Janardan Reddy: గత వైసీపీ ప్రభుత్వ పాలనలో తిరుమల తిరుపతి దేవస్థానంలో (టీటీడీ) అనేక అక్రమాలు, అవకతవకలు జరిగాయని రాష్ట్ర కార్మిక, పరిశ్రమల శాఖ మంత్రి బీసీ జనార్థన్ రెడ్డి తీవ్ర ఆరోపణలు చేశారు. భక్తుల విశ్వాసానికి ప్రతీకగా నిలిచిన పవిత్ర తిరుమల క్షేత్రాన్ని గత ప్రభుత్వం రాజకీయ ప్రయోజనాల కోసం దుర్వినియోగం చేసిందని విమర్శించారు. బుధవారం మంగళగిరిలోని టీడీపీ కేంద్ర కార్యాలయంలో నిర్వహించిన మీడియా సమావేశంలో ఆయన ఈ వ్యాఖ్యలు చేశారు.
భక్తులు అత్యంత పవిత్రంగా భావించే లడ్డూ ప్రసాదంలో కల్తీ నెయ్యి వాడిన ఘటన దేశవ్యాప్తంగా సంచలనం సృష్టించిందని మంత్రి గుర్తు చేశారు. ఈ ఘటన ఒక్కటే కాకుండా, గత ప్రభుత్వ హయాంలో టీటీడీలో చోటుచేసుకున్న అనేక అక్రమాలు ఇప్పుడు ఒక్కొక్కటిగా బయటపడుతున్నాయని చెప్పారు. కూటమి ప్రభుత్వం అధికారంలోకి వచ్చిన వెంటనే టీటీడీలో ప్రక్షాళన కార్యక్రమం ప్రారంభించామని, ప్రసాదాల తయారీలో ఉపయోగించే నెయ్యి సహా అన్ని పదార్థాలను కఠినంగా పరీక్షించిన తర్వాతే వినియోగిస్తున్నామని స్పష్టం చేశారు.
గత ఐదేళ్ల వైసీపీ పాలనలో తిరుమల దర్శనానికి వచ్చే దేశ, విదేశాల భక్తులు తీవ్ర ఇబ్బందులు ఎదుర్కొన్నారని జనార్థన్ రెడ్డి ఆరోపించారు. భక్తుల సౌకర్యాల విషయంలో అప్పటి ప్రభుత్వం ఘోరంగా నిర్లక్ష్యం వహించిందని చెప్పారు. అప్పటి టీటీడీ చైర్మన్ భూమన కరుణాకర్ రెడ్డి పాత్రపై కూడా ప్రజల్లో స్పష్టత వస్తోందని, అయితే ఈ అంశాలు న్యాయస్థానాల పరిధిలో ఉన్నందున ప్రస్తుతం ఎక్కువగా మాట్లాడటం లేదని తెలిపారు.
కూటమి ప్రభుత్వం అధికారంలోకి వచ్చిన తర్వాత తిరుమలలో భక్తులకే ప్రాధాన్యం ఇచ్చే విధంగా పాలన సాగుతోందని మంత్రి అన్నారు. రాష్ట్ర చరిత్రలోనే తొలిసారిగా ఏకాదశి రోజున ‘వైకుంఠ ద్వార దర్శనం’ ద్వారా 90 శాతానికి పైగా సామాన్య భక్తులకు దర్శన భాగ్యం కల్పించిన ఘనత కూటమి ప్రభుత్వానిదేనని పేర్కొన్నారు. దేవుడిపై విశ్వాసం లేని వ్యక్తులకు టీటీడీ వంటి పవిత్ర సంస్థ బాధ్యతలు అప్పగించడమే గత ప్రభుత్వపు అతిపెద్ద తప్పిదమని ప్రజలు భావిస్తున్నారని వ్యాఖ్యానించారు.
కూటమి పాలనలో అభివృద్ధికి వేగం
గత ఆరు నెలలుగా కూటమి ప్రభుత్వ పనితీరుకు ప్రజల నుంచి అపూర్వ స్పందన వస్తోందని జనార్థన్ రెడ్డి తెలిపారు. డీఎస్సీ, పోలీస్ కానిస్టేబుల్ నియామకాలను చేపట్టామని, సీఐఐ సదస్సుల ద్వారా రాష్ట్రానికి వేల కోట్ల రూపాయల పెట్టుబడులు ఆకర్షించగలిగామని చెప్పారు. ముఖ్యమంత్రి చంద్రబాబు నాయుడు, ఐటీ మంత్రి నారా లోకేశ్ నాయకత్వంలో ఆంధ్రప్రదేశ్ పెట్టుబడులకు విశ్వసనీయ గమ్యస్థానంగా మారుతోందని అభిప్రాయపడ్డారు. కొత్త పోర్టులు, ఐదు విమానాశ్రయాల నిర్మాణానికి ప్రణాళికలు సిద్ధంగా ఉన్నాయని వెల్లడించారు.
ప్రతిపక్షం తీరు మారాలని హితవు
ప్రతిపక్ష నేతలు పెట్టుబడిదారులను భయపెట్టేలా మాట్లాడటం దురదృష్టకరమని మంత్రి విమర్శించారు. వారి బెదిరింపులకు ఎవరూ భయపడరని స్పష్టం చేశారు. ప్రజలు వైసీపీని 151 సీట్ల నుంచి 11 సీట్లకు పరిమితం చేసినా ఆ పార్టీ నాయకులకు ఇంకా బుద్ధి రాలేదని ఎద్దేవా చేశారు. అసెంబ్లీకి రాకుండా జీతాలు తీసుకోవడం కాదని, ప్రజా సమస్యలపై చర్చించేందుకు సభకు హాజరుకావాలని సూచించారు.
గత ప్రభుత్వంలో నిర్వీర్యమైన ఆర్అండ్బీ శాఖను పునరుద్ధరించామని, ఏడాదిలోనే రూ.3,000 కోట్ల విలువైన రహదారి పనులకు అనుమతులు ఇచ్చామని తెలిపారు. సంక్రాంతి నాటికి రాష్ట్రంలో గుంతలు లేని రోడ్ల నిర్మాణమే లక్ష్యంగా పనులు వేగవంతం చేశామని, జూన్ చివరి నాటికి పెండింగ్లో ఉన్న అన్ని రహదారి పనులను పూర్తి చేస్తామని మంత్రి బీసీ జనార్థన్ రెడ్డి హామీ ఇచ్చారు. ఈ సందర్భంగా రాష్ట్ర ప్రజలందరికీ ఆయన క్రిస్మస్ శుభాకాంక్షలు తెలిపారు.