Ram Talluri: జనసేన పార్టీకి కొత్త శక్తిని తెచ్చే నిర్ణయం తీసుకున్నారు పార్టీ అధినేత పవన్ కళ్యాణ్. ప్రముఖ సినీ నిర్మాత, సాఫ్ట్‌వేర్ రంగ నిపుణుడు రామ్ తాళ్ళూరిని పార్టీ ప్రధాన కార్యదర్శిగా నియమించారు. పార్టీ సంస్థాగత అభివృద్ధి, విస్తరణ కార్యక్రమాల్లో కీలక పాత్ర పోషించే బాధ్యత ఆయన భుజస్కంధాలపై పెట్టారు.
పవన్ కళ్యాణ్ విడుదల చేసిన ప్రకటనలో, ఇప్పటికే 2014లోనే పార్టీ కోసం పని చేయాలనే సంకల్పాన్ని రామ్ తాళ్ళూరి వ్యక్తం చేశారని గుర్తుచేశారు. అప్పటినుంచి ఆయన జనసేన పట్ల అంకితభావంతో కృషి చేస్తూ, ముఖ్యంగా తెలంగాణ విభాగంలో విశేషంగా పనిచేస్తున్నారని తెలిపారు. ఆయన ప్రొఫెషనల్ అనుభవం, సంస్థాగత నైపుణ్యం దృష్ట్యా ఈ పదవికి ఎంపిక చేసినట్లు పవన్ స్పష్టం చేశారు.
ఇది కూడా చదవండి: India-EFTA: అమల్లోకి భారత్‌-ఈఎఫ్‌టీఏ ఒప్పందం
రామ్ తాళ్ళూరి గురించి చెప్పుకుంటే – ఆయన ఒక విజయవంతమైన సాఫ్ట్‌వేర్ వ్యాపారవేత్త మాత్రమే కాకుండా, సినీ రంగంలో కూడా తనదైన ముద్ర వేశారు. చుట్టాలబ్బాయి, నేల టికెట్, డిస్కో రాజా, మెకానిక్ రాకీ వంటి చిత్రాలను నిర్మించి టాలీవుడ్‌లో నిర్మాతగా మంచి గుర్తింపు తెచ్చుకున్నారు. సాఫ్ట్‌వేర్ రంగంలో పలు సంస్థలను స్థాపించి విజయవంతంగా నడిపిన అనుభవం ఆయన నిర్వాహక సామర్థ్యాన్ని మరింత బలపరుస్తుంది.
రామ్ తాళ్ళూరి ప్రధాన కార్యదర్శిగా నియమితులవడం వల్ల పార్టీకి కొత్త ఉత్సాహం, కొత్త దిశ లభిస్తుందని జనసేన వర్గాలు భావిస్తున్నాయి. తెలంగాణ, ఆంధ్రప్రదేశ్ రాష్ట్రాల్లో పార్టీ కార్యకలాపాలను సమన్వయం చేస్తూ, జనసేనను బలమైన రాజకీయ శక్తిగా మార్చే ప్రయత్నాల్లో ఆయన కీలకపాత్ర పోషించే అవకాశం ఉంది.