Joe Root: సిడ్నీ వేదికగా ఆస్ట్రేలియాతో జరుగుతున్న ఐదో యాషెస్ టెస్టులో ఇంగ్లండ్ స్టార్ బ్యాటర్ జో రూట్ అద్భుత ప్రదర్శనతో సరికొత్త చరిత్ర సృష్టించాడు. తన కెరీర్లో 41వ టెస్ట్ సెంచరీ పూర్తి చేయడం ద్వారా ఆస్ట్రేలియా దిగ్గజం రికీ పాంటింగ్ రికార్డును రూట్ సమం చేశాడు. సిడ్నీ క్రికెట్ గ్రౌండ్ (SCG)లో జరుగుతున్న ఆఖరి టెస్ట్ రెండో రోజున జో రూట్ ఈ మైలురాయిని చేరుకున్నాడు. మైఖేల్ నేసర్ వేసిన ఓవర్లో రెండు పరుగులు తీయడం ద్వారా అతను తన 41వ శతకాన్ని నమోదు చేశాడు. రికీ పాంటింగ్ 168 టెస్టుల్లో 41 సెంచరీలు సాధించగా, రూట్ కేవలం 163 టెస్టుల్లోనే ఈ ఘనతను అందుకోవడం విశేషం. దీనితో టెస్ట్ క్రికెట్ చరిత్రలో అత్యధిక సెంచరీలు చేసిన ఆటగాళ్ల జాబితాలో రూట్, పాంటింగ్తో కలిసి సంయుక్తంగా మూడో స్థానానికి చేరుకున్నాడు.
Also Read: Mitchell Starc: బెన్ స్టోక్స్ను వదలని స్టార్క్.. అశ్విన్ రికార్డు బద్దలు
ప్రస్తుతం జో రూట్ కంటే ముందు భారత దిగ్గజం సచిన్ టెండూల్కర్ (51 సెంచరీలు), దక్షిణాఫ్రికా ఆల్రౌండర్ జాక్వెస్ కలిస్ (45 సెంచరీలు) మాత్రమే ఉన్నారు. గత ఐదేళ్లలో రూట్ ఉన్న ఫామ్ చూస్తుంటే (2021 నుండి ఇప్పటివరకు 24 సెంచరీలు), అతను త్వరలోనే కలిస్ రికార్డును దాటి, సచిన్ రికార్డుకు చేరువయ్యే అవకాశం ఉందని విశ్లేషకులు భావిస్తున్నారు. పరుగుల పరంగా కూడా రూట్ ఇప్పటికే 14,000 మార్కుకు అతి చేరువలో ఉన్నాడు. ఒకప్పుడు ఆస్ట్రేలియాలో సెంచరీ సాధించలేదని విమర్శలు ఎదుర్కొన్న రూట్, ప్రస్తుత యాషెస్ సిరీస్లో తన రెండో సెంచరీతో ఆ విమర్శలకు చెక్ పెట్టాడు. గతంలో బ్రిస్బేన్లో జరిగిన పింక్ బాల్ టెస్టులోనూ అతను భారీ శతకం సాధించాడు. సిడ్నీలో హ్యారీ బ్రూక్ (84) తో కలిసి నాలుగో వికెట్కు 169 పరుగుల కీలక భాగస్వామ్యాన్ని నెలకొల్పి ఇంగ్లండ్ను పటిష్ట స్థితిలో నిలిపాడు.