోయింగ్ ఉంది. ముఖ్యంగా బళ్లారిలో ఆయన సృష్టించిన బాక్సాఫీస్ రికార్డులు అసాధారణం. కాబట్టి, ఎన్టీఆర్ భాగస్వామ్యం ‘కాంతార 3’ అంచనాలను అమాంతం పెంచేస్తుందని హోంబలే ఫిల్మ్స్ భావిస్తున్నట్లు సమాచారం.
Also Read: Kingdom 2: విజయ్ దేవరకొండ అభిమానులకు గుడ్ న్యూస్ ‘కింగ్‌డమ్’ సీక్వెల్ త్వరలో విడుదల!
‘కాంతార: ఛాప్టర్ 1’ తర్వాత ‘కాంతార 3’ పనులు మొదలవుతాయని రిషబ్ శెట్టి తెలిపారు. ‘కాంతార’ సిరీస్‌లో ఇదే చివరి భాగమని కూడా ఆయన పేర్కొన్నారు. ‘కాంతార: ఛాప్టర్ 1’ బడ్జెట్ రూ. 125 కోట్లు కాగా, మొదటి భాగం రూ. 14 కోట్లతో తెరకెక్కింది.
మరోవైపు, ఎన్టీఆర్ కూడా పాన్ ఇండియా మార్కెట్‌పై దృష్టి సారించి భారీ చిత్రాలను లైన్-అప్ చేస్తున్నారు. బాలీవుడ్‌లో ‘వార్ 2’ (స్పైవర్స్)తో అడుగుపెట్టబోతున్న ఎన్టీఆర్, ప్రశాంత్ నీల్‌తో ‘డ్రాగన్’, తమిళ దర్శకుడు నెల్సన్‌తో, త్రివిక్రమ్‌తో కూడా సినిమాలు చేయనున్నారు. ఇప్పుడు రిషబ్ శెట్టితో ‘కాంతార 3’ కూడా ఆయన లైనప్‌లో చేరనుండటం విశేషం. ఇది ఆయన పాన్ ఇండియా స్టార్‌డమ్‌ను మరింత పెంచుతుందని విశ్లేషకులు చెబుతున్నారు.
‘కాంతార’కు ఉత్తమ నటుడిగా జాతీయ అవార్డు గెలుచుకున్న రిషబ్ శెట్టి, ‘జై హనుమాన్’ సినిమాలో హనుమంతుడిగా నటిస్తున్నారు. వచ్చే ఏడాది ఈ సినిమా విడుదల కానుంది. అలాగే సితార ఎంటర్‌టైన్‌మెంట్స్ పతాకంపై అశ్విన్ గంగరాజు దర్శకత్వంలో మరో సినిమాకు కూడా ఆయన సంతకం చేశారు. ఈ ప్రాజెక్టులన్నీ రిషబ్ శెట్టిని ఒక నటుడిగా, దర్శకుడిగా మరింత బిజీగా ఉంచబోతున్నాయి. ‘కాంతార’ ప్రీక్వెల్ విడుదలైన తర్వాత ‘కాంతార 3’పై అధికారిక ప్రకటన వెలువడే అవకాశం ఉంది. ఈ కాంబో నిజమైతే, భారతీయ సినిమా చరిత్రలో మరో బ్లాక్‌బస్టర్ కాంబినేషన్‌కు తెరలేచినట్లేనని సినీ వర్గాలు అభిప్రాయపడుతున్నాయి.