Vc sajjanar: ప్రస్తుతం దేశవ్యాప్తంగా నెలకొన్న గ్యాస్ సిలిండర్ల కొరతను సైబర్ నేరగాళ్లు పెట్టుబడిగా మార్చుకుంటున్నారు. గ్యాస్ దొరకడం లేదన్న సామాన్యుల భయాన్ని ఆసరాగా చేసుకుని కొత్త రకమైన మోసాలకు తెరలేపారు. “వెంటనే సిలిండర్ డెలివరీ చేస్తాం” లేదా “అదనపు సిలిండర్లు ఇస్తాం” అంటూ సోషల్ మీడియాలో వస్తున్న నకిలీ ప్రకటనల పట్ల ప్రజలు అత్యంత జాగ్రత్తగా ఉండాలని హైదరాబాద్ పోలీస్ కమిషనర్ హెచ్చరించారు.
ఆకర్షణీయమైన ఆఫర్ల వెనుక పెద్ద ముప్పు
సైబర్ కేటుగాళ్లు ముఖ్యంగా వాట్సాప్ మరియు ఎస్సెమ్మెస్ల ద్వారా నకిలీ వెబ్సైట్ లింకులను పంపిస్తున్నారు. “తక్కువ ధరకే గ్యాస్” లేదా “అర్జెంట్గా సిలిండర్ కావాలా?” అనే సందేశాలతో మిమ్మల్ని బురిడీ కొట్టిస్తారు. ఆ లింకులను క్లిక్ చేయగానే అవి అసలైన గ్యాస్ కంపెనీ వెబ్సైట్లలాగే కనిపిస్తాయి. అక్కడ మీరు డబ్బులు చెల్లించడమో లేదా మీ వ్యక్తిగత వివరాలు నమోదు చేయడమో చేస్తే, మీ బ్యాంక్ ఖాతా వివరాలు నేరుగా దొంగల చేతికి వెళ్తాయి.
పోలీసుల సూచనలు: వీటిని అస్సలు చేయకండి!
ఆన్లైన్లో గ్యాస్ బుకింగ్ చేసేటప్పుడు కొన్ని విషయాలను తప్పనిసరిగా గుర్తుంచుకోవాలి. గుర్తుతెలియని వ్యక్తులు పంపే లింకులను ఎట్టి పరిస్థితుల్లోనూ క్లిక్ చేయవద్దు. గ్యాస్ బుకింగ్ కోసం ఎప్పుడూ సంబంధిత కంపెనీల అధికారిక యాప్స్ లేదా వెబ్సైట్లను మాత్రమే వాడండి. అలాగే, మీ బ్యాంక్ ఖాతా వివరాలు, ఓటీపీ (OTP), లేదా యూపీఐ పిన్ (UPI PIN) వంటివి ఎవరికీ చెప్పకూడదు. ఫోన్ చేసి గ్యాస్ ఏజెన్సీ నుంచి మాట్లాడుతున్నామని చెప్పినా సరే, మీ వ్యక్తిగత సమాచారాన్ని పంచుకోకపోవడమే మంచిది.
మోసపోతే ఏం చేయాలి?
ఒకవేళ మీరు తెలియక ఇలాంటి సైబర్ మాయలో పడి డబ్బులు పోగొట్టుకుంటే, ఏమాత్రం ఆలస్యం చేయకుండా వెంటనే స్పందించాలి. ప్రభుత్వం కేటాయించిన నేషనల్ సైబర్ క్రైమ్ హెల్ప్లైన్ నంబర్ 1930 కి ఫోన్ చేయండి. లేదా cybercrime.gov.in అనే వెబ్సైట్లో ఫిర్యాదు నమోదు చేయండి. మీరు ఎంత త్వరగా ఫిర్యాదు చేస్తే, మీ డబ్బును తిరిగి పొందే అవకాశం అంత ఎక్కువగా ఉంటుంది.