Jasprit Bumrah: ఇంగ్లాండ్‌తో జూలై 2 నుంచి బర్మింగ్‌హామ్‌లో జరగనున్న రెండో టెస్టుకు ముందు టీమిండియాకు ఒక పెద్ద ఎదురుదెబ్బ తగిలే అవకాశం ఉంది. భారత స్టార్ పేసర్ జస్ప్రీత్ బుమ్రా ఈ మ్యాచ్‌కు దూరంగా ఉండే అవకాశం ఉందని సమాచారం. పని భారాన్ని తగ్గించడంలో భాగంగా బుమ్రాకు ఈ విశ్రాంతి ఇస్తున్నట్లు తెలుస్తోంది.
బుమ్రా లేకపోతే టీమిండియా పరిస్థితి ఏంటి?
జూలై 2 నుంచి ఎడ్జ్‌బాస్టన్ మైదానంలో ఇంగ్లాండ్‌, భారత్ మధ్య రెండో టెస్టు మ్యాచ్ ప్రారంభం కానుంది. ఈ కీలకమైన మ్యాచ్‌కు బుమ్రా లేకపోతే, టీమిండియా బౌలింగ్ విభాగానికి పెద్ద నష్టం వాటిల్లుతుంది. ఇప్పటికే తొలి టెస్టులో ఓడి సిరీస్‌లో వెనుకబడిన భారత్, బుమ్రా లేకుండా బరిలోకి దిగితే పరిస్థితి మరింత కష్టమవుతుందని విశ్లేషకులు చెబుతున్నారు.
మొదటి టెస్టులో బుమ్రా ఒక్కడే అద్భుతంగా బౌలింగ్ చేశాడు. తొలి ఇన్నింగ్స్‌లో 25 ఓవర్లు వేసి 83 పరుగులిచ్చి 5 వికెట్లు తీశాడు. అయితే, మిగతా ఫాస్ట్ బౌలర్లు – సిరాజ్, ప్రసిద్ధ్ కృష్ణ, శార్దూల్ ఠాకూర్ – రెండు ఇన్నింగ్స్‌లలో కలిపి 92 ఓవర్లలో కేవలం 9 వికెట్లు మాత్రమే తీసి 482 పరుగులు ఇచ్చారు. ఈ గణాంకాలు బుమ్రా ప్రాముఖ్యతను స్పష్టం చేస్తున్నాయి.
బుమ్రా స్థానంలో ఎవరు?
బుమ్రా విశ్రాంతి తీసుకుంటే, అతని స్థానాన్ని యువ పేసర్ అర్ష్‌దీప్ సింగ్ భర్తీ చేసే అవకాశం ఉంది. అర్ష్‌దీప్ సింగ్‌కు ఇంకా టెస్టు మ్యాచ్ ఆడిన అనుభవం లేకపోయినా, వన్డేలు, టీ20లలో మంచి ప్రదర్శన చేశాడు. శార్దూల్ ఠాకూర్‌పై వేటు వేసి నితీశ్ రెడ్డిని తుది జట్టులోకి తీసుకునే అవకాశం కూడా ఉందని వార్తలు వస్తున్నాయి.
Also Read: Virat Kohli: విరాట్ కోహ్లీ ఇంటర్వ్యూ.. సోషల్ మీడియాలో హల్ చల్
భారత మాజీ కోచ్ రవిశాస్త్రి మాట్లాడుతూ, బుమ్రా రెండో టెస్టులో ఆడకపోతే భారత్ సిరీస్‌లో 2-0తో వెనుకబడుతుందని ఆందోళన వ్యక్తం చేశారు. లార్డ్స్‌లో జూలై 10 నుంచి జరిగే మూడో టెస్టులో బుమ్రా ఆడాలని రవిశాస్త్రి అభిప్రాయపడ్డారు, ఎందుకంటే లార్డ్స్ మైదానం ఫాస్ట్ బౌలర్లకు అనుకూలంగా ఉంటుంది. రెండు టెస్టుల మధ్య కేవలం నాలుగు రోజుల విరామమే ఉండటంతో, బుమ్రాకు తగినంత విశ్రాంతి అవసరమని కూడా ఆయన సూచించారు. మరోవైపు, భారత మాజీ కెప్టెన్ సునీల్ గావస్కర్ మాత్రం ఐదు టెస్టుల్లోనూ బుమ్రా ఆడాలని టీమ్ మేనేజ్‌మెంట్‌కు సూచించారు.
ఎడ్జ్‌బాస్టన్‌లో భారత్ రికార్డు..
టీమిండియాకు ఎడ్జ్‌బాస్టన్ మైదానంలో టెస్టు రికార్డు అంతగా బాగాలేదు. భారత జట్టు ఈ మైదానంలో ఇప్పటివరకు ఒక్క టెస్టు మ్యాచ్ కూడా గెలవలేదు. ఏడు టెస్టులు ఆడి, వాటిలో మూడుసార్లు ఇన్నింగ్స్ తేడాతో ఓడిపోయింది. ఈ నేపథ్యంలో, కీలకమైన బెర్మింగ్‌హామ్ టెస్టులో బుమ్రా లేకపోవడం టీమిండియాకు పెద్ద సవాలుగా మారనుంది. ఈ మ్యాచ్‌లో టీమిండియా ప్లేయింగ్ ఎలెవెన్ ఎలా ఉంటుందో, బుమ్రా లేని లోటును ఎలా భర్తీ చేస్తుందో వేచి చూడాలి.