IndiGo: భాగ్యనగరం నుంచి తిరుమల శ్రీవారి దర్శనానికి వెళ్లే భక్తులకు ఇండిగో విమానయాన సంస్థ తీపి కబురు అందించింది. గత కొన్ని వారాలుగా రద్దయిన హైదరాబాద్ – తిరుపతి విమాన సర్వీసులను సంస్థ తిరిగి పునఃప్రారంభించింది. గత ఏడాది డిసెంబర్లో ఇండిగో సంస్థ ఎదుర్కొన్న అంతర్గత సాంకేతిక మరియు నిర్వహణ సంక్షోభం కారణంగా దేశవ్యాప్తంగా పలు సర్వీసులు నిలిచిపోయిన సంగతి తెలిసిందే. ఈ నేపథ్యంలో డిసెంబర్ 18 నుంచి రద్దయిన హైదరాబాద్ – తిరుపతి మధ్యాహ్న సర్వీసు ఈ నెల 2వ తేదీ (శుక్రవారం) నుంచి మళ్లీ పట్టాలెక్కింది.
సర్వీసు వివరాలు మరియు సమయ పట్టిక
తిరుపతి విమానాశ్రయ అధికారుల సమాచారం ప్రకారం, ఈ విమానం ప్రతిరోజూ మధ్యాహ్నం 2.25 గంటలకు హైదరాబాద్ నుంచి బయలుదేరి, సాయంత్రం 3.05 గంటలకు తిరుపతి చేరుకుంటుంది. అనంతరం, తిరిగి 3.25 గంటలకు తిరుపతి నుంచి హైదరాబాద్కు బయలుదేరుతుంది. డిసెంబర్ నెలాఖరులో సర్వీసులు నిలిచిపోవడంతో ప్రయాణికులు తీవ్ర ఇబ్బందులు ఎదుర్కొన్నారు.
ఇది కూడా చదవండి: Harish Rao: నదీజలాలు.. ద్రోహాలు.. కాంగ్రెస్ సర్కార్పై హరీష్ రావు ఎదురుదాడి!
ముఖ్యంగా దర్శనం టిక్కెట్లు ముందుగానే బుక్ చేసుకున్న భక్తులు చివరి నిమిషంలో విమానాలు రద్దు కావడంతో ప్రత్యామ్నాయ మార్గాల కోసం ఇబ్బంది పడ్డారు. ఇప్పుడు ఈ సర్వీసు పునఃప్రారంభం కావడంతో ప్రయాణికులకు పెద్ద ఊరట లభించినట్లయింది.
ఆలస్యంగా నడిచిన శనివారం సర్వీసు
సర్వీసు ప్రారంభమైన రెండో రోజే (శనివారం) ప్రయాణికులకు స్వల్ప అసౌకర్యం ఎదురైంది. షెడ్యూల్ ప్రకారం మధ్యాహ్నం 3.05 గంటలకు తిరుపతి చేరుకోవాల్సిన విమానం, దాదాపు రెండు గంటల ఆలస్యంగా సాయంత్రం 5.00 గంటలకు విమానాశ్రయానికి చేరుకుంది. దీంతో తిరుగు ప్రయాణం కూడా ఆలస్యమై 5.25 గంటలకు హైదరాబాద్కు బయలుదేరింది. ప్రారంభంలో ఇలాంటి స్వల్ప కాలయాపనలు జరిగినప్పటికీ, రానున్న రోజుల్లో సర్వీసులు సక్రమంగా నడుస్తాయని విమానాశ్రయ వర్గాలు ఆశాభావం వ్యక్తం చేస్తున్నాయి. ఉదయం పూట ఉండే సర్వీసుల పునరుద్ధరణపై కూడా సంస్థ త్వరలోనే స్పష్టత ఇచ్చే అవకాశం ఉంది.