Ceasefire: భారత్-పాకిస్తాన్ మధ్య కాల్పుల విరమణ ముగిసిందన్న వార్తలు వస్తున్న తరుణంలో, భారత రక్షణ శాఖ కీలక స్పష్టత ఇచ్చింది. రెండు దేశాల డీజీఎంఓల (DGMO) మధ్య జరిగిన చర్చల ద్వారా తీసుకున్న కాల్పుల విరమణ నిర్ణయానికి గడువు లేదని స్పష్టం చేసింది. కొన్ని మీడియా సంస్థలు మే 18తో విరమణ ముగుస్తుందనే వార్తలు ప్రచారం చేయడంతో గందరగోళం నెలకొంది. అయితే ఇవన్నీ అబద్ధమని భారత ఆర్మీ తేల్చి చెప్పింది.
ఈ నెల 10న భారత్, పాకిస్తాన్ మిలిటరీ ఆపరేషన్స్ డైరెక్టర్లు హాట్‌లైన్‌ ద్వారా మాట్లాడి కాల్పుల విరమణకు అంగీకరించిన విషయం తెలిసిందే. మళ్లీ మే 12, మే 14 తేదీల్లో మరిన్ని చర్చలు జరగగా, కాల్పుల విరమణ కొనసాగించాలని నిర్ణయించారు. అయితే దీనికి ఎటువంటి ముగింపు తేదీ లేదని రక్షణ శాఖ వర్గాలు తెలిపారు. ఈ క్రమంలో మే 18న ఎలాంటి కొత్త చర్చలు జరగలేదని, విరమణ కొనసాగుతుందనే నిర్ణయం యథాతథంగా అమలవుతోందని పేర్కొన్నారు.
జమ్ము-కశ్మీర్‌లో పహల్గాం వద్ద జరిగిన ఉగ్రదాడి తర్వాత భారత్ తీవ్రంగా స్పందించింది. ఇండియన్ ఆర్మీ, నేవీ, ఎయిర్‌ఫోర్స్‌లు కలిసి ‘ఆపరేషన్ సిందూర్’ పేరిట పాక్ ఆక్రమిత కశ్మీర్ (PoK)లోని 9 ఉగ్రవాద స్థావరాలను ధ్వంసం చేశాయి. ఈ దాడుల్లో 100 మందికి పైగా ఉగ్రవాదులు మృతిచెందినట్లు సమాచారం. ఈ దెబ్బతో పాకిస్తాన్ కుదేలైంది. సరిహద్దు కాల్పులద్వారా ప్రతీకారం తీర్చేందుకు ప్రయత్నించినా, భారత బలగాల సమర్థతకు తాళలేక చివరికి కాల్పుల విరమణకే మొగ్గుచూపింది.
భారత్ తరచుగా పాకిస్తాన్‌ను ఉగ్రవాద మద్దతుదారుగా ప్రపంచానికి ఎత్తిచూపుతోంది. సింధు జలాల ఒప్పందం అంశంలో కూడా భారత్ కఠిన వైఖరి తీసుకుంది. దీనిపై పాకిస్తాన్ ఉప ప్రధాని ఇషాక్ దార్ స్పందిస్తూ.. ఈ ఒప్పందాన్ని నిలిపివేస్తే విరమణకు ముప్పు వాటిల్లుతుందని హెచ్చరించడం గమనార్హం. కానీ, భారత్ మాత్రం తేల్చి చెప్పింది — ఉగ్రవాదంపై ఎలాంటి మాంద్యం లేకుండా ఎదురు దాడులు కొనసాగుతాయని.
Also Read: Donald Trump: డొనాల్డ్‌ ట్రంప్‌: నా జోక్యంతోనే భారత్-పాక్ అణుయుద్ధం ఆగింది
Ceasefire: ప్రస్తుతం పాకిస్తాన్ ఆర్థిక, రాజకీయంగా సంక్షోభంలో ఉంది. బలూచిస్తాన్ ప్రాంతంలో వేర్పాటువాదం ఊపందుకుంది. అంతర్గత ఒత్తిళ్లను ఎదుర్కొంటూ, మరో యుద్ధానికి తలపడలేనన్న స్థితిలో, కాల్పుల విరమణను కొనసాగించడమే ఉత్తమమని నిర్ణయించినట్లు విశ్లేషకులు అభిప్రాయపడుతున్నారు.
భారత్-పాక్ మధ్య ఇప్పటివరకు ఉన్న కాల్పుల విరమణ అమలులోనే ఉంది. ఇది ఒక నిరవధిక ఒప్పందంగా కొనసాగుతోంది. పాక్ విరమణను ఉల్లంఘిస్తే భారత్ సీరియస్‌గా స్పందిస్తుందని ఇప్పటికే హెచ్చరించింది. తదుపరి దాడులకు తాము సిద్ధంగా ఉన్నామని భారత త్రివిధ దళాలు స్పష్టం చేశాయి.
అటు సరిహద్దుల్లో ఉద్రిక్తతలు కొనసాగుతున్నా, భారత్ మాత్రం శాంతికి అనుకూలంగా వ్యవహరిస్తోంది. అదే సమయంలో దేశ భద్రతకు ముప్పు వాటిల్లితే ఎలాంటి వార్నింగ్ లేకుండా స్పందించడానికి సిద్ధంగా ఉందని మరోసారి స్పష్టమవుతోంది.