IND vs PAK: ఏప్రిల్‌ 22న జమ్ము కాశ్మీర్‌లోని పహల్గాంలో పాక్ ప్రేరిత ఉగ్రవాదులు నిర్వహించిన భీకర దాడి దేశాన్ని షాక్‌కు గురిచేసింది. బైసరన్ లోయలో జరిగిన ఈ దాడిలో 26 మంది అమాయక పర్యాటకులు ప్రాణాలు కోల్పోవడం ప్రపంచవ్యాప్తంగా దృష్టిని ఆకర్షించింది. దాడికి పాల్పడిన ఉగ్రవాదుల్లో ఒకడు పాకిస్థాన్ మాజీ పారా కమాండోగా గుర్తించడమే కాకుండా, వారంతా పాక్ జాతీయులే అని నిర్ధారణ కావడం గమనార్హం.
ఈ ఘోర ఘటనకు ప్రతీకారంగా భారత్ శక్తివంతమైన చర్యలకు పూనుకుంది. మొదటిగా సింధుజలాల ఒప్పందాన్ని నిలిపివేయడం ద్వారా ఇస్లామాబాద్‌కు ఒక భారీ గుణపాఠం నేర్పింది. అంతేకాదు, పాక్‌కు వ్యాపార, దౌత్య, నీటి భాగస్వామ్య రంగాల్లో ఒత్తిడి పెంచేలా కొనసాగుతోంది. ప్రధాని మోదీ భద్రతా బలగాలకు పూర్తి స్వేచ్ఛ ఇస్తూ, అవసరమైతే సైనిక చర్య కూడా మినహాయించబడదని స్పష్టం చేశారు.
ఈ క్రమంలో పాకిస్థాన్ నేతలు తమ అసహనం, భయాన్ని అణుబూచితో కొలుస్తున్నారు. ఇటీవల రష్యాలోని పాక్ దౌత్యవేత్త మహ్మద్ ఖలీద్ జమాలీ, భారత్ దాడికి పాల్పడితే తాము అణ్వాయుధాలు సహా సంపూర్ణ శక్తిని వినియోగిస్తామని బెదిరింపులకు దిగారు. రష్యా ఛానెల్ RTకి ఇచ్చిన ఇంటర్వ్యూలో భారత మీడియా దూకుడుపై అసహనం వ్యక్తం చేస్తూ, యుద్ధానికి సన్నద్ధమంటూ వ్యాఖ్యలు చేశారు.
ఇది కూడా చదవండి: Pakistan Spy: ఇద్దరు పాకిస్తాన్ గూఢచారులు అరెస్ట్
అంతేకాదు, గత వారం పాక్ రైల్వేశాఖ మంత్రి హనీఫ్ అబ్బాసీ పుకార్లు మించిన ప్రకటన చేశారు. “మన వద్ద ఉన్న ఘజన్నవీ, ఘోరీ, షహీన్‌ క్షిపణులు, 130 అణ్వాయుధాలు భారత్ కోసమే ఉంచబడ్డాయి” అనే ఆయన వ్యాఖ్యలు పాక్ యొక్క ఉద్దేశాలను బట్టబయలు చేస్తున్నాయి.
ఇది అంతా చూస్తే పాక్ మేకపోతే గాంభీర్యం ప్రదర్శిస్తూ, భారత్ నిర్ణయాలకు భయంతో దుమ్ములేపే ప్రయత్నం చేస్తోంది. భారతం మాత్రం తన చర్యల్లో మాటలకన్నా మరింత స్పష్టత, స్థిరత్వాన్ని చూపిస్తోంది. కేవలం శబ్దగర్భితమైన హెచ్చరికలకే పరిమితం కాని భారత్, అవసరమైతే దెబ్బకు దెబ్బతో ప్రత్యుత్తరం ఇస్తుందన్న సంకేతాలను స్పష్టంగా ఇస్తోంది.
పాక్ ప్రేరిత ఉగ్రవాద చర్యలకు వ్యతిరేకంగా అంతర్జాతీయ మద్దతు కూడా భారత వైపు మొగ్గుతోంది. శాంతిని కోరుకుంటున్న ప్రపంచం, ఉగ్రవాదానికి పాల్పడే దేశాలను బహిష్కరించాలన్న మద్దతు భారత్‌కు బలాన్ని ఇస్తోంది. ఈ పరిణామాలు చూస్తే, పాక్ అణు భీషణలు అసలు ఎవరినైనా భయపెట్టే పరిస్థితిలో లేవని స్పష్టమవుతోంది.