Women World Cup 2025: అద్భుతమైన ఫామ్‌ను కొనసాగిస్తున్న భారత మహిళల క్రికెట్ జట్టు, ఐసీసీ మహిళల ప్రపంచకప్ టోర్నమెంట్‌లో మరో ఘన విజయాన్ని నమోదు చేసింది. కొలంబో వేదికగా ఆదివారం జరిగిన మ్యాచ్‌లో చిరకాల ప్రత్యర్థి పాకిస్థాన్‌ను 88 పరుగుల భారీ తేడాతో చిత్తు చేసింది. ఈ విజయంతో భారత్ రెండు మ్యాచ్‌ల్లో నాలుగు పాయింట్లను సాధించి, టోర్నమెంట్ పట్టికలో అగ్రస్థానానికి చేరుకుంది. బ్యాటింగ్, బౌలింగ్ విభాగాల్లో జట్టు సమష్టిగా రాణించి ఆల్రౌండ్ ప్రదర్శనతో అదరగొట్టింది.
బ్యాటింగ్‌లో రిచా మెరుపులు, హర్లీన్ నిలకడ
టాస్ గెలిచిన పాకిస్థాన్ బౌలింగ్ ఎంచుకోగా, తొలుత బ్యాటింగ్‌కు దిగిన భారత జట్టు 50 ఓవర్లలో 247 పరుగులకు ఆలౌట్ అయ్యింది. ఓపెనర్లు స్మృతి మంధాన (23), ప్రతిక రావల్ (31) మంచి ఆరంభాన్ని ఇచ్చారు. భారత ఇన్నింగ్స్‌లో హర్లీన్ డియోల్ (46 పరుగులు) బాధ్యతాయుతమైన ఇన్నింగ్స్‌తో టాప్ స్కోరర్‌గా నిలిచింది. జెమీమా రోడ్రిగ్స్ (32), దీప్తి శర్మ (25) కీలక మద్దతు అందించగా, చివర్లో వికెట్ కీపర్ రిచా ఘోష్ మెరుపులు మెరిపించింది. కేవలం 20 బంతుల్లో 35 పరుగులు (3 ఫోర్లు, 2 సిక్సర్లతో) చేసి అజేయంగా నిలవడంతో భారత స్కోరు 240 పరుగుల మార్కును దాటింది. పాకిస్థాన్ బౌలర్లలో డయానా బేగ్ అత్యధికంగా 4 వికెట్లు పడగొట్టింది.
Also Read: Ravindra Jadeja: ఆస్ట్రేలియాతో మూడు మ్యాచ్‌ల వన్డే సిరీస్‌.. జడేజాను ఎందుకు పక్కన పెట్టారంటే?
క్రాంతి గౌర్ మాయాజాలం: పాక్ బ్యాటర్లు విఫలం
248 పరుగుల లక్ష్యంతో ఛేదనకు దిగిన పాకిస్థాన్ ఆరంభం నుంచే తడబడింది. భారత బౌలర్ల దాడి ముందు పాక్ బ్యాటర్లు నిలవలేకపోయారు. పాక్ తరఫున సిద్రా అమీన్ (81 పరుగులు) మాత్రమే ఒంటరి పోరాటం చేసింది. నటాలియా పర్వైజ్ (33) మినహా మిగతా వారంతా తక్కువ స్కోర్లకే వెనుదిరిగారు. భారత్ బౌలర్లలో ఫాస్ట్ బౌలర్ క్రాంతి గౌర్ (3 వికెట్లు), దీప్తి శర్మ (3 వికెట్లు) అద్భుతంగా రాణించి పాక్ పతనాన్ని శాసించారు. స్నేహ్ రాణా రెండు వికెట్లు తీసి వారికి మద్దతు ఇచ్చింది. చివరికి పాకిస్థాన్ జట్టు 43 ఓవర్లలో కేవలం 159 పరుగులకే ఆలౌట్ అయ్యింది. అద్భుత ప్రదర్శన చేసిన క్రాంతి గౌర్‌కు ‘ప్లేయర్ ఆఫ్ ది మ్యాచ్’ అవార్డు దక్కింది.
పాక్‌పై వరుసగా 12వ వన్డే విజయం
ఈ విజయంతో మహిళల వన్డేల్లో భారత జట్టు పాకిస్థాన్‌పై వరుసగా 12వ విజయాన్ని నమోదు చేసింది. మహిళల ప్రపంచకప్ చరిత్రలో పాకిస్థాన్‌పై భారత్ ఇప్పటివరకు ఒక్క మ్యాచ్‌లో కూడా ఓడిపోలేదు. గత నెలలో పురుషుల జట్టు ఆసియా కప్‌లో పాక్‌పై వరుస విజయాలు సాధించగా, ఇప్పుడు మహిళల జట్టు కూడా అదే సంప్రదాయాన్ని కొనసాగించింది. ఈ టోర్నమెంట్‌లో భారత్ వరుసగా రెండో విజయం సాధించింది. భారత జట్టు తమ తదుపరి మ్యాచ్‌లో మరో బలమైన జట్టు అయిన దక్షిణాఫ్రికాతో అక్టోబర్ 9న తలపడనుంది.