Israel: మధ్య ప్రాచ్యంలో ఉద్రిక్తతలు పీక్ స్టేజ్కు చేరుకున్నాయి. ఇరాన్ వ్యాప్తంగా ఉన్న పౌరులు రైళ్లు ఇంకా రైల్వే ట్రాక్లకు దూరంగా ఉండాలని ఇజ్రాయెల్ రక్షణ దళాలు (IDF) సంచలన హెచ్చరిక జారీ చేశాయి. మంగళవారం రాత్రి ఇరాన్ కాలమానం ప్రకారం 9 గంటల వరకు (భారత కాలమానం ప్రకారం రాత్రి 11 గంటల వరకు) రైలు ప్రయాణాలు ప్రాణాంతకమని ఇజ్రాయెల్ సైన్యం తన అధికారిక సోషల్ మీడియా ఖాతా ద్వారా స్పష్టం చేసింది.
అత్యవసర హెచ్చరిక.. ఏం జరుగుతోంది?
ఇజ్రాయెల్ సైన్యం తన పర్షియన్ భాషా ‘X’ ఖాతాలో ఒక గ్రాఫిక్ సందేశాన్ని విడుదల చేసింది. ఇందులో “అత్యవసర హెచ్చరిక” అంటూ రైలు రవాణాను ఉపయోగించవద్దని ఇరాన్ ప్రజలను కోరింది.
IDF సందేశం: మీ భద్రత దృష్ట్యా, ఈ క్షణం నుండి ఇరాన్ అంతటా రైళ్లను ఉపయోగించడం మానుకోవాలని మేము వినయపూర్వకంగా కోరుతున్నాము. రైలు మార్గాల సమీపంలో మీ ఉనికి మీ ప్రాణాలకు ప్రమాదం కలిగించవచ్చు అని సైన్యం పేర్కొంది.
అనిశ్చితిలో ఇరాన్ పౌరులు
ఈ హెచ్చరికలో ఏ నిర్దిష్ట ప్రాంతం లేదా రైల్వే లైన్ గురించి ప్రస్తావించకపోవడం గమనార్హం. అంటే ఇరాన్ దేశవ్యాప్తంగా ఉన్న అన్ని రైలు మార్గాలపై దాడి జరిగే అవకాశం ఉందని విశ్లేషకులు భావిస్తున్నారు. గత ఫిబ్రవరి 28న జరిగిన తొలి దాడుల తర్వాత, అమెరికా ఇంకా ఇజ్రాయెల్ కూటమి ఇరాన్తో నేరుగా తలపడుతున్నాయి. తాజా హెచ్చరిక ఇరాన్ రవాణా వ్యవస్థను దెబ్బతీసే పెద్ద ఆపరేషన్కు సంకేతమని తెలుస్తోంది.
మరోవైపు, ఈ హెచ్చరికపై ఇరాన్ ప్రభుత్వం ఇప్పటివరకు అధికారికంగా స్పందించలేదు. అయితే, రవాణా వ్యవస్థను లక్ష్యంగా చేసుకుని దాడులు జరిగితే దేశ ఆర్థిక వ్యవస్థ ఇంకా పౌర జీవనం చిన్నాభిన్నమయ్యే ప్రమాదం ఉంది. ఇజ్రాయెల్ వాడిన భాషను బట్టి చూస్తుంటే, మరికొద్ది గంటల్లోనే ఇరాన్ మౌలిక సదుపాయాలపై భారీ దాడులు జరిగే సూచనలు కనిపిస్తున్నాయి.
ఈ పరిణామాలు ప్రపంచవ్యాప్తంగా ఆందోళన కలిగిస్తున్నాయి. ఇప్పటికే ఇంధన మరియు విద్యుత్ కేంద్రాలపై దాడులు జరుగుతున్న తరుణంలో, ఇప్పుడు రైల్వే నెట్వర్క్ను లక్ష్యంగా చేసుకోవడం యుద్ధ తీవ్రతను మరో స్థాయికి తీసుకెళ్లే అవకాశం ఉంది.