Crime News: హైదరాబాద్లోని కూకట్పల్లి పోలీస్ స్టేషన్ పరిధిలో ఒక హృదయవిదారక ఘటన చోటుచేసుకుంది. కన్నతల్లికి అన్నీ తానై సేవలు చేస్తున్న ఒక యువతి, తల్లికున్న అనారోగ్యం కారణంగా తన వివాహం ఆగిపోతోందని మనోవేదనకు గురై హుస్సేన్ సాగర్లో దూకి ప్రాణాలు తీసుకుంది. మేడ్చల్ జిల్లా కండ్లకోయకు చెందిన తోష్నివాల్ విజయలక్ష్మి (26) మృతదేహాన్ని పోలీసులు సోమవారం గుర్తించారు.
అమ్మ కోసం వివాహం వదులుకుని..
విజయలక్ష్మి జీవితం మొదటి నుండి పోరాటాలతోనే సాగింది. చిన్నతనంలోనే తండ్రిని కోల్పోయిన ఆమె, తల్లి సరస్వతి నీడనే పెరిగింది. అయితే తల్లికి మతిస్థిమితం సరిగా లేకపోవడంతో, విజయలక్ష్మి ఆమెకు అన్నీ తానై చూసుకునేది. ప్రస్తుతం కూకట్పల్లి మైత్రినగర్లో నివాసముంటూ ఒక ఐటీ సంస్థలో ఉద్యోగం చేస్తూ తల్లిని కంటికి రెప్పలా కాపాడుకుంటోంది.
ఇటీవల విజయలక్ష్మికి పెళ్లి సంబంధాలు రావడం మొదలయ్యాయి. అయితే, పెళ్లయిన తర్వాత కూడా తన తల్లి తనతోనే ఉంటుందని ఆమె నిబంధన పెట్టేది. అమ్మను ఒంటరిగా వదలడం ఇష్టం లేక ఆమె తీసుకున్న ఈ నిర్ణయానికి సంబంధాలు కుదరలేదు. వచ్చిన సంబంధాలన్నీ వెనుదిరగడంతో, తన వల్ల తన వివాహం కావడం లేదని కాకుండా, తన తల్లి పరిస్థితి వల్లే పెళ్లి కావడం లేదనే బాధ ఆమెను తీవ్రంగా కుంగదీసింది.
ఇది కూడా చదవండి: Donald Trump: మోడీ నా మజాకా.. దెబ్బకి దిగొచ్చిన ట్రంప్
అదృశ్యం నుండి విషాదాంతం వరకు
శనివారం సాయంత్రం మనోవేదనతో ఇంటి నుంచి బయటకు వెళ్లిన విజయలక్ష్మి మళ్లీ తిరిగి రాలేదు. ఆమె కోసం గాలించిన బంధువు అభిషేక్, ఆదివారం కూకట్పల్లి పోలీసులకు ఫిర్యాదు చేశారు. పోలీసులు మిస్సింగ్ కేసు నమోదు చేసి దర్యాప్తు ప్రారంభించారు. అయితే, సోమవారం హుస్సేన్ సాగర్లో ఒక యువతి మృతదేహం తేలిందని లేక్ పోలీసుల నుండి సమాచారం అందింది. ఘటనా స్థలానికి చేరుకున్న పోలీసులు, ఆ మృతదేహం అదృశ్యమైన విజయలక్ష్మిదేనని ధ్రువీకరించారు.
తల్లికి సపర్యలు చేస్తూ, ఆమె క్షేమం కోసం తన జీవితాన్ని త్యాగం చేయాలనుకున్న ఒక కూతురు ఇలా విగతజీవిగా మారడం స్థానికులను కన్నీరు పెట్టించింది. పోలీసులు కేసు నమోదు చేసుకుని దర్యాప్తు చేస్తున్నారు.
తల్లి మతిస్థిమితం సరిగా లేకపోవడం ఆమెను తనతోనే ఉంచుకుంటాననే నిబంధన వల్ల పెళ్లి సంబంధాలు కుదరక, హైదరాబాద్కు చెందిన ఐటీ ఉద్యోగిని విజయలక్ష్మి హుస్సేన్ సాగర్లో దూకి ఆత్మహత్య చేసుకుంది. శనివారం అదృశ్యమైన ఆమె మృతదేహం సోమవారం లభ్యమైంది.