Trump: అమెరికా అధ్యక్షుడు డొనాల్డ్ ట్రంప్‌నకు ఇజ్రాయెల్ అత్యున్నత పౌర పురస్కారం దక్కనుంది. ఇజ్రాయెల్-హమాస్ మధ్య శాంతి ఒప్పందం కుదిర్చి, బందీలను విడిపించడానికి ట్రంప్ చేసిన కృషికి గుర్తింపుగా, తమ దేశ అత్యున్నత పౌర పురస్కారమైన ‘ప్రెసిడెన్షియల్ మెడల్ ఆఫ్ ఆనర్’ను ప్రదానం చేయనున్నట్లు ఇజ్రాయెల్ అధ్యక్షుడు ఇస్సాక్ హెర్జోగ్ ప్రకటించారు.
నెస్సెట్‌లో అపూర్వ గౌరవం:
ట్రంప్ ఇజ్రాయెల్ పార్లమెంట్ (నెస్సెట్)ను సందర్శించినప్పుడు, ఆయనకు శాసనసభ్యుల నుంచి అపూర్వమైన గౌరవం లభించింది. సభ్యులు లేచి నిలబడి (స్టాండింగ్ ఒవేషన్) సుదీర్ఘంగా చప్పట్లు కొట్టి ట్రంప్‌ను ప్రశంసించారు. హమాస్ చెర నుంచి బందీలందరూ తిరిగి వచ్చిన తర్వాత ఇజ్రాయెల్‌లో ట్రంప్‌కు ప్రజాదరణ మరింత పెరిగింది.
Also Read: KTR: జూబ్లీహిల్స్‌లో ఓట్ల గోల్‌మాల్.. ఎన్నికల సంఘానికి కేటీఆర్ ఫిర్యాదు!
ఇజ్రాయెల్ ప్రధానమంత్రి బెంజమిన్ నెతన్యాహు, ట్రంప్‌ను “వైట్ హౌస్‌లో ఇజ్రాయెల్‌కు ఉన్న గొప్ప స్నేహితుడు” అని అభివర్ణించారు. అబ్రహం ఒప్పందంలో మధ్యవర్తిత్వం, ఇరాన్ అణు ఒప్పందం నుండి వైదొలగడం, అలాగే ఆపరేషన్ రైజింగ్ లయన్, ఆపరేషన్ మిడ్‌నైట్ హామర్ వంటి కీలక నిర్ణయాలకు మద్దతు ఇచ్చినందుకు నెతన్యాహు కృతజ్ఞతలు తెలిపారు. ట్రంప్‌కు త్వరలో నోబెల్ శాంతి బహుమతి దక్కుతుందని కూడా ఆయన ఆశాభావం వ్యక్తం చేశారు.
నెస్సెట్ స్పీకర్ అమీర్ ఒహానా, ట్రంప్ బృందంలోని విదేశాంగ కార్యదర్శి మార్కో రూబియో, రక్షణ కార్యదర్శి పీట్ హెగ్సేత్, రాయబారి మైక్ హకబీతో పాటు గాజా కాల్పుల విరమణలో కృషి చేసిన ఇతర సీనియర్ అధికారుల కృషిని ప్రత్యేకంగా ప్రశంసించారు. ఇజ్రాయెల్‌కు ట్రంప్ అందించిన అచంచలమైన మద్దతు, దేశ పౌరుల భద్రత కోసం నెలకొల్పిన శాంతికి గుర్తింపుగా ఈ పురస్కారాన్ని అందిస్తున్నట్లు ఇస్సాక్ హెర్జోగ్ తెలిపారు.