77th Republic Day: భారతదేశ 77వ గణతంత్ర దినోత్సవ వేడుకలు దేశ రాజధాని ఢిల్లీలో అత్యంత వైభవంగా, కట్టుదిట్టమైన భద్రత మధ్య ప్రారంభమయ్యాయి. దేశ రక్షణ శక్తిని, సాంస్కృతిక వైవిధ్యాన్ని చాటిచెప్పేలా ఢిల్లీలోని కర్తవ్యపథ్లో ‘వందేమాతరం’ అనే ప్రత్యేక థీమ్తో ఈ వేడుకలు జరుగుతున్నాయి. భారత రాష్ట్రపతి ద్రౌపది ముర్ము జాతీయ పతాకాన్ని ఆవిష్కరించనుండగా, ప్రధానమంత్రి నరేంద్ర మోదీ ఎర్రకోట వద్ద త్రివర్ణ పతాకాన్ని ఎగురవేయనున్నారు. ఈ ఏడాది వేడుకలకు విశిష్ట అతిథులుగా యూరోపియన్ కౌన్సిల్ ప్రెసిడెంట్ ఆంటోనియో కోస్టా, యూరోపియన్ కమిషన్ అధ్యక్షురాలు ఉర్సులా వాన్ డెర్ లేయెన్ హాజరుకావడం విశేషం.
ఈ భారీ వేడుకల కోసం కేంద్ర ప్రభుత్వం ముందెన్నడూ లేని విధంగా ఐదంచెల భద్రతా వ్యవస్థను ఏర్పాటు చేసింది. సుమారు 30 వేల మంది పోలీసులు, కేంద్ర బలగాలు నిరంతరం పహారా కాస్తున్నాయి. భద్రతను పర్యవేక్షించడానికి కర్తవ్యపథ్ పరిసరాల్లో 6 ప్రత్యేక కంట్రోల్ రూమ్లను సిద్ధం చేశారు. నిఘా వ్యవస్థలో భాగంగా ఈసారి సరికొత్త సాంకేతికతను జోడించారు; పోలీసులు ఆర్టిఫిషియల్ ఇంటెలిజెన్స్ (AI) ఆధారిత స్మార్ట్ కళ్లజోళ్లను ధరించి అనుమానితులను గుర్తిస్తున్నారు. అలాగే సీసీటీవీ కెమెరాలు, ముఖ గుర్తింపు వ్యవస్థ (Facial Recognition System) వంటి అత్యాధునిక పరికరాలతో ఢిల్లీ-ఎన్సీఆర్ ప్రాంతాన్ని పూర్తిగా తమ ఆధీనంలోకి తీసుకున్నారు.
వేడుకల్లో ప్రధాన ఆకర్షణగా నిలిచే పరేడ్లో దాదాపు 6,050 మంది సైనికులు పాల్గొని తమ శౌర్యాన్ని ప్రదర్శించనున్నారు. అలాగే దేశంలోని వివిధ ప్రాంతాల సంస్కృతులను ప్రతిబింబించేలా 17 రాష్ట్రాలకు చెందిన శకటాలు, కేంద్ర ప్రభుత్వ వివిధ మంత్రిత్వ శాఖలకు చెందిన 13 శకటాలు.. ఇలా మొత్తం 30 శకటాల ప్రదర్శన కనువిందు చేయనుంది. ఈ కవాతును ప్రత్యక్షంగా వీక్షించేందుకు సుమారు 10 వేల మంది ప్రత్యేక ఆహ్వానితులు తరలివచ్చారు. కేవలం కవాతు మాత్రమే కాకుండా, భారత సైనిక సామర్థ్యాన్ని చాటిచెప్పే ఆయుధ ప్రదర్శన, ఆకాశంలో యుద్ధ విమానాలు చేసే సాహసోపేత విన్యాసాలు ఈ వేడుకల్లో హైలైట్గా నిలవనున్నాయి.