Sangareddy: సంగారెడ్డి పట్టణంలోని రాంనగర్ రామాలయం భక్తిపారవశ్యంతో పులకించిపోతోంది. శ్రీరామనవమి వేడుకల సందర్భంగా సీతారామచంద్రమూర్తికి అత్యంత ఖరీదైన, అరుదైన కానుకలు అందాయి. టీపీసీసీ కార్యనిర్వాహక అధ్యక్షుడు, మాజీ ఎమ్మెల్యే జగ్గారెడ్డి తన మిత్ర బృందం, రామ మందిరం యువసేన మరియు ఆలయ కమిటీతో కలిసి సుమారు రూ.2.50 కోట్ల విలువైన వెండి, బంగారు ఆభరణాలను స్వామివారికి సమర్పించారు.
ఈ ఆభరణాల వివరాల్లోకి వెళ్తే.. భక్తితో చేయించిన సుమారు 10 కిలోల వెండితో రూపుదిద్దుకున్న ఆదిశేషుడు, వెండి కల్యాణ పీఠం ప్రత్యేక ఆకర్షణగా నిలిచాయి. వీటితో పాటు 2.25 కిలోల బంగారంతో తయారు చేయించిన కిరీటాలు, కర్ణాభరణాలు, కంఠాభరణాలు, వడ్డాణాలు, యజ్ఞోపవీతం, శంఖుచక్రాలు మరియు సీతమ్మ వారికి మంగళసూత్రాలను అత్యంత కళాత్మకంగా చేయించారు.
ఈ కానుకలకు ముందుగా జగ్గారెడ్డి నివాసంలో శాస్త్రోక్తంగా ప్రత్యేక పూజలు నిర్వహించారు. అనంతరం ఈ ఆభరణాలను భారీ ఊరేగింపుగా, భజనలు మరియు మంగళవాయిద్యాల మధ్య ఆలయానికి తీసుకువచ్చారు. పండుగ వేళ రామయ్యకు ఇన్ని అపురూపమైన ఆభరణాలు సమర్పించడంతో భక్తులు ఎంతో సంతోషం వ్యక్తం చేస్తున్నారు. పట్టణంలో ఇప్పుడు ఎక్కడ చూసినా ఈ బంగారు కానుకల గురించిన చర్చా విశేషాలే వినిపిస్తున్నాయి.